ខេត្តបាត់ដំបង ៖ ជាង១ខែកន្លងមកហើយ បើគិតត្រឹមថ្ងៃទី០៨ ខែមករា ឆ្នាំ២០២៤នេះ ដែលគ្រូបង្រៀនម្នាក់ និងជាជាងជួសជុលទូរស័ព្ទផង ត្រូវខ្មា.ន់កាំភ្លើ.ងខ្លីបា.ញ់ប្រ.ហា.រប៉ុនប៉ងផ្ដា.ច់ជីវិ.តមិនបានសម្រេច នៅឃុំភ្នំសំពៅ ស្រុកបាណន់ ហើយសមត្ថកិច្ចធ្វើការស្រាវជ្រាវឃាត់ខ្លួនជនសង្ស័យម្នាក់ នាំយកទៅប្រគល់ឲ្យតុលាការឃុំខ្លួនក្នុងពន្ធនាគារ រហូតមកដល់សព្វថ្ងៃនេះ។ ប៉ុន្តែជនរងគ្រោះនៅតែដេកភ័យ ដេកព្រួយបារម្ភអំពីសុវត្ថិភាព រហូតបិទទ្វារចាក់សោរសម្ងំនៅតែក្នុងបន្ទប់ មិនហ៊ានចេញក្រៅទៅបង្រៀនសិស្ស ឬប្រកបរបរអ្វីឡើយ ដោយសារតែជនសង្ស័យម្នាក់ដែលតុលាការសម្រេចឃុំខ្លួននោះ ហាក់មិនទាន់ច្បាស់លាស់ថា «ជាជនដៃដល់ពិតប្រាកដឡើយ»។
លោក អ៊ូច សុខលៀប អាយុ៣៨ឆ្នាំ ដែលជាជនរងគ្រោះនៅក្នុងអំពើបា.ញ់ប្រ.ហា.រនោះ បានផ្ដល់បទសម្ភាសន៍ជាមួយកោះសន្តិភាព កាលពីព្រឹកថ្ងៃទី០៨ ខែមករា ឆ្នាំ២០២៤ ដោយលោកបាននិយាយរៀបរាប់ និងបង្ហាញពីអារម្មណ៍ភ័យខ្លាច ព្រមទាំងមានការព្រួយបារម្ភខ្លាំងអំពីសុវត្ថិភាពផ្ទាល់ខ្លួន ក្រោយពីធ្លាប់ត្រូវខ្មា.ន់កាំភ្លើ.ងបា.ញ់ស្រោ.ចជាច្រើនគ្រា.ប់ ជាការប៉ុនប៉ងផ្ដា.ច់ជីវិ.តរបស់លោក តែមិនបានសម្រេច ធ្វើឲ្យរូបលោកស្ទើរតែបាក់ស្បាត និងភ័យខ្លាច រហូតបិទទ្វារចាក់សោរសម្ងំដេកតែក្នុងបន្ទប់ បើទោះបីជាសមត្ថកិច្ចបានឃាត់ខ្លួនជនសង្ស័យម្នាក់ យកទៅឃុំខ្លួនក្នុងពន្ធនាគារ រហូតដល់ពេលនេះក្ដី។
លោក អ៊ូច សុខលៀប បាននិយាយបែបនេះថា «ខ្ញុំនៅតែដេកភ័យ ដេកខ្លាច និងដេកព្រួយបារម្ភគ្រប់ពេលវេលា អំពីសុវត្ថិភាពផ្ទាល់ខ្លួន ចាប់តាំងពីថ្ងៃកើតហេតុ រហូតមកដល់ពេលនេះ។ ជាងមួយខែកន្លងមកនេះ ស្ទើរទាំងយប់ទាំងថ្ងៃ ខ្ញុំសម្ងំដេកនៅតែក្នុងផ្ទះ មិនហ៊ានចេញក្រៅទេ។ ខ្ញុំសម្ងំដេកក្នុងបន្ទប់ ហើយបិទទ្វារចាក់សោរថែមទៀត ព្រោះខ្លាចរឿងគេបា.ញ់ប្រ.ហា.រនោះកើតឡើងជាថ្មីទៀត»។
នៅពេលសួរថា ហេតុអ្វីបានខ្លាចរហូតដល់ថ្នាក់ហ្នឹង? បើជនសង្ស័យម្នាក់ត្រូវបានសមត្ថកិច្ចចាប់ខ្លួន ហើយថែមទាំងត្រូវតុលាការឃុំខ្លួនក្នុងពន្ធនាគារ រហូតមកដល់ពេលនេះទៅហើយ តើរឿងអ្វីដែលត្រូវខ្លាចទៀត?
