រាជធានីភ្នំពេញ ៖ នៅទីស្នាក់ការកណ្តាលកាកបាទក្រហមកម្ពុជា កាលពីថ្ងៃទី២៥ ឧសភា លោកជំទាវកិត្តិព្រឹទ្ធបណ្ឌិត ប៊ុន រា៉នី ហ៊ុនសែន ប្រធានកាកបាទក្រហមកម្ពុជា បានទទួលជួបពិភាក្សាជាមួយភរិយាឯកអគ្គរដ្ឋទូតឥណ្ឌូណេស៊ី និងសិង្ហបុរី ។
លោកជំទាវម៉ែន នារីសោភ័គ អគ្គលេខាធិការរងកាកបាទក្រហមកម្ពុជា បានមានប្រសាសន៍ថា ជំនួបពិភាក្សានោះ គឺផ្តោតទៅលើការងារ និងភាពរីកចម្រើនរបស់កាកបាទក្រហមកម្ពុជា ស្ថិតនៅក្រោមការដឹកនាំដ៏ឈ្លាសវៃរបស់លោកជំទាវកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ។ លោកជំទាវកិត្តិព្រឹទ្ធបណ្ឌិតបានលើកកម្ពស់ការយល់ដឹងបំផុសកម្លាំងអ្នកស្ម័គ្រចិត្តទូទាំងប្រទេស និងការរកមូលនិធិទទួលបានជោគជ័យគួរជាទីគាប់ចិត្ត ហើយសាខាទាំង២៤ខេត្ត-ក្រុង ក៏បានប្រារព្ធនូវទិវាពិភពលោកកាកបាទក្រហមអឌ្ឍច័ន្ទក្រហមនេះដែរ ថែមទាំងទទួលបាននូវការគាំទ្រពីគ្រប់មជ្ឈដ្ឋានទៀតផង ។ ថវិកាដែលស្នាក់ការកណ្តាលទទួលបានពីទិវា៨ឧសភា បានធ្វើការបែងចែកជូនទៅដល់បណ្តាសាខាមួយចំនួនដែលមានលទ្ធភាពតិចតួចក្នុងការរកមូលនិធិ ដើម្បីឱ្យសាខាទាំងនោះមានលទ្ធភាពជួយដល់ប្រជាពលរដ្ឋបានទាន់ពេលវេលា ។ កាកបាទក្រហមកម្ពុជាក៏បានជួយដល់ជនភៀសសឹកដែលកើតពីការឈ្លានពានរបស់សៀម ដោយចម្អិនអាហារដល់ជនភៀសសឹក ជួយគ្រប់គ្រងនៅក្នុងជំរំ ជួយផ្តល់ទឹកស្អាត និងស្បៀងអាហារ និងជួយជួសជុលសាងសង់ផ្ទះប្រជាពលរដ្ឋចំនួន៤៨ខ្នង ដែលរងនូវការខូចខាតដោយសារគ្រាប់ផ្លោងរបស់ទាហានសៀម។
លោកជំទាវភរិយាទូតឥណ្ឌូណេស៊ី បានសម្តែងនូវការចាប់អារម្មណ៍ចំពោះសកម្មភាពដ៏មមាញឹករបស់កាកបាទក្រហមកម្ពុជា ។ លោកជំទាវបានធ្វើការប្រៀបធៀបកម្ពុជា និងឥណ្ឌូណេស៊ីថា នៅប្រទេសឥណ្ឌូណេស៊ីក៏មានការចាប់រំលោភដែរ តែភាគច្រើនកើតមានតែនៅក្នុងទីក្រុងប៉ុណ្ណោះ។ ចំណែកឯនៅក្នុងប្រទេសកម្ពុជាវិញ អំពើចាប់រំលោភភាគច្រើនកើតមានតែនៅតាមទីជនបទទៅវិញ។ ចំពោះបញ្ហាអេសដ៍វិញ កម្ពុជាក៏ទទួលបានជោគជ័យលើបញ្ហាទប់ស្កាត់ការរីករាលដាលនៃមេរោគអេដស៍ដែរ គឺជាជោគជ័យដ៏ធំមួយ ។ បញ្ហាចម្លងមេរោគអេដស៍នៅឥណ្ឌូណេស៊ី ភាគច្រើនគឺបណ្តាលមកពីការប្រើប្រាស់ថ្នាំញៀន។ រីឯលោកជំទាវភរិយាទូតសិង្ហបុរី ក៏បានសម្តែងនូវការចាប់អារម្មណ៍ ចំពោះសកម្មភាពរីកចម្រើនរបស់កាកបាទក្រហមកម្ពុជាដែរ ហើយលោកជំទាវចង់ដកស្រង់បទពិសោធន៍ពីលោកជំទាវ ប៊ុន រ៉ានី ហ៊ុន សែន៕
ចែករំលែកព័តមាននេះ