រាជធានីភ្នំពេញ ៖ ក្រោមការជួយឧបត្ថម្ភពីជំនួយវិហារដាណឺម៉ាក អង្គការជំនួយផ្លូវច្បាប់ដល់កុមារ និងស្ត្រីបានរៀបចំសិក្ខាសាលាពិគ្រោះយោបល់ស្តីពីការពិនិត្យ និងការផ្តល់អនុសាសន៍ទៅលើសេចក្តីព្រាងចុងក្រោយនៃអនុសញ្ញាអន្តរជាតិស្តីពីអ្នកធ្វើការតាមផ្ទះកាលពីថ្ងៃទី២៥ ឧសភា នៅសណ្ឋាគារកាំបូឌីយ៉ាណា
រាជធានីភ្នំពេញ ៖ ក្រោមការជួយឧបត្ថម្ភពីជំនួយវិហារដាណឺម៉ាក អង្គការជំនួយផ្លូវច្បាប់ដល់កុមារ និងស្ត្រីបានរៀបចំសិក្ខាសាលាពិគ្រោះយោបល់ស្តីពីការពិនិត្យ និងការផ្តល់អនុសាសន៍ទៅលើសេចក្តីព្រាងចុងក្រោយនៃអនុសញ្ញាអន្តរជាតិស្តីពីអ្នកធ្វើការតាមផ្ទះកាលពីថ្ងៃទី២៥ ឧសភា នៅសណ្ឋាគារកាំបូឌីយ៉ាណា។
លោកស្រីពឹង ធីតា នាយិកាស្តីទីនៃអង្គការជំនួយផ្លូវច្បាប់ដល់កុមារ និងស្ត្រី បានថ្លែងថា អង្គការជំនួយផ្លូវច្បាប់ដល់កុមារ និងស្ត្រីបានបង្កើតឡើងនៅក្នុងឆ្នាំ២០០២ ដោយមានគោលបំណងជាចំបងក្នុងការលើកកំពស់សិទ្ធិស្ត្រី និងកុមារកម្ពុជាតាមរយៈការផ្តល់នូវសេវាកម្មផ្នែកច្បាប់ ការតស៊ូមតិ និងការលើកកំពស់ចំណេះដឹងជាសាធារណៈដល់ប្រជាពលរដ្ឋដើម្បីឱ្យពួកគេមានលទ្ធភាពក្នុងការទាមទារបាននូវសិទ្ធិ និងសេរីភាពរបស់ពួកគេដែលតែងតែត្រូវបានគេរំលោភបំពាន។ ជាមួយគ្នានេះផងដែរ អង្គការជំនួយផ្លូវច្បាប់ដល់កុមារ និងស្ត្រីក៏បានធ្វើការងារជាមួយនឹងអាជ្ញាធរមូលដ្ឋានក្នុងគោលដៅដើម្បីបង្កើននូវចំណេះដឹង និងជំនាញផ្នែកច្បាប់ដល់ពួកគេដើម្បីឱ្យពួកគេអាចមានលទ្ធភាព និងសមត្ថភាពពេញលេញក្នុងការផ្តល់សេវាកម្មមានប្រសិទ្ធភាពនិងទាន់ពេលវេលាដល់ស្ត្រី និងកុមារ ដែលត្រូវបានគេរំលោភបំពាន។
ការរៀបចំសិក្ខាសាលាពិគ្រោះយោបល់ស្តីពីការពិនិត្យ និងការផ្តល់យោបល់លើសេចក្តីព្រាងចុងក្រោយនៃអនុសញ្ញាអន្តរជាតិស្តីពីអ្នកធ្វើការងារតាមផ្ទះនាថ្ងៃនេះជាផ្នែកមួយនៃកម្មវិធីតស៊ូមតិរបស់អង្គការជំនួយផ្លូវច្បាប់ដល់កុមារ និងស្ត្រីដើម្បីលើកកំពស់សិទ្ធិសេរីភាព និងកិច្ចការពារដល់អ្នកធ្វើការងារតាមផ្ទះ ដែលភាគច្រើនជាស្ត្រី