អាជ្ញាធរស្រុកមោងឬស្សី កាលពីព្រឹកថ្ងៃទី១៣ ខែមករា ឆ្នាំ២០២៤នេះ បានប្រឹងប្រែងនាំទឹកដែលមានចម្ងាយរាប់សិបគីឡូម៉ែត្រ ពីទំនប់ «កង្ហត» ស្ថិតនៅស្ទឹងសង្កែ ក្នុងស្រុកបាណន់ ដើម្បីយកទៅជួយសង្គ្រោះដំណាំស្រូវប្រាំង របស់ប្រជាកសិករជាង៥០០ហិចតា នៅក្នុងទឹកដី
ខេត្តបាត់ដំបង ៖ អាជ្ញាធរស្រុកមោងឬស្សី កាលពីព្រឹកថ្ងៃទី១៣ ខែមករា ឆ្នាំ២០២៤នេះ បានប្រឹងប្រែងនាំទឹកដែលមានចម្ងាយរាប់សិបគីឡូម៉ែត្រ ពីទំនប់ «កង្ហត» ស្ថិតនៅស្ទឹងសង្កែ ក្នុងស្រុកបាណន់ ដើម្បីយកទៅជួយសង្គ្រោះដំណាំស្រូវប្រាំង របស់ប្រជាកសិករជាង៥០០ហិចតា នៅក្នុងទឹកដី ឃុំតាលាស់ ដែលកំពុងប្រឈមនឹងគ្រោះមហន្តរាយ។
អភិបាលរងស្រុកមោងឬស្សី លោក បឿន សុវណ្ណ ដែលកំពុងដឹកនាំមន្ត្រីមូលដ្ឋាន ចុះពិនិត្យប្រព័ន្ធប្រឡាយទឹក បានប្រាប់ឱ្យដឹងថា ដោយយោងតាមការស្នើសុំទឹកសង្គ្រោះបន្ទាន់ពីប្រជាពលរដ្ឋ រួមទាំងអាជ្ញាធរស្រុក និងយោងទៅលើការចុះពិនិត្យជាក់ស្ដែងរបស់សម្ដេចក្រឡាហោម ស ខេង កាលពីប៉ុន្មានថ្ងៃមុនផង ដែលបានបង្អុលបង្ហាញ ទើបមន្ត្រីជំនាញគ្រប់គ្រងទឹកនៅទំនប់«កង្ហត» សម្រេចបើកបញ្ជូនទឹក ដើម្បីជួយសង្គ្រោះស្រូវប្រាំងរបស់ប្រជាកសិករ នៅតាមបណ្ដាឃុំមួយចំនួន ក្នុងស្រុកមោងឬស្សី ដែលខ្វះខាតទឹកស្រោចស្រប។
លោកអភិបាលរងស្រុកមោងឬស្សី បន្តថា ដោយឡែកស្រូវប្រាំងរបស់ពលរដ្ឋ នៅឃុំតាលាស ចំនួនជាង៥០០ហិចតា យើងទើបបានទទួលទឹក ដើម្បីជួយសង្គ្រោះនៅពេលនេះ។ ប្រហែលនៅរសៀលថ្ងៃទី១៣ ខែមករា ឆ្នាំ២០២៤ សន្ទុះទឹកអាចនឹងមកដល់ស្រែប្រាំងរបស់ពលរដ្ឋនៅឃុំតាលាស់ហើយ។
លោក បឿន សុវណ្ណ បានឲ្យដឹងទៀតថា សន្ទុះទឹកហាក់មានការយឹតយ៉ាវបន្តិច ដោយសារតែមានការលួ.ចស្ទាក់បូម លួ.ចបើកបង្ហូរចេញពីប្រឡាមេ ទៅកាន់កន្លែងផ្សេង និងមានជនខិលខូចមួយចំនួនបិទស្ទាក់ដាក់ឧបករណ៍យកត្រី។ ប៉ុន្តែទោះបីយ៉ាងណា លោកបានដឹកនាំកម្លាំងចុះស្រាវជ្រាវ និងអន្តររាគមន៍បើកទឹកឲ្យដំណើរការជាធម្មតាវិញហើយ។
