រាជធានីភ្នំពេញ ៖ កាលពីព្រលប់ថ្ងៃទី១៣ ខែមករា ឆ្នាំ២០២៤ បើតាមប្រភពព័ត៌មានបឋមបានឲ្យដឹងថា លោកស្រី ផាត់ សុគន្ធា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បានបញ្ចប់បើកការស៊ើបសួរទៅលើអតីតអភិបាលក្រុងកែបរួចរាល់ហើយ ដែលសង្ស័យជាប់ពាក់ព័ន្ធពីបទ«រំលោ.ភអំណាច និងបទសម្អាតប្រាក់» តាមមាត្រា ៣៥ នៃច្បាប់ស្តីពីការប្រឆាំងអំពើពុ.ករលួ.យ និងមាត្រា ៣ និងមាត្រា ៣៨ នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេរវកម្ម ។
ប៉ុន្តែដោយសារពេលវេលាយប់ ផុតម៉ោងរដ្ឋបាល ជនសង្ស័យត្រូវបានតំណាងអយ្យការផ្ញើទៅសមត្ថកិច្ចវិញ និងតម្រូវឲ្យនាំទៅនីតិវិធីនៅព្រឹកថ្ងៃទី១៤ ខែមករានេះ ដែលសំណុំរឿងត្រូវចាត់បញ្ជូនទៅខាងចៅក្រមស៊ើបសួរ ។
សូមជម្រាបថា ជនសង្ស័យឈ្មោះ ខេង យ័ន អតីតអភិបាលក្រុងកែប ត្រូវបានកម្លាំងសមត្ថកិច្ចអង្គភាពប្រឆាំងអំពើពុ.ករលួ.យ ដែលហៅថា «ACU» ឃាត់ខ្លួន ក្រោយពេលសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា «ថ្ងៃនេះ ខ្ញុំមានការចាំបាច់ត្រូវអនុវត្តអភិក្រមទី៥ គឺ «ការវះកាត់» តាមរយៈការចុះហត្ថលេខា ដើម្បីបញ្ចប់មុខតំណែងអភិបាលក្រុងកែប ដែលបានប្រើប្រាស់អំណាចនៃតួនាទីរបស់ខ្លួន ប្រព្រឹត្តអំពើដែលនាំឲ្យប៉ះពាល់ដល់ផលប្រយោជន៍រដ្ឋ និងផលប្រយោជន៍ប្រជាពលរដ្ឋជាច្រើន ការសម្រេចចិត្តនេះ គឺផ្អែកទៅលើមូលដ្ឋានច្បាស់លាស់ នៃការស៊ើបអង្កេតរបស់អង្គភាពប្រឆាំងអំពើពុករលួយ»។
សម្តេចធិបតី បានលើកឡើងទៀតថា «ខ្ញុំសង្ឃឹមថា មន្ត្រីទាំងអស់របស់រាជរដ្ឋាភិបាលទាំងថ្នាក់ជាតិ និងក្រោមជាតិ នឹងប្រកាន់ខ្ជាប់នូវអភិក្រមទី១ រហូតដល់ទី៤ ឲ្យបានជាប់ជាប្រចាំ ជាពិសេសក្នុងការបម្រើប្រជាពលរដ្ឋឲ្យបានល្អ និងដើម្បីចៀសវាងការឈានទៅដល់ការអនុវត្តអភិក្រមទី៥ នេះ»។
ទោះបីជាយ៉ាងណាក៏ដោយ រាជរដ្ឋាភិបាលនឹងបន្តប្រកាន់ជំហរយ៉ាងម៉ឺងម៉ាត់ ក្នុងការវះកាត់ (អភិក្រមទី៥) ចំពោះមន្ត្រីដែលប្រព្រឹត្តអំពើខុសឆ្គងនាំឲ្យប៉ះពាល់ធ្ងន់ធ្ងរដល់ផលប្រយោជន៍ជាតិ និងប្រជាជន ។ ដូច្នោះសម្តេចបានសម្រេចចុះហត្ថលេខាចេញអនុក្រឹត្យស្តីពី ការបញ្ចប់មុខតំណែងលោក ខេង យ័ន ឋានន្តរស័ក្តិវរមន្ត្រី ថ្នាក់លេខ២ ពីអភិបាលនៃគណៈអភិបាលក្រុងកែប នៃខេត្តកែប កាលពីថ្ងៃទី១២ ខែមករា ឆ្នាំ២០២៤ ដើម្បីបើកផ្លូវឲ្យអង្គភាពប្រឆាំងអំពើពុ.ករលួ.យ អនុវត្តវិធានការតាមផ្លូវច្បាប់លើសំណុំរឿងអតីតអភិបាលក្រុងកែបនោះ៕
ចែករំលែកព័តមាននេះ