ខេត្តកំពង់ធំ ៖ សមាគម HOH (Help Our Homeland) ជួយស្រុកកំណើតយើងបានរៀបចំសិក្ខាសាលាពីរ ក្រោមប្រធានបទតែមួយស្តីពី «ការត្រៀមខ្លួនដើម្បីជោគជ័យពេលប្រឡងកម្រិតធម្យមសិក្សាទុតិយភូមិ» ក្រោមអធិបតីភាពរបស់លោកគ្រូ ឃឹម សុខហេង ប្រធានក្រុមប្រឹក្សាភិបាលសមាគមHOH ជួយស្រុកកំណើតយើងកាលពីថ្ងៃទី២២ ខែឧសភា ឆ្នាំ២០១១
ខេត្តកំពង់ធំ ៖ សមាគម HOH (Help Our Homeland) ជួយស្រុកកំណើតយើងបានរៀបចំសិក្ខាសាលាពីរ ក្រោមប្រធានបទតែមួយស្តីពី «ការត្រៀមខ្លួនដើម្បីជោគជ័យពេលប្រឡងកម្រិតធម្យមសិក្សាទុតិយភូមិ» ក្រោមអធិបតីភាពរបស់លោកគ្រូ ឃឹម សុខហេង ប្រធានក្រុមប្រឹក្សាភិបាលសមាគមHOH ជួយស្រុកកំណើតយើងកាលពីថ្ងៃទី២២ ខែឧសភា ឆ្នាំ២០១១ នៅសាលប្រជុំខេត្តកំពង់ធំ និងនៅវត្តសំរោង ក្នុងស្រុកបារាយណ៍ ខេត្តកំពង់ធំ ។ សិក្ខាសាលាទាំងពីរនេះមានការអញ្ជើញចូលរួមពីក្រុមប្រឹក្សាភិបាលសមាគម គណៈគ្រប់គ្រងសមាគម សមាជិក-សមាជិកាកាកបាទក្រហមសាខាខេត្តកំពង់ធំ លោកស្នងការរងស្រុក លោកមេឃុំ លោកយាយ លោកតា មាតាបិតាសិស្ស នាយកវិទ្យាល័យ-អនុវិទ្យាល័យ លោកគ្រូ អ្នកគ្រូ សិស្សានុសិស្សសរុបចំនួន៥០០នាក់ ។
កញ្ញាហួង សុខអេង ប្រធានសមាគម HOH ជួយស្រុកកំណើតយើង បានរាយការណ៍ពីសកម្មភាពសមាគមជូនដល់សិក្ខាកាមឱ្យបានជ្រាបថា សិក្ខាសាលានេះត្រូវបានធ្វើឡើងក្នុងគោលបំណងជួយឱ្យសិស្សានុសិស្សដែលត្រៀមខ្លួនដើម្បីជោគជ័យពេលប្រឡងកម្រិតមធ្យមសិក្សា យល់ដឹងពីវិធីសាស្ត្រក្នុងការសិក្សាទប់ស្កាត់ការអូសទាញពីបរិយាកាសមិនល្អដែលនៅជុំវិញខ្លួន (គ្រឿងញៀន ស្នេហាភ្លើតភ្លើន មិត្តមិនល្អ ល្បែងស៊ីសង ការបោកប្រាស) ការយល់ដឹងពីតម្លៃនៃការសិក្សា និងទទួលបានទស្សនៈអប់រំថ្មីៗដើម្បីក្លាយខ្លួនជានិស្សិតឆ្នើម និងបុគ្គលគំរូ ព្រមទាំងកត្តាដែលនាំឱ្យមានការគិតត្រូវសម្រាប់ជីវិតរបស់ខ្លួនផងដែរ ។
កញ្ញាហួង សុខអេង បានបន្តទៀតថា ក្នុងរយៈកាលកន្លងមកនេះ ដោយមានការជ្រោមជ្រែងយ៉ាងពេញទំហឹងពីសំណាក់សមាជិកសមាគម និងការចូលរួមឧបត្ថម្ភពីសប្បុរសជនជាច្រើន សមាគម HOH ជួយស្រុកកំណើតយើងសម្រេចបាននូវស្នាដៃ និងសកម្មភាពជាច្រើនដែលផ្តោតទៅលើយុវជនដូចជា ការរៀបចំសិក្ខាសាលាថ្នាក់ជាតិ ស្តីពីការរៀបចំជីវិតជោគជ័យក្រោយពេលបញ្ចប់កម្រិតមធ្យមសិក្សាទុតិយភូមិ ក្រោមអធិបតីភាពដ៏ខ្ពង់ខ្ពស់ លោកបណ្ឌិតហ៊ុន ម៉ាណែត នៅវិទ្យាស្ថានជាតិអប់រំចំនួនពីរលើក ។ ការរៀបចំសិក្ខាសាលាថ្នាក់ជាតិ និងតាមខេត្តនានា ស្តីពីការរៀបចំជីវិតជោគជ័យក្នុងអំឡុងពេលសិក្សានៅសាកលវិទ្យាល័យ នៅវិទ្យាស្ថានជាតិអប់រំចំនួនពីរលើក និងបណ្តាខេត្តនានាជាច្រើន ។ កម្មវិធីចែករំលែកបទពិសោធន៍ជោគជ័យទាក់ទងទៅនឹងការពង្រឹងកម្លាំងចិត្ត និងសមត្ថភាពផ្ទាល់ខ្លួនក្នុងការសិក្សា