ខេត្តបាត់ដំបង៖ យោងតាមសេចក្ដីរាយការណ៏របស់សមត្ថកិច្ចបានឲ្យដឹងថា យ៉ាងហោចណាស់មានការធ្វើអត្តឃាតចំនួន០២ករណី ដែលកើតហេតុកន្លែងផ្សេងគ្នា តែក្នុងថ្ងៃតែមួយ ដែលម្នាក់ចងកសម្លាប់ខ្លួន ក៏ព្រោះតែខឹងនឹងម្ដាយហាមមិនឲ្យដើរលេងពេលយប់ និងម្នាក់ទៀតចងកសម្លាប់ខ្លួន ក៏ព្រោះតែតូចចិត្តនឹងជំងឺប្រចាំកាយរ៉ាំរ៉ៃ។
តាមសេចក្ដីរាយការណ៏បានឲ្យដឹងថា ករណីទី១-បានកើតឡើង នៅម៉ោង៦ព្រឹកថ្ងៃទី ០៣ មករា នៅលើដំបូកកណ្ដាលវាលស្រែមួយកន្លែង នៅភូមិបាសាក់ ឃុំបាសាក់ ស្រុករុក្ខគិរី ដែលជនរងគ្រោះឈ្មោះ អូច សុខា ប្រុសអាយុ១៥ឆ្នាំ រស់នៅចម្ងាយពីកន្លែងកើតហេតុប្រហែល២០០ម៉ែត្រ។
សេចក្ដីរាយការណ៏ថា ក្មេងប្រុសវ័យ១៥ឆ្នាំនេះ បានសម្រេចធ្វើអត្តឃាតខ្លួន ដោយយកខ្សែគោទៅចងកខ្លួនឯងភ្ជាប់និងដើមស្ដៅលើដំបូងទាំងព្រឹក លុះបន្តិចក្រោយមកទើបម្ដាយនិងបងប្អូនបានដឹង ហើយបានរាយការណ៏ប្រាប់សមត្ថកិច្ច ។
បើតាមសមត្ថកិច្ចដែលបានស្រង់សម្ដីម្ដាយជនរងគ្រោះបានឲ្យដឹងថា កូនប្រុសគាត់ពិតបានខឹងនឹងគាត់មែន ដែលគាត់តែងហាមឃាត់កូនមិនឲ្យដើរលេងពេលយប់។ សមត្ថកិច្ចបានស្រង់សម្ដីម្ដាយទៀតថា គាត់តែងស្ដីបន្ទោសកូនជាញឹកញ៉ាប់រឿងដើរលេងយប់នេះ ទើបកូនខឹងរហូតដល់សម្រេចចិត្តចងកសម្លាប់ខ្លួនបែបនេះតែម្ដង។ យ៉ាងណា មន្ត្រីជំនាញ បានចុះពិនិត្យ និង បានធ្វើកំណត់ហេតុប្រគល់សាកសពជនរងគ្រោះ ជូនទៅក្រុមគ្រួសារធ្វើតាមប្រពៃណីហើយ ក្រោយបញ្ចប់កំណត់ហេតុបំភ្លឺ។
ដោយឡែក ចំពោះករណីទី២-បើតាមសេចក្ដីរាយការពីសមត្ថកិច្ចដែរឲ្យដឹងថា បានកើតឡើងនៅម៉ោង៨និង៣០នាទីព្រឹកថ្ងៃទី ០៣ មករា នៅចំណុចភូមិដាក់សសរ សង្កាត់អូរម៉ាល់ ក្រុងបាត់ដំបង ដែលជនរងគ្រោះឈ្មោះ មាស ស៊ីវត្ថា ប្រុសអាយុ៣៧ឆ្នាំ រស់នៅចំណុចកើតហេតុ។ ជនរងគ្រោះ បានយកយកខ្សែអង្រឹងចងកធ្វើអត្តឃាតខ្លួនឯងនៅនឹងរោងបិទស្រា ជាប់នឹងផ្ទះរបស់ខ្លួនតែម្ដង។
បើតាមសមត្ថកិច្ចដែលបានសាកសួរព័ត៏មានពីក្រុមគ្រួសារជនរងគ្រោះ បានឲ្យដឹងថា ជនរងគ្រោះធ្លាប់មានជំងឺប្រចាំកាយរាំរៃច្រើនឆ្នាំកន្លងមកហើយ។ ក្រោយធ្វើការពិនិត្យនិងការផ្ដល់ព័ត៏មាននានា ពីក្រុមគ្រួសារ ជនរងគ្រោះពិតជាបានធ្វើអត្តឃាតខ្លួនឯង ក៏ព្រោះតែតូចចិត្តនឹងជំងឺរាំរៃច្រើនឆ្នាំកន្លងមកនេះមែន។ ក្រុមគ្រួសារបានរៀបចំធ្វើបុណ្យសពតាមប្រពៃណីហើយ ក្រោយមន្ត្រីជំនាញបញ្ចប់ការសួរនាំនិងធ្វើកំណត់ហេតុ ៕
ចែករំលែកព័តមាននេះ