ប្រផ្នូលមិនល្អ! ក្រោយប្រទះឃើញត្រីនាគ ជប៉ុនជួបគ្រោះរញ្ជួយដី ខណៈថៃកំពុងភ័.យពីរលកយក្សស៊ូណាមិ
ថៃ ៖ ការប្រទះឃើញវត្តមានត្រី oarfish មិនមែនជាប្រផ្នូលធម្មតានោះទេសម្រាប់សកលលោក ជា
ថៃ ៖ ការប្រទះឃើញវត្តមានត្រី oarfish មិនមែនជាប្រផ្នូលធម្មតានោះទេសម្រាប់សកលលោក ជាពិសេសក្នុងជំនឿ តាំងពីយូលង់របស់ប្រជាជនជប៉ុនដែលចាត់ទុកថា oarfish គឺជាអ្នកនាំសារពីព្រះសមុទ្រ ដើម្បីព្រមានពួកគេថា គ្រោះមហន្តរាយនឹងមកដល់។ រឿងព្រេងជប៉ុនមួយបានកត់ត្រាឈ្មោះត្រីនេះថា «Earthquake Fish» ឬ «ត្រីរញ្ជួយដី» ព្រោះវារមែងបង្ហាញខ្លួនឱ្យឃើញ នៅមុន ឬក្រោយពេល នៃគ្រោះរញ្ជួយដីក្នុងមហាសមុទ្រ ដែលយើងគ្រប់គ្នាហៅតាមភាសាជប៉ុនថា «រលកយក្សស៊ូណាមិ»។
ជាក់ស្តែងយោងតាមសារព័ត៌មាន PBS World និង The Nation បានចេញផ្សាយនៅថ្ងៃទី០៥ ខែមករានេះ ដោយបានអំពាវនាវ សូមកុំអោយប្រជាពលរដ្ឋថៃ មានការខ្លាចរអារ ចំពោះព័ត៌មាននៃការប្រទះឃើញត្រីនាគ នៅក្នុងឈូងសមុទ្រថៃកាលពីថ្ងៃពុធនោះ។ ដើមហេតុដំបូង អ្នកជំនាញបរិស្ថានសមុទ្រល្បីឈ្មោះម្នាក់ គឺលោកបណ្ឌិត Thon Thamrongnawasawat បានបង្ហោះនៅលើទំព័រហ្វេសប៊ុករបស់ខ្លួនថា ត្រី oarfish ដែលពលរដ្ឋថៃហៅថា ត្រីនាគ ត្រូវបានគេចាប់បាននៅក្នុងសមុទ្រនៃខេត្ត Satun ភាគខាងត្បូងប្រទេសថៃ។ ក្រោយការបង្ហោះនោះ ទោះបីជាអនុប្រធានមហាវិទ្យាល័យជលផលនៃសាកលវិទ្យាល័យ Kasetsart បានបញ្ជាក់ថា ត្រីនាគនេះ ត្រូវបានរកឃើញជាទូទៅទូទាំងពិភពលោកក៏ដោយ ក៏ប្រជាជនថៃមួយចំនួននៅតែភ្ញាក់ផ្អើលខ្លាំងជាមួយនឹងការរកឃើញនេះ។
ដើមហេតុចម្បងដែលពលរដ្ឋថៃភិតភ័យនោះ ដោយសារតែ ប្រទេសជប៉ុនទើបតែជួបនូវគ្រោះរញ្ជួយដី រួមទាំងការព្រមាន ពីរលកយក្សស៊ូណាមិ ហើយមុនពេលគ្រោះធម្មជាតិទាំងនេះកើតឡើង ត្រីនាគដ៏កម្រពីរក្បាល ត្រូវបានចាប់បានពីកោះអូគីណាវ៉ា កាលពីខែមករា ក្រោយមកនៅខែកក្តដា ត្រីដដែលនេះ ត្រូវបានក្រុមអ្នកមុជទឹកប្រទះឃើញហែលក្នុងសមុទ្រតៃវ៉ាន់ ដែលបានបង្កឱ្យមានការជជែកវែកញែកជាថ្មីនៅលើបណ្តាញសង្គមអំពីសេចក្តីវិនាសដែលជិតមកដល់។ វត្តមានត្រីនាគ បានធ្វើអោយក្រុមអ្នកមានជំនឿ នឹកដល់ហេតុការណ៍ស៊ូណាមិឆ្នាំ២០១១ ដែលកាលនោះក្រោយត្រីនាគ២០ក្បាលប្រទះឃើញងាប់ នៅលើឆ្នេរសមុទ្រជប៉ុនមិនបានប៉ុន្មានខែផង ស្រាប់តែរលកយក្សស៊ូណាមិពិតជាបានកើតឡើងពិតប្រាកដមែន។ ទោះជាយ៉ាងណាការអះអាងបែបនេះ ត្រូវបានអ្នកវិទ្យាសាស្ត្រជំទាស់ ហើយថា ជារឿងចៃដន្យ។
អ្នកជំនាញបានច្រានចោលការលើកឡើងមួយចំនួនដែលថា ការរកឃើញត្រីនាគ អាចជាសញ្ញានៃការរញ្ជួយដីក្រោមសមុទ្រនាពេលខាងមុខ ដោយពន្យល់ថា ត្រីប្រភេទនេះត្រូវបានរកឃើញនៅក្នុងសមុទ្រដែលមានជម្រៅទូទាំងពិភពលោក លើកលែងតែនៅតំបន់ប៉ូល ប៉ុន្តែឱកាសដែលបានឃើញត្រីប្រភេទនោះមានតិចបំផុត ព្រោះពួកវារស់នៅក្នុងតំបន់ទឹកជ្រៅចន្លោះពី 200 ទៅ 1,000 ម៉ែត្រ នៃមហាសមុទ្រប៉ាស៊ីហ្វិក និងមហាសមុទ្រឥណ្ឌា។
