រាជធានីភ្នំពេញ ៖ នៅទីបំផុត ចៅក្រមស៊ើបសួរនៃសាលាដំបូងរាជធានីភ្នំពេញនារសៀលថ្ងៃទី ៩ ខែមករា ឆ្នាំ២០២៤នេះ បានសម្រេចឃុំខ្លួនក្រុមChery៥នាក់ ដែលបានបង្កអំពើហិង្សាព្រួតគ្នាវាយសិស្សស្រីម្នាក់កន្លងមកនោះហើយ ។
ប្រភពព័ត៌មានដែលទទួលបានឱ្យដឹងថា ចៅក្រមស៊ើបសួរលោក ទិត សុទ្ធីបូរ៉ាឆាត ឃុំខ្លួនក្រុមChery ៥នាក់នោះហើយ ។
សូមរំលឹកថា៖ លោក វ៉ិត មឃៈ ព្រះរាជអាជ្ញារង និងអ្នកនាំពាក្យស្ថាប័នអយ្យការ អមសាលាដំបូងរាជធានីភ្នំពេញ កាលពីល្ងាចថ្ងៃទី៧ ខែមករា ឆ្នាំ២០២៤ បានថ្លែងប្រាប់អ្នកសារព័ត៌មានឲ្យដឹងថា សំណុំរឿងសិស្សសាលា៥នាក់ ព្រួតគ្នាវាយសិស្សម្នាក់ ត្រូវបានលោក ស៊ិន រក្សា ព្រះរាជអាជ្ញារង នៃអយ្យការ បើកការស៊ើបសួររួចរាល់ហើយ ហើយបានសម្រេចធ្វើការចោទប្រកាន់ក្រុមCherry ប្រុសស្រីទាំង៥ នាក់នោះ ពីបទហិ.ង្សាដោយចេតនា មានស្ថានទម្ងន់ទោស តាមបញ្ញតិមាត្រា២១៨ នៃក្រមព្រហ្មទណ្ឌ ។
បើយោងតាមមាត្រា ២១៨ ជាបទល្មើសប្រឆាំងនិងបុគ្គល «អំពើហិ.ង្សាដោយចេតនា ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ៥ ឆ្នាំ និងពិន័យជាប្រាក់ពី៤ លានទៅ១០ លានរៀល កាលប្រើអំពើហិ.ង្សានេះបានប្រព្រឹត្ត ៖
១-ដោយមានការគិតទុកជាមុន ។
២-ដោយប្រើអាវុធ ឬគំរាមកំហែងនិងអាវុធ ។
៣-ដោយមានមនុស្សច្រើននាក់ក្នុងឋានៈ ជាចារី សហចារី អ្នកផ្តើមគំនិត និងអ្នកសមគំនិត ។ ជនសង្ស័យទាំង៥ នាក់មាន ៖
១-ឈ្មោះ អាត សំណាង ហៅលីហ្សា ហៅCherry ភេទប្រុស (ចរឹកស្រី)អាយុ១៨ ឆ្នាំ មុខរបរ សិស្ស មានទីលំនៅផ្ទះលេខ៣៦ បុរីពិភពថ្មី៣ ភូមិព្រៃកី សង្កាត់ភ្លើងឆេះរទេះ ខណ្ឌកំបូល រាជធានីភ្នំពេញ ។
២-ឈ្មោះ យាន រស្មី ហៅមុី ភេទស្រី អាយុ១៧ ឆ្នាំ មុខរបរ សិស្ស មានទីលំនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
៣-ឈ្មោះ ហូយ ម៉ូលុច្យ ហៅហ្វាំង ភេទស្រី អាយុ១៨ ឆ្នាំ មុខរបរ សិស្ស មានទីលំនៅបុរីសន្តិភាព២ ភូមិតំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ រាជធានីភ្នំពេញ ។
៤-ឈ្មោះ គង់ សុីណា ភេទស្រី អាយុ១៨ ឆ្នាំ មុខរបរ សិស្ស មានទីលំនៅភូមិទឹកថ្លា សង្កាត់ក្រាំងពង្រ ខណ្ឌដង្កោ រាជធានីភ្នំពេញ ។
៥-ឈ្មោះ សំណាង ពិសី ភេទស្រី អាយុ១៨ ឆ្នាំ មុខរបរ សិស្ស មានទីលំនៅភូមិព្រៃកី ខ សង្កាត់ពងទឹក ខណ្ឌដង្កោ រាជធានីភ្នំពេញ ។
ក្រោយពីតំណាងអយ្យការបានសម្រេចធ្វើការចោទប្រ កាន់ជាផ្លូវការហើយ សំណុំរឿងបានចាត់ទៅចៅក្រមស៊ើបសួរ ដើម្បីសម្រេចឃុំខ្លួនឬមិនឃុំខ្លួនជនសង្ស័យជាឆ័ន្ទានុសិទ្ធិរបស់ចៅក្រម ។ ប៉ុន្តែដោយពេលវេលាល្ងាចពេកផុតម៉ោងការងាររដ្ឋបាល ជនសង្ស័យទាំង៥ នាក់ ត្រូវបានស្ថាប័នអយ្យការអមសាលាដំបូងរាជធានីភ្នំពេញ ផ្ញើទៅសមត្តកិច្ចនគរបាលខណ្ឌកំបូលវិញ តម្រូវដល់ព្រឹកថ្ងៃ០៨ ខែមករា ឲ្យនាំទៅបន្តនីតិវិធីទៀត ។
សូមរម្លឹកថា កាលពីល្ងាចថ្ងៃទី៤ ខែមករា ឆ្នាំ២០២៤ តាមបណ្តាញសង្គម បានចែកចាយវីដេអូដែលបង្ហាញពីសកម្មភាព សិស្សសាលាមួយក្រុម បានព្រួតគ្នាវាយសិស្សស្រីម្នាក់ នៅដីវាល មួយកន្លែង ក្នុងខណ្ឌកំបូល រាជធានីភ្នំពេញ ។
ចែករំលែកព័តមាននេះ