ព្រះភូម ឬរានទេវតា តាមថែរក្សាម្ចាស់ផ្ទះ បើសិនអ្នកប្រណិប័តន៍នូវរឿងមួយចំនួនបានត្រឹមត្រូវ
រាជធានីភ្នំពេញ ៖ ព្រះភូម ឬរានទេវតា ត្រូវបានប្រជាពលរដ្ឋទូទៅតែងរៀបចំដាក់នៅខាងមុខផ្ទះ
រាជធានីភ្នំពេញ ៖ ព្រះភូម ឬរានទេវតា ត្រូវបានប្រជាពលរដ្ឋទូទៅតែងរៀបចំដាក់នៅខាងមុខផ្ទះ និងដាក់សំណែន ដើម្បីសុំសេចក្តីសុខ ហើយព្រះភូម គឺជាពពួកទេវតាដែលតាមថែរក្សាម្ចាស់ផ្ទះ ពេលខ្លះទៀត នៅពេលណាដែលម្ចាស់ផ្ទះអាចនឹងមានគ្រោះ មានភ័យ ឬមានអន្តរាយអ្វីមួយកើតមានដល់ម្ចាស់ផ្ទះ គឺពពួកទាំងអស់នឹងតែងពន្យល់សប្តិប្រាប់ឱ្យដឹងមុន។
ប្រាកដណាស់ នៅពេលយើងធ្វើផ្ទះ ឬដាក់ព្រះភូម ឬដាក់រានទេវតា ឱ្យពពួកទេព្តានៅអញ្ចឹងទៅ ប្រសិនបើថ្ងៃសីល ឬថ្ងៃឧបោសថសីល ហើយម្ចាស់ផ្ទះនោះចេះធ្វើបុណ្យ ចេះធ្វើទាន ដឹងគុណឪពុកម្តាយ គឺពពួកអស់នឹងតាមថែរក្សាម្ចាស់ផ្ទះណាស់ ។ រឿងព្រហ្មមញ្ញសាសនា និងព្រះពុទ្ធសាសនា គឺខ្មែរយើងកាន់ទាំង២ ។
ព្រះភូម ឬរានទេវតា ដែលយើងតែងតែដាក់នៅផ្ទះសម្បែង ហើយព្រះភូមនេះ សូមជម្រាបថា រឿងជំនឿទាំងព្រះពុទ្ធសាសនាក្តី ទាំងព្រហ្មមញ្ញសាសនាក្តី យើងជឿអាស្រ័យលើសិទ្ធិរបស់យើងម្នាក់ៗទេ ។ ប៉ុន្តែព្រះភូម ឬរានទេវតានេះ ចាស់បុរាណខ្មែរយើង គាត់តែងតែរៀបជាកូនផ្ទះតូចមួយដាក់ចំហៀងផ្ទះ ឬដាក់ពីមុខផ្ទះ តែហាមដាច់ខាតមិនអោយយើងដាក់ក្រោមផ្ទះទេ ។
ទាក់ទងនឹងចំណេះដឹងការដាក់ព្រះភូម ឬរានទេព្តានេះដែរ ព្រះវិរិយធម្មញាណពៅ ស៊ត គង់ នៅវត្តថាន់កុដិលេខ១ រាជធានីភ្នំពេញ បានចែករំលែកឱ្យដឹងទាំងអស់គ្នាថា ព្រះភូមទេវតា ឬរានទេវតានេះ គេដាក់នឹង គឺភាគច្រើនគេដាក់សម្រាប់ឱ្យពពួកភូមទេវតារស់នៅ មានដូចជាអរុក្ខទេវតា ភូមិទេវតាដែលយើងហៅថាម្រេញគង្វាល ។ ហើយការដាក់ទាំងអស់នឹង គឺនៅពេលថ្ងៃសីល ថ្ងៃឧបោសថសីល ម្ចាស់ផ្ទះ តែងយកផ្លែឈើ នំនែក ចេកអំពៅ ឬក៏ស្កគ្រាប់ ដាក់ក្នុងចាន ដាក់លើព្រះភូម ឬរានទេវតា ដើម្បីឱ្យពពួកអស់ទាំងនឹងសេពសោយ ។ ទាំងនេះអបិយជំនឿខ្មែរបុរាណដូនតាយើងតែងតែបន្សល់ទុកមកតាំងពីយូរយារណាស់មកហើយ ។