ការងារ និងមុខរបរនៅតាមសាកលវិទ្យាល័យ និងកម្មវិធីវិទ្យុនានា ដូចជា វិទ្យុបាយ័ន វិទ្យុចរាចរណ៍កម្ពុជាFM 94.5 វិទ្យុFM 102 និងវិទ្យុហង្សមាស ។ ការផ្តល់ឱ្យនិស្សិតបង្កើតបណ្តាញ និងរៀនសូត្រពីបទពិសោធន៍ជាក់ស្តែងពីបុគ្គលដែលទទួលបានជោគជ័យក្នុងអាជីពនិងមុខរបរ និងភាពជាអ្នកដឹកនាំ ក្នុងការជំរុញឱ្យយុវជនចូលរួមក្នុងការអភិវឌ្ឍសង្គម តាមរយៈក្លឹបអភិវឌ្ឍអាជីពនិស្សិតតាមជំនាញវិជ្ជាជីវៈរបស់សមាគម ។
លោកគ្រូឃឹម សុខហេង ប្រធានក្រុមប្រឹក្សាសមាគម HOH ជួយស្រុកកំណើតយើង បានមានប្រសាសន៍ទៅកាន់សិក្ខាកាមក្នុងកម្មវិធីបើក និងបទបង្ហាញថា យុវជនជាទំពាំងស្នងឫស្សី រីឯយុវជនប្រុស-ស្រីជាអ្នកស្នងជាតិ ដូចនេះយុវជនជាធនធានដ៏មានតម្លៃសម្រាប់ប្រទេសជាតិយើងទាំងមូល ។ ដោយធនធានយុវជនមានសារសំខាន់ក្នុងការអភិវឌ្ឍសង្គមជាតិ លោកគ្រូឃឹម សុខហេង បានធ្វើបទបង្ហាញពីចំណុចគន្លឹះជាច្រើនដើម្បីឱ្យសិស្សានុសិស្សត្រៀមខ្លួនជាស្រេចពេលប្រឡងកម្រិតមធ្យមសិក្សាទុតិយភូមិ ដោយសួរសំណួរឆ្លុះបញ្ចាំងពីសមត្ថភាព ចំណេះដឹងដែលពួកគេមានជាទុនក្នុងការប្រឡង និងពញ្ញាក់ស្មារតីឱ្យពួកគេមើលឃើញពីទិដ្ឋភាពជាក់ស្តែង ប្រសិនបើការប្រឡងថ្នាក់ជាតិពួកគេជួបជាមួយគ្រូបន្ទុកថ្នាក់ ឬអនុរក្សដែលមិនអនុញ្ញាតឱ្យបើកមើលប្រ៊ុយយ៉ុង តើពួកគេអាចប្រឡងជាប់ដែរឬទេ ? បន្ទាប់ពីបានឮសំណួរ នេះ សិស្សានុសិស្សហាក់ដូចជាមានភាពភ្ញាក់ផ្អើល និងចាប់ផ្តើមព្រួយបារម្ភពីអនាគតរបស់ខ្លួន ជាពិសេសពេលប្រឡងកម្រិតមធ្យមសិក្សាទុតិយភូមិខាងមុខនេះ ។ បន្ទាប់មកទៀតលោកគ្រូបានលើកឡើងពីការពង្រឹងសមត្ថភាពចំណេះដឹង ដោយយកចិត្តទុកដាក់ក្នុងការសិក្សា បង្កើតការរៀនជាក្រុម និងចេះស្រឡាញ់លោកគ្រូ អ្នកគ្រូ ព្រមទាំងមានគោលដៅច្បាស់លាស់ក្នុងជីវិត។ លោកគ្រូឃឹម សុខហេង ក៏បានណែនាំប្អូនៗសិស្សានុសិស្សគួរតែចៀសវាងការប្រព្រឹត្តអំពើមិនល្អ សេពគប់មិត្តដែលមិនចូលសាលា ស្នេហាភ្លើតភ្លើន និងបញ្ហាគ្រឿងញៀនជាដើម ព្រោះទាំងអស់នេះនាំឱ្យប្អូនៗក្លាយជាបុគ្គលមិនល្អនៅក្នុងសង្គម ។
សមាគម HOH ជួយស្រុកកំណើតយើង ត្រូវបានបង្កើតឡើងនៅថ្ងៃទី១៣ ខែធ្នូ ឆ្នាំ២០០៤ និងបានចុះឈ្មោះស្របច្បាប់ជាអង្គការក្រៅរដ្ឋាភិបាលនៅក្រសួងមហាផ្ទៃនៃព្រះរាជាណាចក្រកម្ពុជា ។ បុព្វហេតុនៃការបង្កើតសមាគមនេះឡើង គឺស្តែងចេញពីការយល់ឃើញរួមមួយពីសំណាក់បុគ្គលទាំងឡាយដែលបានចាកឆ្ងាយពីស្រុកកំណើតរបស់ខ្លួនទៅលើឱកាសដ៏ទូលំទូលាយក្នុងការជ្រោមជ្រែង និងចូលរួមចំណែកអភិវឌ្ឍធនធានមនុស្សនៅកម្ពុជា ខណៈដែលបានសង្កេតឃើញយ៉ាងច្បាស់ពីបញ្ហាទាំងឡាយដែលបានកើតឡើង ពីបរិយាកាសសង្គមជាលទ្ធផលបន្សល់ទុកពីសង្គ្រាមជាច្រើនឆ្នាំនៅកម្ពុជា កាលពីប៉ុន្មានទសវត្សកន្លងទៅ ៕
ចែករំលែកព័តមាននេះ