បរទេស ៖ ទ្វារយន្តហោះ Boeing 737 Max 9 ដែលបានដាច់ចេញពីយន្តហោះកំឡុងពេលកំពុងតែហោះហើរក្នុងរយៈកម្ពស់៥០០០ម៉ែត្រ កាលពីថ្ងៃទី៥ ខែមករា នោះ ពេលនេះត្រូវបានគេរកឃើញហើយ គឺនៅខាងក្រោយផ្ទះគ្រូបង្រៀនម្នាក់ ស្ថិតក្នុងទីក្រុង Portland។
បើតាមអ្នកស្រី Jennifer Homendy ប្រធានក្រុមប្រឹក្សាសុវត្ថិភាពដឹកជញ្ជូនជាតិសហរដ្ឋអាមេរិក បាននិយាយប្រាប់សារព័ត៌មានរ៉យទ័រ ឱ្យដឹងថា «បន្ទះទ្វារនេះ ត្រូវបានរកឃើញវិញកាលពីថ្ងៃអាទិត្យ ដោយគ្រូបង្រៀនម្នាក់នៅក្នុងទីធ្លាខាងក្រោយផ្ទះរបស់គាត់ ស្ថិតក្នុងសង្កាត់ Cedar Hills ទីក្រុង Portland រដ្ឋអូរីហ្គោន សហរដ្ឋអាមេរិក»។
អ្នកស្រី Jennifer Homendy បន្តថា «ក្រោយឧបទេវហេតុរបើកផ្ទាំងបង្អួចចេញពីយន្តហោះនេះ ក្រុមប្រឹក្សាសុវត្ថិភាពដឹកជញ្ជូនជាតិសហរដ្ឋអាមេរិក បានបញ្ជូនមន្ត្រីទៅត្រួតពិនិត្យយន្តហោះរបស់ក្រុមហ៊ុនអាកាសចរណ៍ Alaska Airlines ខណៈអាជ្ញាធរត្រួតពិនិត្យរបស់សហរដ្ឋអាមេរិក បានសម្រេចផ្អាកប្រតិបត្តិការហោះហើរ នៃយន្តហោះដឹកអ្នកដំណើរ Boeing 737 MAX 9 មួយចំនួន ដើម្បីឆែកមើលសុវត្ថិភាព»។
គួររំលឹកថា កាលពីថ្ងៃសុក្រ បង្អួចមួយផ្ទាំងនៅផ្នែកខាងឆ្វេងនៃតួខ្លួនយន្តហោះ Boeing 737 MAX 9 មួយគ្រឿងរបស់ក្រុមហ៊ុនអាកាសចរណ៍ Alaska Airlines បានប៉ើងរបើកបាត់ពីយន្តហោះ ក្រោយពីហោះឡើងមិនបានយូរប៉ុន្មាន ចេញពីទីក្រុង Portland រដ្ឋ Oregon សំដៅឆ្ពោះទៅកាន់ទីក្រុង Ontario រដ្ឋ California ក្នុងរយៈកម្ពស់៥០០០ម៉ែត្រ ជាហេតុបង្ខំឱ្យក្រុមអាកាសយានិក បញ្ជាយន្តហោះបកក្បាលត្រឡប់ទៅក្រោយវិញ។
តាមរយៈរូបភាពពីអ្នកដំណើរនៅលើនោះ បានបង្ហាញឱ្យឃើញទ្វារយន្តហោះមួយរបូតចេញពីយន្តហោះ ខណៈមានអ្នកដំណើរចំនួន១៧១នាក់ និងសមាជិកក្រុមយានិកចំនួន៦នាក់នៅលើនោះ ។ ក្រោយពីទ្វាររបូត ក្នុងយន្តហោះមានខ្យល់កួច បណ្ដាលឲ្យអ្នកដំណើរមានការភ័យខ្លាចយ៉ាងខ្លាំង ប៉ុន្តែជាសំណាងល្អ ខណៈពេលទ្វាររបូតនោះពុំមានមនុស្សណាម្នាក់នៅជាប់មាត់ទ្វារនោះឡើយ ហើយក្រោយមកយន្តហោះនោះក៏បានចុះចតបន្ទាន់ដោយសុវត្ថិភាព។
