ខេត្តកំពង់ធំ ៖ កោះសន្តិភាពធ្លាប់បានចុះផ្សាយរួចមកហើយ ពីសកម្មភាពកា.ប់រានព្រៃឈើយ៉ាងអនាធិបតេយ្យដើម្បីយកដីនៅក្នុងស្រុកសណ្ដាន់ ក្រោមការបំលែងរូបភាពពីបទល្មើសទៅជារូបភាពស្របច្បាប់ ដោយមានអ្នកមានអំណាច និងអ្នកមានលុយនៅពីក្រោយ។ រហូតមកដល់ពេលនេះ បើទោះបីជាមានការអះអាងពីសំណាក់មន្ត្រីជំនាញថា
ខេត្តកំពង់ធំ ៖ កោះសន្តិភាពធ្លាប់បានចុះផ្សាយរួចមកហើយ ពីសកម្មភាពកាប់រានព្រៃឈើយ៉ាងអនាធិបតេយ្យដើម្បីយកដីនៅក្នុងស្រុកសណ្ដាន់ ក្រោមការបំលែងរូបភាពពីបទល្មើសទៅជារូបភាពស្របច្បាប់ ដោយមានអ្នកមានអំណាច និងអ្នកមានលុយនៅពីក្រោយ។ រហូតមកដល់ពេលនេះ បើទោះបីជាមានការអះអាងពីសំណាក់មន្ត្រីជំនាញថា បានចាត់វិធានការយ៉ាងក្ដៅគគុកហើយក៏ដោយ ប៉ុន្តែយោងលើប្រភពព័ត៌មានបានបង្ហើបឲ្យដឹងថា បន្ទាប់ពីមានភ្លៀងធ្លាក់ជាបន្តបន្ទាប់ ប្រជាពលរដ្ឋនៅតំបន់ដីក្រហមស្រុកសណ្ដាន់បាននាំគ្នាកាប់រានដីព្រៃ និងសំអាតដីព្រៃដែលបានលួចកាប់រាននាពេលកន្លងមកដើម្បីដាំដំឡូងមី និងដំណាំឧស្សាហកម្មជាច្រើនទៀត។ កត្តានេះបានជំរុញឲ្យកើតមានសកម្មភាពបទល្មើសកាប់ទន្ទ្រានព្រៃយកដីធ្វើជាកម្មសិទ្ធិកាន់តែខ្លាំងឡើងៗ ដោយពុំមានសមត្ថកិច្ចជំនាញនិងអាជ្ញាធរមូលដ្ឋានណាចាប់អារម្មណ៍ ឬចាត់វិធានការទប់ស្កាត់ឡើយ ។
ផ្អែកលើភាពអនាធិបតេយ្យនៃការកាប់ព្រៃឈើដើម្បីទន្ទ្រានយកដីនេះ ថ្មីៗកន្លងទៅអាជ្ញាធរខេត្តបានចេញលិខិតមួយជូនទៅលោកអភិបាលស្រុកសណ្ដាន់ និងអង្គភាពពាក់ព័ន្ធឲ្យធ្វើការសហការនិងចាត់វិធានការតឹងរ៉ឹងបំផុត ដើម្បីទប់ស្កាត់រាល់បទល្មើសនានាលើវិស័យព្រៃឈើ និងការពារដីរបស់រដ្ឋ។ តាមប្រភពព័ត៌មានពីមន្ត្រីសាលាខេត្តបានឲ្យដឹងថា កាលពីថ្ងៃទី១២ ឧសភា ឆ្នាំ២០១១ លោកអភិបាលខេត្តបានចេញលិខិតមួយច្បាប់លេខ៧៤ ស.ជ.ណ ជម្រាបជូនទៅលោកអភិបាលស្រុកសណ្ដាន់ ឱ្យចាត់វិធានការទប់ស្កាត់បទល្មើស និងសកម្មភាពអនាធិបតេយ្យលើវិស័យព្រៃឈើទន្ទ្រានយកដីធ្វើកម្មសិទ្ធិ ដោយផ្អែកលើបទបញ្ជាលេខ០១ ប ប ចុះថ្ងៃទី១០ ឧសភា ឆ្នាំ២០០៩ របស់រាជរដ្ឋាភិបាលកម្ពុជា និងកំណត់ហេតុចុះថ្ងៃទី១ មេសា ២០១១ របស់សាលាខេត្តកំពង់ធំ។ ពិសេសដីនៅតំបន់អូរគ្រញូង ភូមិរំចេក ឃុំសុចិត្រ ស្រុកសណ្ដាន់ ព្រោះថា កន្លងមកដីនៅតំបន់នេះរងការកាប់រានយ៉ាងរង្គាលពីសំណាក់ប្រជាពលរដ្ឋ ។
ទាក់ទងនឹងការលើកឡើងខាងលើនេះមានប្រភពព័ត៌មានបង្ហើបឲ្យដឹងថា មិនមែនមានតែព្រៃតំបន់នេះទេ ពោលគឺមាននៅព្រៃតំបន់ព្រះអាទិត្យព្រៃតំបន់រន្ទះ ព្រៃក្នុងភូមិសាស្ត្រឃុំសុចិត្រ និងតំបន់ជាច្រើនទៀតក្នុងស្រុកសណ្ដាន់ក៏សុទ្ធតែមានការកាប់ទន្ទ្រានដែរ។ ឆ្លើយតបទៅនឹងចំណាត់ការខាងលើនេះ មន្ត្រីរដ្ឋបាលព្រៃឈើខេត្តនិយាយថា កន្លងមកករណីនេះសមត្ថកិច្ចជំនាញតែងធ្វើការផ្សព្វផ្សាយពីច្បាប់ និងបោះបង្គោលហាមឃាត់លើដីទាំងនោះរួចហើយ ប៉ុន្តែពេលដែលសមត្ថកិច្ចជំនាញដកហូតពួកគាត់អះអាងថា ដីរបស់អ្នកនេះរបស់អ្នកនោះ ។
ចំណែកមន្ត្រីអាជ្ញាធរស្រុកសណ្ដាន់ក៏បាននិយាយដែរថា កន្លងមកពាក់ព័ន្ធនឹងករណីនេះ អាជ្ញាធរស្រុកមិនដែលលូកដៃឡើយ។ ការឆ្លើយដាក់គ្នា ដើម្បីយករួចខ្លួននេះ ធ្វើឲ្យមានការរិះគន់យ៉ាងខ្លាំង ខណៈដែលភាពអនាធិបតេយ្យនៃការកាប់ព្រៃទន្ទ្រានយកដីធ្វើកម្មសិទ្ធិកាន់តែរីករាលដាលយ៉ាងក្ដៅគគុក ហើយគេរង់ចាំមើលថា តើចំណាត់ការរបស់អាជ្ញាធរខេត្ត នឹងមានប្រសិទ្ធភាពកម្រិតណាចំពោះពួកអ្នកមានលុយ និងអ្នកមានឥទ្ធិពលដែលចូលចិត្តយកប្រជាពលរដ្ឋធ្វើជាខែលនោះ ៕
ចែករំលែកព័តមាននេះ