លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី កាលពីថ្ងៃទី២៨ ខែធ្នូ ឆ្នាំ២០២៣ បានកើតទុក្ខមិនសុខចិត្ត ហើយចេញសេចក្ដីស្រាយបំភ្លឺ រឿងភូ.តកុហកថ្នាក់លើ ដោយបានច្រានចោលនៅទឹកប្រាក់ជាង៧លានរៀល ដែលបងប្អូនអ្នកភូមិ
ខេត្តរតនគិរី ៖ លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី កាលពីថ្ងៃទី២៨ ខែធ្នូ ឆ្នាំ២០២៣ បានកើតទុក្ខមិនសុខចិត្ត ហើយចេញសេចក្ដីស្រាយបំភ្លឺ រឿងភូ.តកុហកថ្នាក់លើ ដោយបានច្រានចោលនៅទឹកប្រាក់ជាង៧លានរៀល ដែលបងប្អូនអ្នកភូមិរៃអង្គាសបាននោះ ថា ជាប្រាក់របស់គណ:កម្មាធិការអភិវឌ្ឍន៍ភូមិបានផ្ដល់ឲ្យ ដើម្បីយកទៅធ្វើផ្លូវ សម្រួលដល់ការធ្វើចរាចរណ៍ជាបណ្ដោះអាសន្នទៅវិញ។
រីឯការច្រានចោលរបស់លោក អៀន អឿន រូបនោះ ក៏បានធ្វើឲ្យកម្លាំងប្រជាពលរដ្ឋជាង៣០០គ្រួសារ រួមនឹងមេភូមិចាអ៊ុងកៅ និងចាអ៊ុងចាន់ផងដែរ បានបញ្ចេញប្រតិកម្មខឹងសម្បាយ៉ាងខ្លាំង ហើយក៏ចង់ឲ្យលោកប្រធានមន្ទីរអភិវឌ្ឍន៍ជនបទរូបនោះ បង្ហាញឯកសារចំណាយសាច់ប្រាក់របស់គណៈកម្មាធិការអភិវឌ្ឍន៍ភូមិ យកមកដាក់នៅលើតុ ដើម្បីបង្ហាញមហាជនឲ្យបានដឹងផង។ តែបើពុំមានឯកសារទេនោះ តម្រូវឲ្យលោក អៀម អឿន ត្រូវតែធ្វើការសុំទោស ដោយលាយលក្ខណ៍ជាអក្សរ និងសុំទោសជាសាធារណៈ ទើបពួកគាត់ស្ងប់ចិត្តវិញ។
ពេលនេះ តំណាងប្រជាពលរដ្ឋជាង៣០០គ្រួសារ គឺលោក ភួយ វណ្ណា បានបញ្ជាក់ថា «នៅថ្ងៃទី៥ ខែមករា ឆ្នាំ២០២៤នេះ លោក អៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី ក៏បានមកសុំអភ័យទោសនៅចំពោះមុខតំណាងប្រជាពលរដ្ឋហើយ។ តែការសុំទោសនោះ នៅពុំទាន់បានធ្វើការសុំទោស ដោយលាយលក្ខណ៍ជាអក្សរ និងសុំទោសជាសាធារណៈនៅឡើយទេ»។
រដ្ឋមន្ត្រីក្រសួងអភិវឌ្ឍន៍ជនបទ ក៏បានផ្ដាំផ្ញើតាមរយៈលោកអភិបាលខេត្តរតនគិរី ឲ្យជួយសួរសុខទុក្ខ និងថ្លែងអំណគុណដល់បងប្អូនប្រជាពលរដ្ឋជាង៣០០គ្រួសារនោះផងដែរ ដែលបានរៃអង្គាសប្រាក់ផ្ទាល់ខ្លួនយកទៅធ្វើជាផ្លូវបេតុង បានប្រវែង៧០ម៉ែត្រ នៅស្រុកអូរជុំនោះ។