លោកគ្រូបង្រៀនរូបនេះ បានផ្ដល់ចម្លើយតបវិញដូច្នេះថា «ជនដែលសមត្ថកិច្ចឃាត់ខ្លួននេះ គ្រាន់តែជាការសង្ស័យទៅលើគាត់តែប៉ុណ្ណោះទេ។ ខ្ញុំមិនបានចោទប្រកាន់គាត់ទេ ខ្ញុំគ្រាន់តែផ្ដល់ភិនភាគគាត់ប្រាប់ទៅសមត្ថកិច្ច ដោយសារតែខ្ញុំបានឃើញគាត់ដើរតាមផ្លូវកាត់មុខផ្ទះខ្ញុំ មុនពេលហេតុការបា.ញ់ប្រ.ហា.រខ្ញុំបានកើតឡើង។ ចឹងហើយទើបខ្ញុំនៅតែមានការភ័យខ្លាច និងដេកព្រួយបារម្ភពីសុវត្ថិភាព សម្ងំនៅតែក្នុងផ្ទះទាំងយប់ទាំងថ្ងៃ ព្រោះជនដែលសមត្ថកិច្ចឃាត់ខ្លួននោះ ស្ថិតក្នុងភាពមិនច្បាស់លាស់នៅឡើយ»។
សូមរំលឹកថា កាលពីវេលាម៉ោង៧យប់ ថ្ងៃទី២៩ ខែវិច្ឆិកា ឆ្នាំ២០២៣ កន្លងទៅថ្មីៗនេះ មានខ្មា.ន់កាំភ្លើ.ងម្នាក់ ដែលគេមិនស្គាល់អត្តសញ្ញាណ បានប្រើប្រាស់កាំភ្លើ.ងខ្លីដើរចូលទៅបា.ញ់ស្រោ.ចជាច្រើនគ្រា.ប់ទៅលើជនរងគ្រោះឈ្មោះ អ៊ូច សុខលៀប ដែលមានមុខរបរជាគ្រូបង្រៀន និងជាជាងជូសជុលទូរស័ព្ទផង ស្ថិតនៅក្នុងភូមិភ្នំសំពៅលិច ឃុំភ្នំសំពៅ ស្រុកបាណន់ ខណៈពេលដែលគាត់កំពុងដេកលើអង្រឹងមើលទូរស័ព្ទ ហើយគេសន្និដ្ឋានថា ផ្ដើមចេញពីរឿង«គំនុំ»។
សមត្ថកិច្ចដែលចុះទៅកាន់កន្លែងកើតហេតុ បានអះអាងថា «ខ្មា.ន់កាំភ្លើ.ងបានបា.ញ់សំដៅទៅជនរងគ្រោះចំនួន៣គ្រា.ប់ បណ្ដាលឲ្យរងរបួសជាច្រើនកន្លែង ត្រង់កែងដៃឆ្វេង និងត្រង់ពោះខាងឆ្វេង ដែលជាការប៉ុនប៉ងបា.ញ់សម្លា.ប់ តែសំណាងល្អជនគ្រោះគ្រាន់តែរងរបួសតែប៉ុណ្ណោះ។
ក្រោយបា.ញ់ប្រ.ហា.រទៅលើជនរងគ្រោះរួចហើយ ខ្មា.ន់កាំភ្លើ.ងនោះបានដើរចូលទៅក្នុងវត្តភ្នំសំពៅ ហើយក៏បានរត់បា.ត់ស្រមោលភ្លាមៗផងដែរ តាមច្រកផ្លូវតូចមួយ នៅប៉ែកខាងលិច នៃរបងវត្ត។ ហើយមានតែជនរងគ្រោះផ្ទាល់ និងប្រពន្ធជនរងគ្រោះប៉ុណ្ណោះ ដែលស្ថិតក្នុងហេតុការណ៍នេះ និងបានសម្លឹងមើលខ្មា.ន់កាំភ្លើ.ងខ្លីពីក្រោយទាំងស្រពិចស្រពិល ខណៈពេលជនដៃដល់រូបនោះដើរចូលវត្ត។
ដោយយោងលើចម្លើយព្រាលៗ បានបង្ហាញត្រឹមភិនភាគបែបស្រពិចស្រពិល ដែលប្រពន្ធជនរងគ្រោះ និងសាមីខ្លួនរងគ្រោះផ្ទាល់បានប្រាប់សមត្ថកិច្ចក្រោយកើតហេតុ ទើបកម្លាំងជំនាញ នៃអធិការស្រុកបាណន់ ដែលមានកិច្ចសហការពីមន្ត្រីការិយាល័យជំនាញ នៃស្នងការខេត្តផង បានធ្វើការស្រាវជ្រាវ រហូតកំណត់បាននូវមុខសញ្ញាជនសង្ស័យតាមភិនភាគដែលជនរងគ្រោះបានចង្អុលបង្ហាញ និងធ្វើការឃាត់ខ្លួនជនសង្ស័យរូបនោះភ្លាមៗតែម្ដង ដើម្បីនាំយកទៅសួរនាំ។
