ជំនួបពិភាក្សាទ្វេភាគីរវាងលោកបណ្ឌិតសភាចារ្យសុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីនៃព្រះរាជាណាចក្រកម្ពុជា ជាមួយលោកស៊ូវីត គុណគិទី រដ្ឋមន្ត្រីក្រសួងធនធានធម្មជាតិ និងបរិស្ថានសៀម ក្រោមការសម្របសម្រួលរបស់អង្គការយូណេស្កូ នៅក្នុងទីក្រុងប៉ារីស ប្រទេសបារាំង កាលពីថ្ងៃទី២៥ ឧសភា កន្លងមក មានរយៈពេលជិត២ម៉ោង។ ជំនួបពិភាក្សានេះធ្វើឡើងនៅក្រៅវេទិកានៃកិច្ចប្រជុំរបស់អង្គការយូណេស្កូ ។
តាមប្រភពព័ត៌មានពីទីក្រុងប៉ារីសឱ្យដឹងថា ជំនួបពិភាក្សាទ្វេភាគីនេះពុំទទួលបានលទ្ធផលអ្វីឡើយ ដោយសារខាងភាគីថៃជាថ្មីម្តងទៀតស្នើដល់អង្គការយូណេស្កូ ពន្យារពេលពិភាក្សានិងពិចារណាលើផែនការគ្រប់គ្រងប្រាសាទព្រះវិហារជាឯកតោភាគីដែលដាក់ជូនដោយកម្ពុជា។ ជាមួយគ្នានេះ គេហទំព័រ MCOT របស់ថៃជាភាសាអង់គ្លេសផ្សាយឱ្យដឹងថា នៅថ្ងៃទី២៦ ឧសភា ថៃ និងកម្ពុជា បានឯកភាពគ្នាបន្តការពិភាក្សាគ្នាទៀត ស្តីអំពីបញ្ហាជម្លោះព្រំដែនរវាងប្រទេសទាំងពីររយៈពេលមួយថ្ងៃក្រោយពីភាគីទាំងពីរបរាជ័យក្នុងការដោះស្រាយជម្លោះបច្ចុប្បន្ន ។
គេហទំព័រដដែលបានផ្សាយឱ្យដឹងទៀតថា គណៈប្រតិភូថៃដែលដឹកនាំដោយលោកស៊ូវីត គុណគិទី រដ្ឋមន្ត្រីក្រសួងធនធានធម្មជាតិ និងបរិស្ថានបានបើកការពិភាក្សាជាមួយឧបនាយករដ្ឋមន្ត្រីកម្ពុជា លោកសុខ អាន ក្រោមការសម្របសម្រួលដោយអង្គការយូណេស្កូមុនពេលបើកកិច្ចប្រជុំរបស់អង្គការនេះ នៅក្នុងទីក្រុងប៉ារីស ។ ជំនួបពិភាក្សានេះមិនទទួលបានលទ្ធផលអ្វីទេ ក្រោយពីភាគីថៃបង្ហាញពីបំណងរបស់ខ្លួនឱ្យអង្គការយូណេស្កូពន្យារពេលពិចារណាលើផែនការគ្រប់គ្រងប្រាសាទព្រះវិហារ ដែលដាក់ដោយកម្ពុជារហូតដល់តុលាការយុត្តិធម៌អន្តរជាតិទីក្រុងឡាអេ (ICT) សម្រេចលើពាក្យបណ្តឹងរបស់កម្ពុជា ហើយរង់ចាំវឌ្ឍនភាពអំពីការកំណត់ព្រំដែននៅក្នុងកិច្ចប្រជុំគណៈកម្មាធិការព្រំដែនទូទៅ (GBC) ។ សូមរំឭកឡើងវិញថា កាលពីខែមុន កម្ពុជាបានស្នើដល់តុលាការយុត្តិធម៌អន្តរជាតិ (ICJ) បកស្រាយការសម្រេចរបស់ខ្លួននៅឆ្នាំ១៩៦២ ស្តីអំពីបញ្ហាប្រាសាទព្រះវិហារនៅតំបន់ព្រំដែនមានជម្លោះជាមួយប្រទេសថៃ ។