ងាកមករឿងដែលកំពុងផ្ទះនៅប្រទេសថៃវិញ ដោយសារតែប្រទេសនេះ ធ្លាប់រងគ្រោះដោយរលកយក្សស៊ូណាមិកាលពីឆ្នាំ២០០៤ បូករួមជាមួយជំនឿ ក៏ដូចជារឿងចៃដន្យផ្ទួនៗបែបនេះនោះ ការបង្ហោះពីប្រទះឃើញ ត្រីនាគ មិនមែនជារឿងលេងសើច សម្រាប់ពួកគេ ឡើយ ដោយហេតុនេះហើយ ឈានមកដល់ថ្ងៃទី០៥ ខែមករា នេះ មនុស្សតែមួយដែលធ្វើអោយរឿងត្រីនាគនិងរលក្សយក្សស៊ូណាមិ ផ្ទុះឡើងនៅប្រទេសថៃ បានចេញមុនមកបកស្រាយពន្យល់ដោយលើកយកអំណះអំណាងនិងភុស្តតាងវិទ្យាសាស្ត្រមកបង្ហាញ ដើម្បីបន្សាបការភិតភ័យក្នុងស្រទាប់ប្រជានជនថៃ។
លោកបណ្ឌិត Thon Thamrongnawasawat បានដកស្រង់ឯកសារស្តីរលកយក្សស៊ូណាមិ មកអះអាងថា វដ្តនៃការរញ្ជួយដីដ៏ធំនៅមហាសមុទ្រឥណ្ឌាខាងកើតគឺវែងណាស់ ស៊ូណាមិតទើបតែកើតឡើងក្នុងឆ្នាំ ២០០៤ ដូចនេះឱកាសនៃការកើតឆ្នាំក្នុងឆ្នាំ២០២៤នេះមានតិចតួចណាស់។ ប៉ុន្តែបើទោះបី ជាមានរលកយក្សស៊ូណាមិ កើតឡើងមែន ប្រទេសថៃ នៅតែមានសំណាងជាងប្រទេសដទៃ ដូចជាឥណ្ឌូនេស៊ីជាដើម។ លោកពន្យល់ថា ប្រសិនបើស៊ូណាមិនកើតឡើង ថៃនៅតែមានពេលវេលាគ្រប់គ្រាន់ដើម្បីជម្លៀសខ្លួនដើម្បីសង្គ្រោះជីវិត។
ជាក់ស្តែង នាយកដ្ឋានឧតុនិយមថៃ គឺជាទីភ្នាក់ងារចម្បងដែលទទួលព័ត៌មាននេះជាផ្លូវការ ដោយមជ្ឈមណ្ឌលជាតិព្រមានពីគ្រោះមហន្តរាយ ដែលជាទីភ្នាក់ងារប្រកាសអាសន្នក្នុងស្រុក ទទួលបានព័ត៌មាននេះក្នុងពេលជាក់ស្តែងផងដែរ។អង្គភាពទាំងពីរនឹងដំណើរការដោយស្វ័យប្រវត្តិ ហើយមានបុគ្គលិក ២៤ម៉ោងក្នុងមួយថ្ងៃ ដើម្បីប្រាកាសសញ្ញាអាសន្នតាមវិទ្យុ ទូរទស្សន៍ សារSMS ប្រព័ន្ធផ្សព្វផ្សាយសង្គម និងបណ្តាញទំនាក់ទំនងផ្សេងទៀត។ យ៉ាងណាក៏ដោយ ខេត្តជាប់ឆ្នេរសមុទ្រចំនួន ៤ របស់ថៃ មានហានិភ័យនៃរលកយក្សស៊ូណាមិប្រសិនបើមានការរញ្ជួយដីដ៏ធំ (កម្រិត 5 រ៉ិចទ័រ) នៅមហាសមុទ្រឥណ្ឌា។ ខេត្ត Phang Nga និង Phuket នៅភាគខាងលិចទំនងជារងគ្រោះខ្លាំងជាងខេត្តដទៃទៀត។ ប៉ុន្តែមានតែនៅក្នុងតំបន់ដែលមិនលើសពី 10ម៉ែត្រពីលើនីវ៉ូទឹកសមុទ្រ។
ដើម្បីឆ្លើយតបនឹងរលកយក្ស នាយកដ្ឋានជំនាញ និងអាជ្ញាធរ មូលដ្ឋានបានបំពាក់ស្លាកសញ្ញាសម្គាល់តំបន់គ្រោះថ្នាក់ និងតំបន់សុវត្ថិភាពរួចហើយ។ ប្រធានបទជុំវិញរលកយក្សស៊ូណាមិ ដែលកំពុងកក្រើកក្នុងប្រទេសថៃនាថ្ងៃនេះ ត្រូវបានអ្នកជំនាញចាត់ទុកថា ជារឿងល្អ សម្រាប់ទាំងភាគីពាក់ព័ន្ធ ដើម្បីជាសារដាស់តឿនពីការត្រៀមខ្លួន សម្រាប់មន្ត្រី ក៏ដូចជាប្រជាពលរដ្ឋ និងអាជីវករនៅតំបន់ឆ្នេរសមុទ្រ ព្រោះថា រលកយក្សស៊ូណាមិ គឺជាគ្រោះធម្មជាតិដែលមិនអាចទាយទុកជាមុនបានទេ៕ (ដោយ ៖ អោម ចែតច័ន្ទណារ៉ា)
ចែករំលែកព័តមាននេះ