រាជធានីភ្នំពេញ ៖ ដោយអនុវត្តតាមបទបញ្ជារបស់ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីថ្ងៃទី០៥ ខែមករា ឆ្នាំ២០២៤ កម្លាំងជំនាញ ដឹកនាំបញ្ជាផ្ទាល់ដោយលោកឧត្តមសេនីយ៍ត្រី គល់ យី ស្នងការរង ទទួលផែនការងារប្រឆាំងគ្រឿងញៀន បានធ្វើការស្រាវជ្រាវបង្ក្រាបឃាត់ខ្លួនជនសង្ស័យឈ្មោះ ចូវ ប៉ាវ ភេទប្រុស អាយុ៣៧ឆ្នាំ ជនជាតិចិន ជាមុខសញ្ញាម្នាក់ ក្នុងចំណោមបក្ខពួកចំនួន៥នាក់ ជនជាតិចិនទាំងអស់ តាមដីកាបង្គាប់ឱ្យចាប់ខ្លួនរបស់លោកចៅក្រមស៊ើបសួរ តុប ឈុនសុង នៅចំណុចបន្ទប់លេខ៧០១ ជាន់ទី៧ ខុនដូ Star City ផ្លូវសហព័ន្ធរុស្សី ភូមិទ្រុងមាន់ សង្កាត់អូរបែកក្អម ខណ្ឌសែនសុខ ដែលកម្លាំងជំនាញបានបង្ក្រាបកាលពីថ្ងៃទី១៩ ខែធ្នូ ឆ្នាំ២០២៣ ដោយបានឃាត់ខ្លួនជនសង្ស័យម្នាក់បញ្ជូនទៅតុលាការ ចាត់ការតាមនីតិវិធីរួចនោះហើយ ។
ការបង្ក្រាបនេះ ដកហូតសារធាតុញៀនចម្រុះ ប្រភេទម្សៅ និងថ្នាំគ្រាប់ចំនួន ២,១២៥ គ្រាប់ សរុបទម្ងន់៤ គីឡូ និង៦៦៣ក្រាម, សារធាតុផ្សំផលិតគ្រឿងញៀនចម្រុះ ទម្ងន់ ២១គីឡូ និង៥០៣ក្រាម, សម្ភារៈ ឧបករណ៍ផលិតគ្រឿង ញៀនមួយចំនួនធំទៀត។
បន្ទាប់ពីឃាត់ខ្លួនជនសង្ស័យខាងលើ កម្លាំងជំនាញក៏បានឆែកឆេរត្រះតពិនិត្យចំនួន ២បន្ទប់ រួមមាន ៖
-គោលដៅទី១ ៖ ថ្ងៃទី០៨ ខែមករា ឆ្នាំ២០២៤ បន្ទាប់លេខ B1903 ជាន់ទី១៩ ខុនដូ Urban Village ផ្លូវ៦០ម៉ែត្រ ភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ ដកហូតសារធាតុញៀនប្រភេទ អ៊ិចស្តាស៊ី និងមេតំហ្វេតាមីន និងថ្នាំគ្រាប់៤៨គ្រាប់ សរុបទម្ងន់ ១៦៩,៦៤ក្រាម។
-គោលដៅទី២៖ ថ្ងៃទី១០ ខែមករា ឆ្នាំ២០២៤ ឆែកឆេរបន្ទប់លេខ 3207 ជាន់ទី៣២ ខុនដូ R&F City ផ្លូវ៦០ម៉ែត្រ ភូមិព្រែកតានូ២ សង្កាត់ចាក់អង្រែលើ ខណ្ឌមានជ័យ ដកហូតសារធាតុញៀន និងថ្នាំគ្រាប់ចំនួន១៨១០គ្រាប់ និងសារធាតុផ្សំផលិតគ្រឿងញៀនជាច្រើនមុខទម្ងន់សរុប ប្រហែល១០គីឡូ និងសម្ភារ:ឧបករណ៍ផលិតកែឆ្នៃមួយចំនួន ។
សរុបរួម ករណីបង្ក្រាបទាំង២លើក ឃាត់បានជនសង្ស័យជនជាតិចិនចំនួន ០២នាក់ មុខសញ្ញាមានដីកាចាប់ខ្លួននៅសល់ ៤នាក់ទៀត និងដកហូតសារធាតុញៀនសរុប ៖ ថ្នាំញៀនចម្រុះ និងគ្រាប់ចំនួន៣,៩៨៣គ្រាប់ មានទម្ងន់ជិត ៦គីឡូ និងសារធាតុផ្សំផលិតគ្រឿងញៀនទម្ងន់ជាង ៣០គីឡូ ។
បច្ចុប្បន្នកម្លាំងជំនាញធ្វើការសាកសួរបន្ត និងរៀបចំវេចខ្ចប់វត្ថុតាងបញ្ជូនទៅតុលាការ ចាត់ការតាមផ្លូវច្បាប់ ៕
ចែករំលែកព័តមាននេះ