ក្រុងប៉ោយប៉ែត ៖ ផ្លូវមួយខ្សែដែលតភ្ជាប់ពីភូមិបាលិលេយ្យឆ្ពោះទៅបន្ទាត់ព្រំដែនដោយឆ្លងកាត់ជាច្រើនភូមិ និងជាដងផ្លូវដ៏សំខាន់សំរាប់សិស្សធ្វើដំណើរទៅសាលារៀនស្ថិតក្នុងភូមិទួលប្រាសាទ សង្កាត់ប៉ោយប៉ែត រងការបំផ្លាញដោយរថយន្តធំៗដឹកដី និងដឹកហ្គាសធ្វើឱ្យសិស្សគ្រប់គ្នាក៏ដូចជាអ្នកស្រុកដែលធ្វើដំណើរឆ្លងកាត់រអ៊ូរទាំថា
ក្រុងប៉ោយប៉ែត ៖ ផ្លូវមួយខ្សែដែលតភ្ជាប់ពីភូមិបាលិលេយ្យឆ្ពោះទៅបន្ទាត់ព្រំដែនដោយឆ្លងកាត់ជាច្រើនភូមិ និងជាដងផ្លូវដ៏សំខាន់សំរាប់សិស្សធ្វើដំណើរទៅសាលារៀនស្ថិតក្នុងភូមិទួលប្រាសាទ សង្កាត់ប៉ោយប៉ែត រងការបំផ្លាញដោយរថយន្តធំៗដឹកដី និងដឹកហ្គាសធ្វើឱ្យសិស្សគ្រប់គ្នាក៏ដូចជាអ្នកស្រុកដែលធ្វើដំណើរឆ្លងកាត់រអ៊ូរទាំថា ពិបាកក្នុងការធ្វើដំណើរ ក្នុងរដូវវស្សាភ្លៀងធ្លាក់នេះ។ ផ្លូវលំមួយខ្សែនេះក្រោយពីភ្លៀងម្តងៗគេឃើញសិស្សសាលាជិះកង់ ឬម៉ូតូស្ទើរតែលែងចង់កើតដោយមានកន្លែងខ្លះផ្លូវបែកភក់ និងជង្ហុកធំៗ ហើយរអិលទៀតផង ដោយសារគ្មានក្រួស ដូច្នេះសិស្សខ្លះចុះដើរ ខ្លះបណ្តើរកង់។
បញ្ហាផ្លូវដ៏លំបាកនេះមិនមែនទើបតែឆ្នាំនេះទេ គឺគេឃើញកើតមានបែបនេះជារៀងរាល់ឆ្នាំ។ រដូវវស្សាឆ្នាំមុនៗ សិស្សខ្លះជិះកង់លែងកើតត្រូវបង្ខំ ចិត្តទុកផ្ញើគេតាមផ្លូវ ឬក៏ផ្ញើនៅទីបញ្ជាការប៉ូលិសការពារព្រំដែនគោកវរសេនាតូចលេខ៩១១ ដែលស្ថិតនៅតាមដងផ្លូវនោះ។ ផ្លូវនេះមិនមែនអាជ្ញាធរមិនអើពើធ្វើទេ គឺជួសជុលជារៀងរាល់ឆ្នាំ ប៉ុន្តែទប់ទល់នឹងរថយន្តដឹកដី ឬធុងហ្គាសធំៗមិនបាន។ រថយន្តដឹកដីតែងធ្វើចរាចរខួបប្រាំង ខួបវស្សា ចំណែករថយន្តដឹកធុងហ្គាសក៏ដូច្នោះដែរ ប៉ុន្តែដឹកតែពេលយប់ចេញពីច្រករបៀងមួយចំនួនក្នុងស្រុកអូរជ្រៅ។
សិស្សរាប់រយនាក់ដែលធ្វើដំណើរទៅរៀននៅវិទ្យាល័យហ្វ្រាស្ថិតក្នុងភូមិទួលប្រាសាទ ភាគច្រើនមកពីភូមិសិលាខ្មែរ ឃុំអូរបីជាន់ ស្រុកអូរជ្រៅ។ ប្រជាពលរដ្ឋនៅភូមិទួលប្រាសាទបាននិយាយថា ផ្លូវដែលរងការបំផ្លាញនេះគឺមកពី រថយន្តធំៗដឹកហ្គាសនៅពេលយប់ និងរថយន្តដឹកដីនៅពេលថ្ងៃ។ ទាំងប្រជាពលរដ្ឋ ទាំងសិស្សសាលាបានសំណូមពរសុំឱ្យអាជ្ញាធរសង្កាត់ និងក្រុងជួយចាត់វិធានការទប់ស្កាត់ផង បើពុំដូច្នេះទេ ការធ្វើដំណើររបស់ពួកគាត់កាន់តែលំបាកក្នុងរដូវវស្សានេះ ប្រសិនបើរថយន្តដឹកដី និងដឹកធុងហ្គាសនៅតែបន្តសកម្មភាព។ ជុំវិញបញ្ហានេះ លោកសាន ស៊ានហូ ចៅសង្កាត់ប៉ោយប៉ែតបានប្រាប់កោះសនិ្តភាពនៅព្រឹកថ្ងៃទី២៦ ឧសភា ថា បញ្ហានេះលោកកំពុងចាត់វិធានការហើយ គឺកំពុងឱ្យអាជ្ញាធរមូលដ្ឋានតាមភូមិដាក់បារ៉ាស់ ហើយណែនាំដល់រថយន្តធំៗដែលធ្វើអាជីវកម្មលើដងផ្លូវឱ្យជួយជាថវិកា ឬជាក្រួសចាក់ លុបបំពេញចំណុចដែលខូចខាត។ លោកមិនបណ្តោយឱ្យប្រជាពលរដ្ឋក៏ដូចជាសិស្សសាលាមានការលំបាកក្នុងការធ្វើដំណើររហូតទេ គឺនឹងមានការអភិវឌ្ឍបណ្តើរៗនាពេលខាងមុខ ៕
ចែករំលែកព័តមាននេះ