រាជធានីភ្នំពេញ ៖ ចោរប្លន់១ក្រុមមានគ្នា៧នាក់ប្រដាប់ដោយកាំភ្លើង AK ចំនួន៣ដើម និងកាំភ្លើងខ្លីចំនួន៤ដើម បានធ្វើសកម្មភាពសម្រុកចូលប្លន់យកទ្រព្យសម្បត្តិក្នុងលំនៅឋានប្រជាពលរដ្ឋម្នាក់ ដោយចាប់ម្ចាស់ផ្ទះចងស្លាបសេក គំរាមបាញ់សម្លាប់ ហើយប្រមូលយកទ្រព្យសម្បត្តិគ្រឿងអលង្ការមានតម្លៃ និងម៉ូតូរួចគេចខ្លួនទៅបាត់ដោយសុវត្ថិភាព ។
ហេតុការណ៍នោះបានកើតឡើងកាលពីវេលាម៉ោង៩និង៣០នាទីយប់ ថ្ងៃទី២៥ ឧសភា ដែលផ្ទះរងគ្រោះខាងលើមានទីតាំងស្ថិតនៅតាមបណ្តោយផ្លូវអូរដឹមកប់ស្រូវ ភូមិត្រពាំងពោធិ៍ សង្កាត់គោករកា ខណ្ឌដង្កោ ។ ម្ចាស់លំនៅឋានរងគ្រោះដែលត្រូវចោរចាប់ចង និងភ្ជង់ប្លន់នោះឈ្មោះសេង យុត្ថា ភេទស្រី អាយុ៣៦ឆ្នាំ មានមុខរបរលក់សាំង និងទិញសាំងដែលក្រុមអ្នកបើករថយន្តកុងតឺន័រតែងបូមលក់ឱ្យ។ ចំណែកឯប្តីរបស់គាត់ឈ្មោះយន់ ទ្រី អាយុ៤៥ឆ្នាំ មិនបាននៅផ្ទះនោះទេ ព្រោះរវល់មានកម្មវិធីនៅខាងក្រៅ ។ ដោយឡែកក្រុមចោរប្លន់មានគ្នា៧នាក់ ស្លៀកពាក់ស៊ីវិលប្រដាប់ដោយកាំភ្លើង AK ៣ដើម និងកាំភ្លើងខ្លី៤ដើម ហើយក្នុងចំណោមបក្សពួកទាំង៧នាក់នោះ គឺមានជនម្នាក់ជាអ្នកប្រើល្បិចទូរស័ព្ទហៅឱ្យម្ចាស់ផ្ទះបើកទ្វារដោយប្រាប់ថា ខ្លួនយកប្រេងសាំងមកលក់ឱ្យ ។ ខណៈនោះគ្រាន់តែម្ចាស់ផ្ទះបើកទ្វារចេញមក បក្សពួកដែលពួននៅជិតនោះស្ទុះចូលទៅធ្វើសកម្មភាពភ្ជង់ចាប់ចងប្លន់យកទ្រព្យសម្បត្តិតែម្តង ។
អ្នករងគ្រោះនិយាយថា ទ្រព្យសម្បត្តិដែលត្រូវពួកចោរប្រមូលយកទៅនោះមានខ្សែ.កប្លាទីនចំនួន៨ខ្សែទម្ងន់២តម្លឹង៤ជី កងដៃប្លាទីនចំនួន៥កងទម្ងន់១តម្លឹង គ្រឿងអលង្ការពេជ្រតម្លៃ២.៥០០ដុល្លារ លុយ១លានរៀល ម៉ូតូម៉ាកស៊ុយហ៊្សុយគីស្មាស់១គ្រឿង ស៊េរីឆ្នាំ២០១០ ពាក់ស្លាកលេខភ្នំពេញ 1AK-9434 និងម៉ូតូម៉ាកហុងដា C125 ស៊េរីឆ្នាំ២០១១ អត់ស្លាកលេខ១គ្រឿង ព្រមទាំងទូរស័ព្ទដៃចំនួន៤គ្រឿងផងដែរ ។
តាមប្រភពព័ត៌មានបានឱ្យដឹងថា នៅមុនពេលកើតហេតុម្ចាស់ផ្ទះរងគ្រោះបានដេកនៅក្នុងផ្ទះជាមួយកូន ក្មួយ និងម្តាយដែលមានគ្នា៥ទៅ៦នាក់។ ចំណែកឯប្តីមិនបាននៅផ្ទះទេ ។ ខណៈនោះគាត់ក៏បានទទួលទូរស័ព្ទឮសំឡេងបុរសម្នាក់ប្រាប់ថា យកប្រេងមកលក់ឱ្យ ម្យ៉ាងទៀតបុរសនោះក៏ធ្លាប់យកប្រេងមកលក់ឱ្យគាត់ជាញឹកញាប់មកហើយដែរ ទើបបានស្គាល់លេខទូរស័ព្ទគ្នា ។ បន្ទាប់ពីទទួលទូរស័ព្ទ ម្ចាស់ផ្ទះក៏បានបើកទ្វារផ្ទះចេញទៅ និងបានឃើញជននោះយកប្រេងមកលក់ឱ្យមែន ហើយគាត់ក៏បានអូសប៊ីដុងប្រេងចូលទៅក្នុងផ្ទះរួចបិទទ្វារហើយដើរទៅយកលុយឱ្យថ្លៃប្រេង ។ លុះពេលយកលុយពីក្នុងផ្ទះបើកបង្ហើបទ្វារ ដើម្បីហុចលុយឱ្យជននោះ ក៏ស្រាប់តែបក្សពួកចោរ៦នាក់ទៀតស្ទុះទៅរុញទ្វារហើយសម្រុកចូលទៅភ្ជង់គំរាមបាញ់សម្លាប់ និងចាប់គាត់ ព្រមទាំងអ្នកនៅក្នុងផ្ទះចងជាប់ទាំងអស់ ។
ប្រភពដដែលនេះបានបន្តទៀតថា ពេលចាប់ចងហើយក្រុមចោរបានស្រែកគំរាមឱ្យប្រគល់ទ្រព្យសម្បត្តិ ព្រោះលក់ប្រេងយូរហើយកុំឆ្លើយថាអត់លុយប្រយ័ត្នបាញ់ចោល ។ ស្របពេលនឹងការស្រែកគំរាមពួកចោរបានយកកូនសោចាក់ទូប្រមូលយកលុយ និងគ្រឿងអលង្ការមានតម្លៃ ទូរស័ព្ទដៃ និងម៉ូតូ២គ្រឿងសុទ្ធតែស៊េរីទំនើបៗរួចគេចខ្លួនទៅបាត់អស់ដោយសុវត្ថិភាព។ ស្ត្រីម្ចាស់ផ្ទះនិយាយថា គាត់មិនហ៊ានស្រែកឱ្យគេជួយទេ ព្រោះខ្លាចចោរបាញ់សម្លាប់ រហូតដល់ក្រុមចោរគេចខ្លួនទៅបាត់អស់ទើបស្រាយចំណងឱ្យគ្នាម្តងម្នាក់ និងរត់ទៅប្តឹងសមត្ថកិច្ចឱ្យជួយ ។
ប្រភពដដែលបន្តទៀតថា លំនៅឋានរងគ្រោះមួយនេះនៅដាច់ឆ្ងាយពីគេឯង ពេលមានហេតុការណ៍បែបនេះកើតឡើងទោះបីស្រែកដាក់មេក្រូក៏សឹងតែគ្មាននរណាឮផង ដូច្នេះហើយទើបចោរធ្វើសកម្មភាពបានតាមចិត្ត ។ កន្លងមកជនរងគ្រោះរកស៊ីលក់ និងទិញប្រេងដែលគេបូមចេញពីរថយន្តដឹកទំនិញ រថយន្តកុងតឺន័រមកលក់ឱ្យគឺយប់ក៏ទិញ ថ្ងៃក៏ទិញ ។ គេសង្ស័យថា ក្រុមចោរប្លន់អាចជាអ្នកធ្លាប់យកប្រេងមកលក់ឱ្យ និងដឹងពីចំណុចខ្សោយជនរងគ្រោះដែលទិញប្រេងពេលយប់ទៀតផង ទើបពួកគេប្រើល្បិចយកប្រេងមកលក់ដើម្បីឱ្យម្ចាស់ផ្ទះបើកទ្វាររួចចូលទៅប្លន់តែម្តង ។
ប្រភពពីកន្លែងកើតហេតុបាននិយាយថា សកម្មភាពប្លន់នោះក្រុមចោរមានគ្នាច្រើន និងប្រដាប់ដោយអាវុធវែង-ខ្លីគ្រប់ដៃទៀតផង ដែលចាត់ទុកថា គឺជាកម្លាំងទ្រង់ទ្រាយធំមួយ ហើយអ្វីដែលគួរឱ្យចាប់អារម្មណ៍ និងជាពន្លឺសម្រាប់សមត្ថកិច្ចធ្វើការស្រាវជ្រាវនោះ គឺលេខទូរស័ព្ទរបស់ជនសង្ស័យដែលហៅចូលជនរងគ្រោះនោះ ។ ទោះបីជាបែបណាពេលនេះ កម្លាំងសមត្ថកិច្ចខណ្ឌដង្កោ និងរាជធានីភ្នំពេញ បានចុះទៅកាន់កន្លែងកើតហេតុ និងបានធ្វើការស្រាវជ្រាវយា៉ងដុតដៃដុតជើងបំផុត ហើយគេសង្ឃឹមថា សមត្ថកិច្ចនឹងអាចវែកមុខក្រុមចោរនោះឃើញមិនខានឡើយ ៕
ចែករំលែកព័តមាននេះ