តាមប្រភពព័ត៌មានពីទីក្រុងប៉ារីសឱ្យដឹងទៀតថា ក្រោយពីជំនួបពិភាក្សាទ្វេភាគីរវាងលោកឧបនាយករដ្ឋមន្ត្រីសុខ អាន ជាមួយលោកស៊ូវីត មិនទទួលបានលទ្ធផលអ្វី អគ្គនាយកអង្គការយូណេស្កូ លោកស្រីអ៊ីរីណា បូកូវ៉ា (Irina Bokova) បានស្នើដល់លោកឧបនាយករដ្ឋមន្ត្រីសុខ អាន និងលោកគុន គិទី ជួបពិភាក្សាជាមួយលោកស្រីដាច់ដោយឡែកពីគ្នានៅថ្ងៃទី២៦ ឧសភា ដើម្បីបង្ហាញ និងស្រាយបំភ្លឺអំពីគោលជំហររៀងខ្លួនរបស់ភាគីទាំងពីរ ហើយក្រោយមកលោកស្រីនឹងបង្ហាញពីដំណោះស្រាយចំពោះភាគីទាំងពីរ ។
លោកបណ្ឌិតសភាចារ្យសុខ អាន បានដឹកនាំគណៈប្រតិភូកម្ពុជាទៅចូលរួមកិច្ចប្រជុំអង្គការយូណេស្កូនោះដើម្បីបង្ហាញឯកសារជាភស្តុតាងស្តីអំពីការខូចខាតប្រាសាទព្រះវិហារបង្កឡើងដោយទាហានឈ្លានពានសៀមជូនអង្គការយូណេស្កូ ។ ប៉ុន្តែបណ្តាញព័ត៌មានថៃបានចេញផ្សាយដោយដកស្រង់សម្តីលោកអាប់ភីស៊ី វ៉េចាជីវ៉ា នាយករដ្ឋមន្ត្រីចាំផ្ទះថៃ ដែលថ្លែងអះអាងថា ថៃមិនបានបង្កការខូចខាតដល់ប្រាសាទព្រះវិហារទេ ។
តាមសេចក្តីរាយការណ៍ថា លោកស៊ូវីត ថ្លែងថា «យើងគួរតែបញ្ឈប់ការប្រយុទ្ធគ្នា ហើយសហការគ្នាដើម្បីទទួលបានការកំណត់ព្រំដែនតាមរយៈកិច្ចប្រជុំគណៈកម្មាធិការព្រំដែន ដែលត្រូវដោះស្រាយ ហើយកម្ពុជានឹងមានសិទ្ធិធ្វើអ្វីដែលខ្លួនចង់ធ្វើនៅលើដីរបស់ខ្លួន»។ ក្នុងដំណើរការវិវឌ្ឍន៍មួួយទៀតដែលទាក់ទងទៅនឹងប្រទេសកម្ពុជា និងប្រទេសថៃដែរ រដ្ឋមន្ត្រីក្រសួងការពារជាតិថៃ លោកប្រាវីត វង្សសុវ៉ាន់ ថ្លែងនៅថ្ងៃទី២៦ ឧសភា ថា កិច្ចប្រជុំគណៈកម្មាធិការព្រំដែនទូទៅ (GBC) កម្ពុជា-ថៃ នឹងប្រព្រឹត្តទៅតាមការគ្រោងទុក ប៉ុន្តែកិច្ចប្រជុំនេះនឹងរៀបចំឡើងក្រោយពីប្រទេសឥណ្ឌូណេស៊ីបញ្ជូនក្រុមវាយតម្លៃមកកាន់តំបន់មានជម្លោះព្រំដែនរវាងប្រទេសទាំងពីរថៃ-កម្ពុជា ។ប៉ុន្តែទោះបីជាបែបណា មន្ត្រីជាន់ខ្ពស់កម្ពុជាបានច្រានចោលការលើកឡើងរបស់រដ្ឋមន្ត្រីការពារជាតិសៀមរូបនេះ ព្រោះថា ថៃត្រូវតែចុះហត្ថលេខាលើដំណោះស្រាយជាកញ្ចប់ជាមុនសិនដែលសម្រេចបានក្នុងអំឡុងពេលនៃកិច្ចប្រជុំត្រីភាគីរវាងប្រមុខការទូតកម្ពុជា លោកឧបនាយករដ្ឋមន្ត្រីហោ ណាំហុង និងប្រមុខការទូតថៃ លោកកាស៊ីត ភីរម្យ និងប្រមុខការទូតឥណ្ឌូណេស៊ី លោកម៉ាទី ណាតាឡេហ្គាវ៉ា នៅក្នុងទីក្រុងហ្សាការតា រដ្ឋធានីឥណ្ឌូណេស៊ី កាលពីថ្ងៃទី៩ ឧសភា កន្លងមក ៕
ចែករំលែកព័តមាននេះ