ខេត្តពោធិ៍សាត់ ៖ កូនអណ្ដើកស្រែ អណ្ដើកបិទមុខ ឬអណ្ដើកក្បាលធំ សរុបចំនួន៥៥ក្បាលដែលលោក ខូយ រីដា អភិបាលនៃគណៈអភិបាលខេត្តពោធិ៍សាត់ ប្រគល់ជូនសហគមន៍នេសាទស្រីចឹក បានធ្វើពិធីលែងក្នុងតំបន់អភិរក្សត្រីមេពូជព្រែកតាចាន់ ក្នុងភូមិសាស្ត្រព្រៃរនាមបឹងទន្លេសាប ស្ថិតក្នុងភូមិតាម៉ៅ ឃុំកញ្ជរ ស្រុកកណ្ដៀង ខេត្តពោធិ៍សាត់ ដើម្បីចូលរួមថែរក្សាការពារធនធានជលផលឲ្យនៅគង់វង្ស និងបង្កើនរីកសាយឲ្យកាន់តែច្រើនឡើងថែមទៀតទៅថ្ងៃអនាគត។
ការព្រលែងសត្វអណ្ដើកនេះ បានធ្វើឡើងកាលពីថ្ងៃទី៩ ខែមករា ឆ្នាំ២០២៤ ដោយមានការចូល
រួមពីលោក អ៊ន ផល្លា អភិបាលរងនៃគណៈអភិបាលស្រុកណ្ដៀង, លោក ហុក ម៉េងអាន នាយរងផ្នែករដ្ឋបាលជលផលក្រគរ នាយសង្កាត់រដ្ឋបាលជលផលកណ្ដៀង មេឃុំកញ្ជរ ប៉ុស្ដិនគរបាលរដ្ឋបាល គណៈកម្មការសហគមន៍នេសាទស្រីចឹក និងប្រជាពលរដ្ឋផងដែរ។
លោក ឌុក សុខា ប្រធានសហគមន៍នេសាទស្រីចឹកបានប្រាប់ឲ្យដឹងថា នេះជាលើកទី២ហើយដែលលោក ខូយ រីដា អភិបាលនៃគណៈអភិបាលខេត្តពោធិ៍សាត់ ប្រគល់សត្វអណ្ដើកជូនសហគមន៍នេសាទស្រីចឹក យកមកព្រលែងក្នុងតំបន់អភិរក្សត្រីមេពូជព្រែកតាចាន់ សរុបទាំង២លើកនេះជិត៣០០ក្បាលហើយ។ កូនអណ្ដើកទាំងនេះបានមកពីប្រជាពលរដ្ឋស្រុកក្រគរ ស្រុកកណ្ដៀង និងស្រុកបាកាន យកមកប្រគល់ឲ្យរូបលោក ព្រោះដឹងថាលោកជាអភិបាលខេត្ត ដែលមានសន្តានចិត្តគិតគូរ ថែរក្សា និងអភិរក្សសត្វអណ្ដើក ដែលជាសត្វកម្រនិងជិតផុតពូជ ដោយសារតែជនប្រព្រឹត្តបទល្មើស ។
លោកមានមោទនភាពណាស់ ដែលអភិបាលខេត្តផ្ដល់អាទិភាព និងមានទំនុកចិត្តមកលើសហគមន៍នេសាទស្រីចឹក ស្រុកកណ្ដៀង ក្នុងចំណោមសហគមន៍នេសាទជាច្រើនទៀត ក្នុងខេត្តពោធិ៍សាត់ ។
លោកឲ្យដឹងថា សហគមន៍នេសាទស្រីចឹកមានផ្ទៃដីទទឹងប្រវែង៤៥ម៉ែត្រ បណ្ដោយ១៦០០ម៉ែត្រ ស្មើនឹងប្រមាណ០៧ហិកតា។ ក្នុងទឹកមានដាក់លូសិប្បនិមិត្ត គល់ឈើធំៗនិងបង្គោលជ្រុំ នៅជុំវិញមានព្រៃរនាមដុះស្នាប់តាមមាត់ព្រែក ដែលជាជម្រកត្រីពងកូនរស់នៅយ៉ាងសុខសាន្ត។
លោកប្រធានសហគមន៍ បានថ្លែងអំណរគុណយ៉ាងជ្រាលជ្រៅ ចំពោះលោក ខូយ រីដា អភិបាលនៃគណៈអភិបាលខេត្តពោធិ៍សាត់ ដែលលោកតែងតែគិតគូរផលប្រយោជន៍ជាតិ និងទុក្ខលំបាកប្រជាជនជាធំ។ លោកនឹងខិតខំការពារសត្វអណ្ដើកទាំងនេះឲ្យនៅគង់វង្ស ហើយបានអំពាវនាវដល់បងប្អូនប្រជាពលរដ្ឋ ជួយថែរក្សាការពារធនធានជលផលឲ្យនៅគង់វង្សទាំងអស់គ្នា ៕
ចែករំលែកព័តមាននេះ