រាជធានីភ្នំពេញ ៖ ព្រះរាជអាជ្ញាអមសាលាដំបូងខេត្តព្រៃវែងពុំព្រមផ្ទេរសមត្ថកិច្ចដោះស្រាយរឿងក្តីរំលោ.ភលើសេចក្តីទុកចិត្តដែលមានអគ្គនាយិកាគ្រឹះស្ថានហ្គ្រីនសេនត្រលម៉ាយក្រូហ្វាយ នែន អិលធីឌី ជាដើមបណ្តឹង និងនាយកគ្រប់គ្រងទូទៅនៃគ្រឹះស្ថានមីក្រូហិរញ្ញវត្ថុ ម្លិះហ្វាយនែន អិលធីឌី ជាចុងចោទមកសាលា ដំបូងរាជធានីភ្នំពេញ
រាជធានីភ្នំពេញ ៖ ព្រះរាជអាជ្ញាអមសាលាដំបូងខេត្តព្រៃវែងពុំព្រមផ្ទេរសមត្ថកិច្ចដោះស្រាយរឿងក្តីរំលោភលើសេចក្តីទុកចិត្តដែលមានអគ្គនាយិកាគ្រឹះស្ថានហ្គ្រីនសេនត្រលម៉ាយក្រូហ្វាយ នែន អិលធីឌី ជាដើមបណ្តឹង និងនាយកគ្រប់គ្រងទូទៅនៃគ្រឹះស្ថានមីក្រូហិរញ្ញវត្ថុ ម្លិះហ្វាយនែន អិលធីឌី ជាចុងចោទមកសាលា ដំបូងរាជធានីភ្នំពេញ ដើម្បីចាត់ការតាមលិខិតរបស់រដ្ឋមន្ត្រីក្រសួងយុត្តិធម៌ឡើយ ។
ចំពោះបញ្ហានេះ បានត្រូវមជ្ឈដ្ឋានអ្នកច្បាប់យល់ឃើញថា ហាក់ដូចជាមានអាថ៌កំបាំងអ្វីមួយព្រោះតាមការពិត ការផ្ទេរសមត្ថកិច្ចដោះ ស្រាយរឿងក្តី ពុំមានអ្វីសំខាន់នោះទេ ដោយ គ្រាន់តែបញ្ជូនសំណុំរឿងទៅជាការស្រេច លើកលែងរឿងក្តីនេះមានប្រយោជន៍ធំណាស់ ទើបព្រះរាជអាជ្ញាពុំព្រមខ្ជាក់សោះបែបនេះ ។
ដោយយោងតាមពាក្យសុំផ្ទេរសមត្ថកិច្ចរបស់លោកហ៊ុន សុភ័ក្រ្ត មុខរបរនាយកគ្រប់គ្រងទូទៅនៃគ្រឹះស្ថានមីក្រូហិរញ្ញវត្ថុម្លិះហ្វាយ នែន អិលធីឌី នៅថ្ងៃទី៣១ មីនា ឆ្នាំ២០១១ លោកអង្គ វង្សវឌ្ឍនា រដ្ឋមន្ត្រីក្រសួងយុត្តិធម៌ បានចេញលិខិតលេខ៥៣៩កយ-ព្រទ/១១ ជម្រាបមកលោកព្រះរាជអាជ្ញាអមសាលាដំបូងខេត្តព្រៃវែងដែលមានកម្មវត្ថុចែងអំពីសំណើរបស់លោកហ៊ុន សុភ័ក្ត្រ សុំផ្ទេរសមត្ថកិច្ចសំណុំ រឿងព្រហ្មទណ្ឌលេខ៥៦ ចុះថ្ងៃទី៣១ មករា ឆ្នាំ ២០១១ របស់អយ្យការអមសាលាដំបូងខេត្តព្រៃវែង ។
ក្នុងលិខិតនេះ លោករដ្ឋមន្ត្រីបានបញ្ជាក់ថា លោកហ៊ុន សុភ័ក្ត្រ បានលើកភស្តុតាងសំអាងហេតុផលថា ឈ្មោះ AI-CHA-CHENG-CHOI ដែលជាដើមបណ្តឹងមានអាសយដ្ឋាននៅភ្នំពេញ អគារលេខ 640E-F ផ្លូវលេខ២៧១ សង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ។ ចំណែករូបលោកហ៊ុន សុភ័ក្ត្រ មានអាសយដ្ឋានចុងក្រោយនៅភ្នំពេញដែរ គឺផ្ទះលេខ 181GA ផ្លូវលេខ 113R ភូមិទួលសង្កែ សង្កាត់ទួលសង្កែ ខណ្ឌប្ញស្សីកែវ ។ រីឯទីកន្លែងកើតហេតុដែលដើមបណ្តឹងចាត់ទុកថា បានប្រព្រឹត្តបទល្មើស ក៏នៅភ្នំពេញដែរ គឺគ្រឹះស្ថានមីក្រូហិរញ្ញវត្ថុហ្គ្រីនសេនត្រល ម៉ាយក្រូហ្វាយនែន អគារដែលដើមបណ្តឹងកំពុងស្នាក់នៅ ។