ហើយថ្ងៃទី៦ ខែមករា ឆ្នាំ២០២៤នេះ លោកអភិបាលខេត្តរតនគិរី រួមនឹងមន្ត្រី បាននាំយកថវិកាមួយចំនួន និងផ្ដាំផ្ញើរបស់រដ្ឋមន្ត្រីក្រសួងអភិវឌ្ឍន៍ជនបទ ទៅសួរសុខទុក្ខ និងជូនដល់តំណាងប្រជាពលរដ្ឋដល់ទីតាំងតែម្ដង គឺនៅលើកំណាត់ផ្លូវបេតុង ប្រវែង៧០ម៉ែត្រ ស្ថិតនៅក្នុងឃុំចាអ៊ុង ស្រុកអូជុំ ខេត្តរតនគិរី។
លោក ញ៉ែម សំអឿន អភិបាលខេត្តរតនគិរី បានថ្លែងកោតសរសើរយ៉ាងជ្រាលជ្រៅ ចំពោះសមិទ្ធផលដែលកើតចេញពីកម្លាំងសាមគ្គីរបស់បងប្អូននៅទីនោះ បើទោះបីការធ្វើផ្លូវនោះ ពុំមានអ្នកបច្ចេកទេសចូលរួមក៏ដោយ។ តែក៏អាចប្រើប្រាស់បានក្នុងការធ្វើដំណើររបស់បងប្អូនយើងនៅក្នុងមូលដ្ឋាននេះ និងមានអត្ថន័យសម្រាប់ខេត្តរតនគិរី ព្រមទាំងទូទាំងប្រទេសផងដែរ។
ក្នុងនាមជាអាជ្ញាធរខេត្ត សុំឲ្យមានការយោគយល់ពីសំណាក់បងប្អូនប្រជាពលរដ្ឋផងដែរ ព្រោះថា កាលពីពេលកន្លងមក មានការភាន់ច្រឡំបន្ដិចបន្តួច ពីប្រធានមន្ទីរអភិវឌ្ឍន៍ជនបទខេត្តរតនគិរី ហើយលោក អៀម អឿន វិញ ក៏បានធ្វើការសុំទោសផងដែរ។ រដ្ឋមន្ត្រីក្រសួងអភិវឌ្ឍន៍ជនបទ លោកក៏បានថ្លែងអំណរអរគុណពីចម្ងាយដល់បងប្អូនជាង៣០០គ្រួសារនោះ តាមរយៈលោកដែរ។
នៅក្នុងឱកាសនោះ លោកអភិបាលខេត្ត ក៏បានផ្ដល់ថវិកាចំនួន៥០ម៉ឺនរៀល និងស្រាបៀរចំនួន២០កេស ជូនបងប្អូន ដើម្បីជាការចូលរួមលើកទឹកចិត្ត និងធ្វើកិច្ចពិធីសម្ភោធដាក់ឲ្យប្រើប្រាស់នៅផ្លូវបេតុងប្រវែង៧០ម៉ែត្រនោះ។
លោកអភិបាលខេត្តថា កាលពីពេលថ្មីៗកន្លងមកនេះ លោកបានជួបជាមួយរដ្ឋមន្ត្រីក្រសួងអភិវឌ្ឍន៍ជនបទ ខណៈនោះលោកបានលើកឡើងពីទុក្ខលំបាករបស់បងប្អូនយើង គឺរឿងផ្លូវលំជាង៣៨គីឡូម៉ែត្រ ដែលត.ភ្ជាប់ពីផ្លូវជាតិលេខ៧៨ កាត់ស្រុកអូរជុំ ឆ្ពោះទៅឃុំហាត់ប៉ក់ ស្រុកវ៉ឺនសៃ ដែលបច្ចុប្បន្នពុំទាន់បានធ្វើឲ្យល្អប្រសើរជូនបងប្អូនបានធ្វើដំណើរ និងប្រើប្រាស់ទៅតាមតម្រូវកានៅឡើយទេ។
គួរបញ្ជាក់ថា កាលពីថ្ងៃទី២២ ខែធ្នូ ឆ្នាំ២០២៣ ប្រជាពលរដ្ឋរស់នៅឃុំចាអ៊ុង ស្រុកអូរជុំ ចំនួន៣១០គ្រួសារ បាននាំគ្នារៃប្រាក់ ដោយក្នុងមួយគ្រួសារចំនួន២ម៉ឺនរៀលយកទៅធ្វើផ្លូវបេតុងបានប្រវែង៧០ម៉ែត្រ ដើម្បីសម្រួលដល់ការធ្វើដំណើររបស់ពួកគាត់ ដោយសារតែផ្លូវនោះ បានរងការខូចខាតយ៉ាងធ្ងន់ធ្ងរទៅហើយ ពិបាកក្នុងការធ្វើដំណើរចេញចូលភូមិណាស់។
ចែករំលែកព័តមាននេះ