ព្រះវិរិយធម្មញាណពៅ ស៊ត គង់ មានថេរដីកាបន្តថា «ដូចអាត្មាបញ្ជាក់អញ្ចឹង រឿងញាតិញោមជឿមិនជឿ អាស្រ័យទៅលើញាតិញោមទេ អាត្មាគ្រាន់តែប្រាប់រឿងក្បួនបុរាណខ្មែរយើង ។ ពពួកអស់នឹង អាត្មាសូមបញ្ជាក់បន្តិច ពពួកភូមិទេវតា ពពួកអរុក្ខទេវតា ឬក៏ជំនាងផ្ទះ ឬក៏ពពួកអមនុស្សទាំងអស់នឹង ដែលយើងធ្វើផ្ទះ ធ្វើអីឱ្យគេនៅចឹងទៅ ប្រសិនបើថ្ងៃសីល ថ្ងៃឧបោសុទ្ធសីល ម្ចាស់ផ្ទះនៅចេះធ្វើបុណ្យ ចេះធ្វើទាន ដឹងគុណម៉ែ ដឹងគុណឪ គឺពពួកទាំងអស់នឹងតាមជួយថែរក្សាម្ចាស់ផ្ទះណាស់» ។
ព្រះអង្គបន្តថា «អញ្ចឹងពពួកភូមិទេវតា តាមការពារ និងថែរក្សាម្ចាស់ផ្ទះនឹង ទាល់តែម្ចាស់ផ្ទះនឹងជាអ្នកមានទាន មានសីល មានសេចក្តីល្អ ប្រព្រឹត្តសេចក្តីល្អដែរ បានគេតាមថែរក្សាយើង ។ ទាំងអស់នឹងបុរាណខ្មែរយើងមិនដែលចោលទេ ពពួកអស់នឹងតែងតែតាមជួយបីបាច់ថែរក្សាម្ចាស់ផ្ទះគ្រប់ពេលវេលា ។ ហើយខ្មែរសម័យបុរាណ គឺអត់មានធ្វើរានទេវតា ឬព្រះភូមពីថ្មទេ ហើយការធ្វើពីថ្មនេះ ទើបតែសម័យក្រោយនេះទេ ហើយពីដើមគឺធ្វើអំពីឈើ អំពីស្លឹកត្នោត ឬដើមឈើអីទេ លុះដល់សម័យឥឡូវជឿនលឿន គេធ្វើអំពីថ្ម» ។
រឿងភូមិទេវតា រុក្ខទេវតា អាកាសទេវតា ឬក៏ជំនៀងផ្ទះអីនឹង បុរាណខ្មែរយើង គេមិនដែលបោះបង់ចោលទេ គេតែងតែគោរពពពួកអស់នឹង ព្រោះពពួកអស់នឹងគេតាមបីបាច់ថែរក្សាយើង ហើយខ្លះទៀត ពេលណាដែលម្ចាស់ផ្ទះមានគ្រោះ មានភ័យ មានអន្តរាយអ្វីមួយកើតមានដល់ម្ចាស់ផ្ទះ គឺពពួកអស់នឹងតែងពន្យល់សប្តិប្រាប់មុនហើយ ។ ហើយនៅក្នុងព្រះពុទ្ធសាសនា ក៏ព្រះសម្មាសម្ពុទ្ធព្រះអង្គមិនបដិសេធដែររឿងការគោរពទេវតា ដូចជារឿងសែនសុំម្ចាស់ទឹកម្ចាស់ ដែលគេហៅថាទេវតាពាលីនោះ មានកម្មវិធី ឬមានធ្វើពិធីអ្វីៗនោះ ចេះរលឹកដល់ពពួកអស់នឹងផង ពីព្រោះពពួកទេវតានឹង ជាពពួកមួយដែលគេហៅថាជាអ្នកមានភ្នែកទិព្វ មានញាណទិព្វ ដែលអាចដឹងនូវរឿងអ្វីៗដែលមនុស្សយើងមិនអាចដឹង ។
អាត្មាសូមចែករំលែកចំណេះដឹងប៉ុណ្ណឹង បើខុសត្រូវយ៉ាងណាសូមអធ្យាស្រ័យ ។
អាត្មាសូមបញ្ជាក់ថា ញាតិញោមបើចង់ដាក់ព្រះភូម ឬរានទេវតា ត្រូវដាក់នៅចំហៀងផ្ទះ ឬមុខផ្ទះ តែហាមដាក់ក្រោមផ្ទះ ។
អត្មាបញ្ជាក់អញ្ចឹងថា រឿងព្រហ្មមញ្ញសាសនា និងព្រះពុទ្ធសាសនា គឺខ្មែរយើងកាន់ទាំង២ គ្រាន់តែថា មួយទំនោរធ្ងន់ជាង និងមួយទំនោរស្រាលជាងតែប៉ុណ្ណឹងទេ ។ ដូច្នេះអាត្មាបញ្ជាក់ហើយបញ្ជាក់ទៀតថាមិនបង្ខិតបង្ខំ ឬក៏បញ្ចុះបញ្ចូលឱ្យញាតិញោមជឿទៅលើខាងណាទេ អាស្រ័យទៅលើការជឿរបស់ញាតិញោម ត្រិះរិះពិចារណារកហេតុផលតាមការគួរ ៕
ចែករំលែកព័តមាននេះ