ជនសង្ស័យម្នាក់នោះមានឈ្មោះ កយ កុសល ហៅ វិត ភេទប្រុស អាយុ៣៣ឆ្នាំ ជាជនក្រីក្រ រស់នៅភូមិ-ឃុំជាមួយគ្រួសារជនរងគ្រោះផងដែរ។ ហើយជនម្នាក់នេះ ត្រូវបានសមត្ថកិច្ចស្នើសុំឲ្យតុលាការឃុំខ្លួនបណ្ដោះអាសន្នក្នុងពន្ធនាគាររហូតមកដល់សព្វថ្ងៃនេះ ក្រោយបញ្ចប់ការសួរនាំទាំងគ្មានភស្ដុតាងដាក់បន្ទុក សូម្បីប៉ុនក្រចក គ្មានសាក្សីច្បាស់លាស់ ក្រៅតែពីការចង្អុលបង្ហាញរបស់ប្ដីប្រពន្ធរងគ្រោះ ហើយជននេះក៏មិនបានសារភាពដែរ។
ប៉ុន្តែលោក លឹម ពុទ្ធីឡា ស្នងការរងទទួលផែនព្រហ្មទណ្ឌ ដែលដឹកនាំកម្លាំងជំនាញចុះធ្វើការងារនេះផ្ទាល់ បានអះអាងថា មានសាក្សីជាច្រើនបានចង្អុលបង្ហាញថា «ខ្មា.ន់កាំភ្លើ.ងដែលបា.ញ់ប្រ.ហា.រគ្រូបង្រៀនខាងលើ គឺជនស្ស័យឈ្មោះ វិត នេះហើយ»។
លោក លឹម ពុទ្ធីឡា បានបញ្ជាក់ប្រាប់រឿងនេះ នៅព្រឹកថ្ងៃទី០៨ ខែមករានេះ ដោយលោកបានរំលឹកថា «ជនសង្ស័យឈ្មោះ វិត នេះ ត្រូវបានឃាត់ខ្លួន ដោយយោងទៅលើការចង្អុលបង្ហាញរបស់ប្ដីប្រពន្ធជនរងគ្រោះ និងមានសាក្សីមួយចំនួនទៀត ដែលឃើញភិនភាគជននេះ ដើរសំដៅចូលវត្តភ្នំសំពៅ ក្រោយបា.ញ់ប្រ.ហា.រទៅលើជនរងគ្រោះ»។
លោកស្នងការរងបានបញ្ជាក់ថា «សមត្ថកិច្ចរកមិនឃើញភស្ដុតាងដាក់បន្ទុកលើជនរូបនេះទេ ហើយជនសង្ស័យក៏មិនបានសារភាពថា «ខ្លួនបានប្រព្រឹត្តដែរ»។ ប៉ុន្តែតុលាការសម្រេចឃុំខ្លួនជននេះជាបណ្ដោះអាសន្ន ដោយយោងទៅលើការចង្អុលបង្ហាញរបស់ជនរងគ្រោះ និងសាក្សីមួយចំនួនទៀត»។
លោកបានបន្ថែមថា «ពិតមែនតែតុលាការឃុំខ្លួនជនរូបនេះមែន តែរហូតមកដល់ពេលនេះ កម្លាំងការិយាល័យជំនាញ នៅតែបន្តបើកការស៊ើបអង្កេតនៅឡើយ មិនទាន់បិទសំណុំរឿងទេ»។
ពាក់ព័ន្ធក្នុងអំពើបា.ញ់ប្រ.ហា.រទៅលើគ្រូបង្រៀប ដែលគេអះអាងថា ផ្ដើមចេញពីរឿង«គំនុំ»នេះ បើតាមប្រភពពីប្រជាពលរដ្ឋមួយចំនួន នៅឃុំភ្នំសំពៅ ដែលបានបង្ហើបព័ត៌មានខ្លះៗ ហាក់មានការសន្និដ្ឋានប្រហាក់ប្រហែលគ្នាទៅលើជនសង្ស័យឈ្មោះ កយ កុសល ហៅ វិតនេះ។