លោករដ្ឋមន្ត្រីក្រសួងយុត្តិធម៌បានអះអាងក្នុងលិខិតនេះថា បើពិនិត្យតាមពាក្យបណ្តឹងឯកសារពាក់ព័ន្ធ និងដោយយោងតាមមាត្រា៣៩-១២៣-២៩០ នៃក្រមនីតិវិធីព្រហ្មទណ្ឌឃើញថា ភាគីទំនាស់មានអាសយដ្ឋាននៅរាជធានីភ្នំពេញ ដូចគ្នាទីកន្លែងកើតហេតុស្ថិតនៅរាជធានីភ្នំពេញ ដែរ ។ ដូច្នេះគួរតែជាសមត្ថកិច្ចរបស់សាលាដំបូងរាជធានីភ្នំពេញដែលជាអ្នកចាត់ការ ។
រយៈពេល៧ថ្ងៃក្រោយមក ពោលគឺនៅថ្ងៃទី៧ មេសា ឆ្នាំ២០១១ ដោយ ឃើញលោកកើត វណ្ណារ៉េត ព្រះរាជអាជ្ញាអមសាលាដំបូងខេត្តព្រៃវែង នៅតែបន្តនីតិវីធីចាត់ការសំណុំរឿងនេះហើយពុំព្រមបង្វែរសមត្ថកិច្ចមកអយ្យការអមសាលាដំបូងរាជធានីភ្នំពេញតាមលិខិតរបស់រដ្ឋមន្ត្រីក្រសួងយុត្តិធម៌នោះ លោកមេធាវីការពារសិទ្ធិ និងផលប្រយោជន៍ស្របច្បាប់របស់លោកហ៊ុន សុភ័ក្ត្រ បានដាក់ពាក្យបណ្តឹងមកប្រធានសាលាឧទ្ធរណ៍ ដើម្បីសុំមោឃភាពនីតិវិធីនៅសមត្ថកិច្ចអយ្យការអមសាលាដំបូងខេត្តព្រៃវែង ដោយក្នុងលិខិតនោះបានបញ្ជកា់ថា «សុំមោឃភាពកិច្ច ដែលធ្វើឡើងដោយអយ្យការអមសាលាដំបូងខេត្តព្រៃវែងចាប់ពីថ្ងៃទី៥ មេសា ឆ្នាំ២០១១ ចេញចោល» ។
យោងតាមពាក្យបណ្តឹងនេះ នៅថ្ងៃទី១១ មេសា ឆ្នាំ២០១១ លោកប៉ុន សាវ៉ាត់ នាយកក្រឡាបញ្ជីសាលាឧទ្ធរណ៍បានធ្វើលិខិតទៅព្រះរាជអាជ្ញាខេត្តព្រៃវែងដោយភ្ជាប់សំណើសុំចាត់បញ្ជូនសំណុំរឿងព្រហ្មទណ្ឌលេខ៥៦ ចុះថ្ងៃទី៣១ មករា ឆ្នាំ២០១១មក សភាស៊ើបសួរសាលាឧទ្ធរណ៍ ដើម្បីចាត់ការជាសមត្ថកិច្ចដោយអនុវត្តតាមមាត្រា២៥៣ នៃក្រមនីតិវិធីព្រហ្មទណ្ឌ ។ ប៉ុន្តែលោកព្រះរាជអាជ្ញានៅតែពុំព្រមបញ្ជូនសំណុំរឿងនេះមកសាលាឧទ្ធរណ៍ទេ ។
រហូតមកដល់ថ្ងៃទី២២ មេសា ឆ្នាំ២០១១ លោកមេធាវីការពារសិទ្ធិរបស់លោកហ៊ុន សុភ័ក្ត្រ បានដាក់ពាក្យសុំផ្ទេរសមត្ថកិច្ចចាត់ការសំណុំរឿងព្រហ្មទណ្ឌនេះ មកលោកព្រះរាជអាជ្ញាខេត្តព្រៃវែង ប្រយោជន៍ដើម្បីបង្វែរសំណុំរឿងនេះមកឱ្យអយ្យការអមសាលាដំបូងរាជធានីភ្នំពេញ ជាសមត្ថកិច្ចវិញ ។ ប៉ុន្តែពុំមានលទ្ធភាពអ្វីទាំងអស់ ព្រោះលោកព្រះរាជអាជ្ញាខេត្តព្រៃវែងពុំព្រមខ្ជាក់ឡើយ ។
ដោយអស់លទ្ធភាពក្នុងការជំរុញឱ្យព្រះរាជអាជ្ញាខេត្តព្រៃវែង ផ្ទេរសមត្ថកិច្ចបាន នៅថ្ងៃទី១៨ ឧសភា ឆ្នាំ២០១១ មេធាវីការពារសិទ្ធិឱ្យលោកហ៊ុន សុភ័ក្ត្រ បានធ្វើលិខិតទៅលោកស្រីអាត សុខន ក្រឡាបញ្ជីអយ្យការអមសាលាឧទ្ធរណ៍ ដើម្បីឱ្យបញ្ជូនសំណុំរឿងនេះមកសភាស៊ើបសួរសាលាឧទ្ធរណ៍ដោយយោងតាមមាត្រា ២៥៧-២៧៣-២៧៤ នៃក្រមនីតិវិធីព្រហ្មទណ្ឌ។
ទាក់ទិននឹងបញ្ហានេះ កោះសន្តិភាពពុំអាច ទាក់ទងសុំការបំភ្លឺពីលោកកើត វណ្ណារ៉េត ព្រះរាជអាជ្ញាអមសាលាដំបូងខេត្តព្រៃវែងបានទេ កាលពីរសៀលថ្ងៃទី២៥ ឧសភា ឆ្នាំ២០១១ ។ ប៉ុន្តែមជ្ឈដ្ឋានអ្នកច្បាប់យល់ឃើញថា រឿងនេះ ហាក់មានអាថ៌កំបាំង ទើបបានជាព្រះរាជអាជ្ញាក្រសោបខ្លាំងយ៉ាងនេះ ៕
ចែករំលែកព័តមាននេះ