ក្រុមអ្នកស៊ើបអង្កេត បានបញ្ជាក់ថា ក្រុមហ៊ុនអាកាសចរណ៍ Alaska Airlines ទើបតែទទួលបានយន្តហោះ Boeing ដែលរបូតទ្វារនេះ កាលពីខែតុលាប៉ុណ្ណោះ ហើយបើគិតមកដល់ពេលដែលយន្តហោះកើតមានបញ្ហាខាងលើ គឺយន្តហោះនេះទើបតែដំណើការហោះហើរបានត្រឹមតែ៨សប្តាហ៍តែប៉ុណ្ណោះ។
ក្រោយការស៊ើបអង្កេតបឋម រកឃើញថា ខ្ចៅយន្តហោះ Boeing 737 MAX 9 ភាគច្រើន គឺរលុង។ ហើយក៏មានសេចក្តីរាយការណ៍ទៀតថា ក្រុមហ៊ុនអាកាសចរណ៍ United Airlines ក៏បានរកឃើញខ្ចៅទ្វារយន្តហោះរលុងដូចគ្នាដែរ ហើយបញ្ហានេះកំពុងស្ថិតក្រោមការស៊ើបអង្កេតបន្ថែមទៀត។
បញ្ហាមួយទៀត ដែលរងការរិះគន់ គឺប្រអប់ខ្មៅសម្រាប់ថតសំឡេងក្នុងកាប៊ីនយន្តហោះមិនមានព័ត៌មានអ្វីទាំងនោះក្នុងអំឡុងពេលកើតហេតុ ដោយសារតែទិន្នន័យទាំងអស់នឹងត្រូវបានលុបចោលដោយស្វ័យប្រវត្តិរៀងរាល់២ម៉ោងម្តង។ បញ្ហានេះ ធ្វើឲ្យមានការអំពាវនាវឲ្យអាមេរិក គិតគូរឡើងវិញពីស្តង់ដារនៃការថតសំឡេងរបស់ប្រអប់ខ្មៅ ដែលគួរតែរក្សាទុកទិន្និន័យទាំងអស់អោយយូរដល់២៥ម៉ោង ស្រដៀងនឹងស្តង់ការនៅអឺរ៉ុប។
គិតត្រឹមថ្ងៃទី៧ ខែមករា ឆ្នាំ២០២៤ ក្រុមហ៊ុនអាកាសចរណ៍ Alaska Airlines បានលុបចោលជើងហោះហើរចំនួន ១៧០ ដែលប៉ះពាល់ដល់អ្នកដំណើរចំនួន ២៥,០០០នាក់ ខណៈដែល United Airlines បានលុបចោលជើងហោះហើរចំនួន ២៣០ ឬ ៨ភាគរយនៃជើងហោះហើរទាំងអស់ដែលបានគ្រោងទុក។
គួររំលឹកថា កាលពី៥ឆ្នាំមុន យន្តហោះប្រភេទ MAX របស់ក្រុមហ៊ុន Boeing ធ្លាប់ត្រូវបានដាក់ឱ្យបញ្ឈរជើងនៅទូទាំងពិភពលោក អស់រយៈពេលប្រហែល២០ខែ ក្រោយករណីធ្លាក់យន្តហោះប្រភេទនេះ ចំនួន២គ្រឿង ហើយបានផ្តាច់ជីវិ.តមនុស្សសរុបជិត៣៥០នាក់ នៅឯប្រទេសអេត្យូពី និងឥណ្ឌូណេស៊ី៕
អត្ថបទដោយ ៖ អោម ចែតច័ន្ទណារ៉ា
ចែករំលែកព័តមាននេះ