ប្រភពបានលើកឡើងដូច្នេះថា «ជនដៃដល់ដែលបា.ញ់ប្រហារទៅលើលោក អ៊ូច សុខលៀប មិនមែនឈ្មោះ វិត នោះទេ គឺអាចមនុស្សផ្សេងទៀត។ បើតាមពិនិត្យជាក់ស្ដែងទៅលើឈ្មោះ វិត នេះ គាត់ជាគ្រួសារក្រីក្របំផុត ពុំមានលទ្ធភាពទិញកាំភ្លើ.ងខ្លីប្រើប្រាស់ ហើយក៏ពុំធ្លាប់មានប្រវត្តិចងគំនុំជាមួយគ្រួសារជនរងគ្រោះនេះដែរ។ នៅពេលកើតហេតុ ឈ្មោះវិត កំពុងតែនៅកន្លែងផ្សេង ហើយមានសាក្សីជាច្រើនបានដឹងរឿងនេះ។ ពួកគេបានទាមទាឲ្យសមត្ថកិច្ច ត្រូវតែធ្វើការស៊ើបអង្កេតឲ្យបានច្បាស់លាស់ឡើងវិញ ព្រោះគេជឿថា ឈ្មោះ វិត មិនជាប់ពាក់ព័ន្ធនឹងការបា.ញ់ប្រ.ហា.រនេះឡើយ តែអាចមានជនផ្សេងទៀត គឺជាអ្នកដៃដល់»។
ចំណែកជនរងគ្រោះ លោក អ៊ូច សុខលៀប ក៏បានលើកឡើងបែបនេះដែរថា «លោកមិនធ្លាប់មានជម្លោះជាមួយឈ្មោះ វិត នោះទេ»។ លោកបញ្ជាក់ដដែលថា «ដោយសារតែមិនទាន់ដឹងជនដៃដល់ពិតប្រាកដ ចឹងហើយទើបខ្ញុំនៅតែភ័យខ្លាច ព្រួយបារម្ភពីសុវត្ថិភាពផ្ទាល់ខ្លួន សម្ងំនៅតែក្នុងផ្ទះ មិនហ៊ានចេញក្រៅអស់រយៈពេលជាងមួយខែកន្លងមកនេះ»។
លោកគ្រូបង្រៀនរូបនេះបាននិយាយថា «ឥឡូវនេះ លោកបានផ្អាកទៅបង្រៀនជាបណ្ដោះអាសន្នសិន ដោយសុំច្បាប់គេសម្រាក០៣ខែ។ រីឯមុខរបរជួសជុលទូរស័ព្ទនៅផ្ទះវិញ ក៏លោកមិនបានធ្វើអ្វីទៀតដែរ ដែលទំនងត្រូវបិទចោលរហូតតែម្ដង បើសិនជាជនដៃដល់ពិតប្រាកដមិនទាន់រកឃើញមែន។ ព្រោះសព្វថ្ងៃនេះ លោកចេះតែស្រមៃឃើញថា «ស្រាប់តែនៅពេលកំពុងអង្គុយឈ្ងោកធ្វើទូរស័ព្ទសុខៗ គេនឹងលបចូលមកបា.ញ់បែបនេះម្ដងទៀត ហើយបើមានលើកនេះទៀត ប្រាកដជាស្លា.ប់ហើយ ចឹងហើយទើបលោកសម្ងំនៅតែក្នុងផ្ទះ»។
គាត់បានបញ្ជាក់ដែរថា «មួយរយៈចុងក្រោយនេះ មានសមត្ថកិច្ចមកជួបលោកសួរនាំរឿងនេះជាញឹកញាប់ ហើយលោកសង្ឃឹមថា សមត្ថកិច្ចនឹងស្វែងរកឃើញជនដៃដល់ពិតប្រាកដ»។
យ៉ាងណាក្ដី លោក លឹម ពុទ្ធីឡា ស្នងការរងទទួលផែនព្រហ្មទណ្ឌ បានបញ្ជាក់ដែរថា «ពិតមែនតែតុលាការបានសម្រេចឃុំខ្លួនជនសង្ស័យម្នាក់ពាក់ព័ន្ធនឹងករណីនេះជាបណ្ដោះអាសន្ន។ ប៉ុន្តែសំណុំរឿងនេះ នៅមិនទាន់ត្រូវបានបិទបញ្ចប់នៅឡើយទេ»។
លោកថា «លោកស្នងការខេត្ត និងតំណាងអយ្យការបានបញ្ជាឲ្យកម្លាំងជំនាញការិយាល័យព្រហ្មទណ្ឌកំរិតធ្ងន់ នៃស្នងការខេត្ត ដឹកនាំផ្ទាល់ដោយលោក វ៉ាន់ តារ៉ា នាយរងការិយាល័យ ដឹកនាំកម្លាំងជំនាញ ចុះស៊ើបអង្កេតលើករណីនេះបន្តទៀត រហូតមកដល់ពេលនេះ»៕
ចែករំលែកព័តមាននេះ