ភ្នំពេញ៖ នាយកដ្ឋានបុគ្គលិក​ នៃក្រសួងអប់រំ យុវជន និងកីឡា បានប្រកាស ជ្រើសរើស​មន្ត្រីជាប់កិច្ចសន្យា ចំនួន ៨នាក់ រួមមាន អ្នកអនាម័យ អ្នកបើកបរ និង​ការីកុំព្យួទ័រ ដើម្បីចូលរួម​សម្របសម្រួល និងគាំទ្រដល់កិច្ចការងារ​ប្រចាំថ្ងៃរបស់នាយកដ្ឋាន​។ ក្នុងនោះ ផ្នែកអនាម័យ ម្នាក់ ផ្នែក​បើកបររថយន្ត ម្នាក់ និងផ្នែកការីកុំព្យួទ័រ ៦នាក់​។

ចំពោះ​ម៉ោង​ពេលបំពេញការងារ គឺពេញម៉ោង ដោយព្រឹក ចាប់ពីម៉ោង ៧ ដល់ម៉ោង ១១កន្លះព្រឹក និងពេលរសៀល ចាប់ពីម៉ោង​ ២រសៀល រហូតដល់ម៉ោង ៥កន្លះ​ល្ងាច​។ បំពេញការងារ ពីថ្ងៃចន្ទ ដល់ថ្ងៃសុក្រ គឺ ៥ថ្ងៃ ក្នុង ១សប្តាហ៍ ឬ ៤០ម៉ោង ក្នុង ១សប្តាហ៍​។

ចំពោះអត្ថប្រយោជន៍ផ្សេងៗវិញ ត្រូវបាន​ក្រសួងអប់រំ យុវជន និងកីឡា ប្រកាសថា មន្ត្រីជាប់កិច្ចសន្យាថ្មីនេះ នឹងទទួលបាន​ប្រាក់ខែ ចំនួន ៧១ម៉ឺនរៀល សេវាព្យាបាល និងថែទាំវេជ្ជសាស្ត្រផ្នែកហានិភ័យ​ការងារ​ តាមរយៈបណ្ណ ប.ស.ស ការឈប់សម្រាកលំហែមាតុភាព និងទទួលបាន​ប្រាក់ឧបត្ថម្ភ សម្រាប់ការសម្រាលកូន ចំនួន ៨០​ម៉ឺនរៀល សម្រាប់ការសម្រាលបានកូនមួយ។ គ្រួសារសពមន្ត្រីរាជការ​ មន្ត្រីកម្មសិក្សា និងមន្ត្រីជាប់កិច្ចសន្យា ត្រូវទទួលបានប្រាក់ឧបត្ថម្ភបុណ្យសព ដូច​ខាងក្រោម៖ ករណីទទួលមរណភាព ដោយជំងឺធម្មតា ទទួលបាន ២លានរៀល។ ករណីទទួលមរណភាព ក្នុងពេលបំពេញបេសកកម្ម ឬគ្រោះថ្នាក់ការងារ​ ត្រុវបានទទួលចំនួន ៤លានរៀល។

ក្រៅពីប្រាក់ឧបត្ថម្ភខាងលើនេះ ក្រសួងអប់រំ យុវជន និងកីឡា ក៏បានប្រកាសថា មន្ត្រីជាប់កិច្ចសន្យាថ្មីនេះ ក៏ទទួលបានការអនុញ្ញាតច្បាប់ផ្សេងៗ ដូចមន្ត្រីរាជការទូទៅ ( ច្បាប់មានធុរៈផ្ទាល់ខ្លួន ច្បាប់ព្យាបាលជំងឺ ច្បាប់សម្រាក​ប្រចាំឆ្នាំ ) និងទទួលបានការលើកទឹកចិត្តបន្ថែមទៀត លើលទ្ធផលបំពេញការងារ​។

បេក្ខជន ឬបេក្ខនារី ដែលមានចំណាប់អារម្មណ៍ អាចដាក់​ប្រវត្តិរូបសង្ខេប ( CV ) និង Cover Letter ព្រមទាំង​ឯកសារពាក់ព័ន្ធ មកកាន់អាសយដ្ឋានបុគ្គលិក ( ការិយាល័យ​អភិវឌ្ឍន៍ធនធានមនុស្ស ) ក្រសួងអប់រំ យុវជន និងកីឡា ដែលមានអាសយដ្ឋាន លេខ៨០ មហាវិថីព្រះនរោត្តម សង្កាត់ជ័យជំនះ ខណ្ឌដូនពេញ រាជធានីភ្នំពេញ ឱ្យបានមុនថ្ងៃទី១០ ខែមករា ឆ្នាំ២០២៤ វេលាម៉ោង ៥កន្លះល្ងាច ជាកំហិត​។ សម្រាប់ព័ត៌មានបន្ថែម សូមទាក់ទងលោក សេង សុវីរៈ ទូរសព្ទ និងតេឡេក្រាម 012 662 504៕