សង្គ្រាម​អ៊ី​ស្រា​អែ​ល​និង​ហា​ម៉ាស់ ៖ ទូរទស្សន៍​កា​តា​អាល់​ហ្សា​ហ្ស៊ី​​រ៉ា​ ប្រកាស​កាលពី​ថ្ងៃ​ទី​៧​ មក​រា​ ពី​ការ​ស្លា.ប់​របស់​អ្នកកាសែត​ប៉ា​ឡេ​ស្ទី​ន​២​នាក់ ដែល​ធ្វើការ​ឲ្យ​ទូរទស្សន៍​នោះ​នៅ​តំបន់​ជ្រោយ​ហ្គា​ហ្សា ដោយ​ការ​ស្លា.ប់​របស់​ពួក​គេ​បណ្ដាល​មក​ពី​ការ​វាយប្រហារ​របស់​អ៊ី​​ស្រា​អែ​ល​។

រដ្ឋមន្ត្រី​ការ​បរទេស​អា​មេ​រិ​ក​លោក​អាន​តូ​នី​ប្លី​ន​កេ​ន​លើក​ឡើង​ពី​សោកនាដកម្ម​នឹក​ស្មាន​មិន​ដល់​មួយ ចំណែក​អគ្គលេខាធិការ​របស់​អង្គការ​អ្នក​យក​ព័ត៌មាន​គ្មាន​ព្រំដែន​RSF បាន​បរិហារ​ថា នេះ​ជា​អំពើ​ពហុ​ឃាត​គ្មាន​ត្រើយត្រាន​មួយ​។ លោក​HAMZA WAEL DAHDOUH​កូនប្រុស​របស់​លោក​WAEL AL-DAHDOUH ប្រធាន​ការិយាល័យ​អាល់​ហ្សា​ហ្សុ​ី​រ៉ា​ប្រចាំ​ជ្រោយ​ហ្គា​ហ្សា និង​លោក​MOUSTAFA THURAYAG អ្នក​ថត​វី​ដេ​អូ​ដែល​សហការ​ជាមួយ​AFP បាន​ត្រូវ​សម្លាប់​ពេល​ពួក​គេ​កំពុង​ធ្វើ​ដំណើរ​តាម​រថយន្ត​នៅ​ក្រុង​រ៉ា​ហ្វា​ចុង​ខាងត្បូង​នៃ​ដែនដី​ជ្រោយ​ហ្គា​ហ្សា ។ អ្នកកាសែត​ទី​៣​ម្នាក់​ទៀត​ដែល​ជិះ​រថយន្ត​ជាមួយ​គ្នា​រង​របួសធ្ងន់​។

លោក​WAEL AL-DAHDOUH ថ្លែង​ទៅ​កាន់​ទូរទស្សន៍​អាល់​ហ្សា​ហ្ស៊ី​​រ៉ា​ថា​HAMZA WAEL DAHDOUH​ធ្វើ​អ្វី​គ្រប់យ៉ាង​សម្រាប់​ខ្ញុំ​ខណៈ​ដែល​យើង​ប្រកាន់​យក​គោលការណ៍​មនុស្សធម៌​ពេញលេញ ផ្ទុយ​ពី​អ៊ី​ស្រា​អែ​ល​ដែល​ប្រកាន់​ចិត្ត​ចងអាឃាត​។ អ្នកកាសែត​រូប​នេះ​ធ្លាប់​ត្រូវ​របួស ក្នុង​ការ​វាយប្រហារ​មួយ​របស់​អី​ុ​ស្រា​អែ​ល និង​បាន​បាត់បង់​ប្រពន្ធ​និង​កូន​២​នាក់ ក្នុង​ការ​វាយប្រហារ​មួយទៀត​របស់​អី​ុ​ស្រា​អែ​ល ក្នុង​បណ្ដា​ស​ប្ដា​ហ៍​ដំបូង​នៃ​សង្គ្រាម​។

ចំណែក​អ្នកកាសែត​លោក​MOUSTAFA THURAYAG​អាយុ​៣០​ឆ្នាំ​ជា​អ្នក​រួម​សហការ​ជាមួយ​AFP ចាប់តាំងពី​ឆ្នាំ​២០១៩​មក ។ លោក​ក៏​ជា​អ្នក​រួម​សហការ​ដែរ​ជាមួយ​ទីភ្នាក់ងារ​ព័ត៌មាន​រ៉​យ​ទ័​រ​និង​AP​ព្រមទាំង​ធ្វើការ​ឲ្យ​ទូរទស្សន៍​អាល់​ហ្សា​ហ្សុ​ី​រ៉ា​និង​ទូរទស្សន៍​អា​មេ​រិ​ក​CNN ៕