រាជធានីភ្នំពេញ ៖ លោកខៀវ កាញារីទ្ធ រដ្ឋមន្ត្រីក្រសួងព័ត៌មានបានចុះហត្ថលេខាលើលិខិតរបស់លេខ៧៤៣ ព.ម ចុះថ្ងៃទី២០ ឧសភា ផ្ញើទៅដល់គ្រប់បណ្ណាធិការកាសែត ទស្សនាវដ្តី នាយក នាយិកា ស្ថានីយវិទ្យុ ទូរទស្សន៍ ទាំងអស់ ឱ្យបញ្ឈប់ការចាក់ផ្សាយពាណិជ្ជកម្មផលិតផលប្រភេទខ្សែដៃម៉ាកទីតានីម រូបព្រះនាងគង់ ស៊ីអ៊ីម ។
ហេតុផលដែលត្រូវបានហាមឃាត់មិនឱ្យមានការចាក់ផ្សាយនេះត្រូវបានលើកឡើងក្នុងលិខិតក្រសួងព័ត៌មានថា កន្លងមកមានស្ថានីយ វិទ្យុ ទូរទស្សន៍ និងកាសែត ទស្សនាវដ្តីមួយចំនួន បានចាក់ផ្សាយ និងផ្សាយស្ប៉តពាណិជ្ជកម្មខ្សែដៃម៉ាកទីតានីម រូបព្រះនាងគង់ ស៊ីអ៊ីម របស់សហគ្រាសអាជីវកម្មលក់គ្រឿងអលង្ការឈ្មោះ Happy Shopping មានខ្លឹមសារឃោសនាអូសទាញអំពីគុណភាព និងប្រសិទ្ធភាពនៃមុខនាទីលើការប្រើប្រាស់ផលិតផលទំនិញនោះថា មាន ប្រសិទ្ធភាពក្នុងការទប់ស្កាត់ធាតុវិទ្យុសកម្ម ការព្យាបាលជំងឺ ស្រោបមាសដុតកំដៅមិនប្រែពណ៌ជាដើម ដោយពុំមានភស្តុតាងត្រឹមត្រូវប្រកបដោយលក្ខណៈបច្ចេកទេស និងសំអាងផ្នែកវិទ្យាសាស្ត្រជាក់លាក់ណាមួយឡើយ ។
ដូច្នេះ ដើម្បីចៀសវាងរាល់ការផ្សាយពាណិជ្ជកម្មដែលមានលក្ខណៈភូតកុហក បំផ្លើសហួសហេតុពីគុណភាព និងប្រសិទ្ធភាព ផលិតផលទំនិញ ដែលធ្វើឱ្យប៉ះពាល់ដល់សុខភាព និងខាតបង់ផលប្រយោជន៍របស់ប្រជាពលរដ្ឋ ក្រសួងព័ត៌មានតម្រូវឱ្យអស់លោក លោកស្រី នាយក នាយិកា ស្ថានីយ វិទ្យុ ទូរទស្សន៍ កាសែត ទស្សនាវដ្តីទាំងអស់បញ្ឈប់ការផ្សាយស្ប៉តពាណិជ្ជកម្មខ្សែដៃម៉ាកទីតានីម រូបព្រះនាងគង់ ស៊ីអ៊ីម ចាប់ពីថ្ងៃជូនដំណឹងនេះតទៅ ៕
ចែករំលែកព័តមាននេះ