លោក បឿន សុវណ្ណ បានបញ្ជាក់ដែរថា ស្រូវប្រាំងរបស់កសិករជាង៥០០ហិចតាខាងលើនេះ អាចប្រឈមនឹងការខូចខាត ប្រសិនបើមិនអាចនាំទឹកពីទំនប់«កង្ហត» នៅក្នុងស្រុកបាណន់ ដែលមានចម្ងាយជាង៥០គីឡូម៉ែត្រ មកជួយសង្គ្រោះមិនទាន់ពេលវេលាទេ។ ប៉ុន្ដែយ៉ាងណា នៅរសៀលថ្ងៃដដែលនេះ ទឹកនឹងចូលដល់ស្រែគ្រប់គ្រាន់ហើយ។
ពាក់ព័ន្ធនឹងការខ្វះខាតទឹកជួយសង្គ្រោះស្រូវប្រាំងរបស់ប្រជាកសិករ នៅក្នុងខេត្តបាត់ដំបងនេះ បើយោងតាមសេចក្ដីរាយការណ៍នានា បានប្រាប់ឲ្យដឹងថា ដំណាំស្រូវប្រាំងឆ្នាំនេះ ហាក់ប្រឈមនឹងគ្រោះមហន្តរាយខ្លាំងបំផុត ដែលកើតមានស្ទើរតែគ្រប់ទីកន្លែង ដោយសារតែខ្វះខាតទឹកស្រោចស្រប។ ជាពិសេសស្រុកចំនួន៣ ដែលគេពិនិត្យឃើញថា កំពុងប្រឈមនឹងគ្រោះរាំងស្ងួតនេះខ្លាំងជាងគេ គឺស្រុកមោងឬស្សី ស្រុកថ្មគោល និងស្រុកឯកភ្នំ។
ប៉ុន្តែក្រោយពីសម្ដេចក្រឡាហោម ស ខេង ដឹកនាំមន្ត្រីនានា ចុះពិនិត្យផ្ទាល់លើតំបន់ធ្វើស្រែប្រាំង ជាពិសេសនៅស្រុកមោងឬស្សីកាលពីប៉ុន្មានថ្ងៃមុន ទើបមន្ត្រីជំនាញសម្រេចបើកបញ្ជូនទឹកពីសំណង់ធារាសាស្ត្រ«កង្ហត» នៅស្រុកបាណន់ ទៅតាមប្រព័ន្ធប្រឡាយទឹក ដើម្បីជួយសង្គ្រោះស្រូវប្រាំងនៅតាមបណ្ដាស្រុកនានា។ ដោយឡែក ទឹកក្នុង «អាងកំពីងពួយ» ក៏ត្រូវបានបើកបញ្ជូនទឹកទៅជួយសង្គ្រោះស្រូវប្រាំងរាប់ពាន់ហិចតារបស់កសិករ នៅក្នុងស្រុកថ្មគោល និងស្រុកបាណន់ផងដែរ។ ប៉ុន្តែប្រភពទឹកទាំងនេះ ទំនងមិនអាចផ្គត់ផ្គង់ដល់ការបង្កបង្កើនផលស្រូវប្រាំងបន្តទៀតបានទេ។
នេះបើតាមការផ្ដល់ដំណឹងពីមន្ត្រីជំនាញ ដែលគ្រប់គ្រង់ទឹក ខណៈអាជ្ញាធរស្រុកថ្មគោល បានប្រកាសជូនដំណឹង ហាមឃាត់មិនអនុញ្ញាតឲ្យប្រជាកសិកររបស់ខ្លួន វា.យដីធ្វើស្រូវប្រាំងបន្តទៀតឡើយ បន្ទាប់ពីប្រមូលផលរួចនាពេលដ៏ឆាប់ខាងមុខនេះ ព្រោះគ្មានប្រភពទឹកគ្រប់គ្រាន់សម្រាប់ធ្វើស្រូវប្រាំងបន្តទៀតទេ៕
ចែករំលែកព័តមាននេះ