និងកុមារ។ សិក្ខាសាលាពិគ្រោះយោបល់នេះជាសិក្ខាសាលាពិគ្រោះយោបល់លើកទី២បន្ទាប់ពីការរៀបចំកិច្ចពិគ្រោះយោបល់លើកទី១បានធ្វើឡើងក្នុងគោលបំណងដើម្បីពិនិត្យ និងផ្តល់អនុសាសន៍រួមគ្នាទៅលើសេចក្តីព្រាងចុងក្រោយនៃអនុសញ្ញារបស់អង្គការពលកម្មអន្តរជាតិស្តីពីអ្នកធ្វើការងារតាមផ្ទះ ដែលសេចក្តីព្រាងចុងក្រោយនេះនឹងត្រូវបានគេលើកយកទៅពិភាក្សា និងអនុម័តដោយរដ្ឋជាភាគីរបស់អង្គការពលកម្មអន្តរជាតិ នាសន្និសីទពេញអង្គលើកទី១០០របស់អង្គការពលកម្មអន្តរជាតិនៅខែមិថុនា ឆ្នាំ២០១១ ខាងមុខនេះ។ អនុសាសន៍ ឬក្តីកង្វល់នានាដែលបានមកពីសិក្ខាសាលាពិគ្រោះយោបល់នេះនឹងដាក់ជូនទៅតំណាងរាជរដ្ឋាភិបាល និងសហជីពដើម្បីពិចារណាមុនពេលទៅចូលរួមក្នុងកិច្ចប្រជុំពិភាក្សារបស់អង្គការពលកម្មអន្តរជាតិនាពេលខាងមុខនេះ។
លោកស្រី ពឹង ធីតា បញ្ជាក់ថា ការលើកយករបៀបវារៈស្តីពីការងារសមរម្យសំរាប់អ្នកធ្វើការងារតាមផ្ទះជានិន្នាការមួយដែលជំរុញឱ្យមានការទទួលស្គាល់ និងការការពារអ្នកធ្វើការងារតាមផ្ទះដូចជាអ្នកធ្វើការងារផ្សេងៗទៀតដែរ ហើយអស់រយៈពេលជាយូរមកហើយដែលប្រភេទការងារតាមផ្ទះនេះមិនត្រូវគេទទួលស្គាល់ និងទទួលបានការការពារដោយច្បាប់នៅឡើយ។ ទើបតែពេលនេះការផ្តួចផ្តើមគំនិតដើម្បីឱ្យមានការពិភាក្សាគ្នាលើរបៀបវារៈការងារសមរម្យសំរាប់អ្នកធ្វើការងារតាមផ្ទះត្រូវបានធ្វើឡើងដោយអង្គការពលកម្មអន្តរជាតិនាកិច្ចប្រជុំពេញអង្គរបស់ខ្លួននាឆ្នាំ២០០៨ កន្លងទៅនេះ ហើយរហូតមកដល់ពេលនេះសេចក្តីព្រាងអនុសញ្ញារបស់អង្គការពលកម្មអន្តរជាតិបានលេចចេញជារូបរាង ហើយសេចក្តីព្រាងនេះនឹងក្លាយជាច្បាប់អន្តរជាតិមួយដ៏មានតម្លៃបំផុតក្នុងការការពារសិទ្ធិសេរីភាព និងឈានទៅលុបបំបាត់នូវរាល់ទម្រង់នៃពលកម្មបែបទាសភាព និងពលកម្មកុមារក្នុងវិស័យការងារតាមផ្ទះនៅពេលដែលរដ្ឋជាភាគីទាំងអស់របស់អង្គការពលកម្មអន្តរជាតិដែលរួមមានរដ្ឋាភិបាល សហជីព និងសមាគមនិយោជកគាំទ្រអនុម័តលើសេចក្តីព្រាងនេះនាខែមិថុនា ឆ្នាំ២០១១ ៕
ចែករំលែកព័តមាននេះ