ខេត្តរតនគិរី ៖ នៅដើមខែមករានេះ ប្រជាពលរដ្ឋជាអ្នកភូមិចាអ៊ុង ស្រុកអូរជុំ ដែលបានចូលរួមគ្នារៃអង្គាសថវិកាយកមកធ្វើផ្លូវបេតុងចូលភូមិ និងបញ្ចេញកម្លាំងពលកម្មធ្វើដោយផ្ទាល់ផងនោះ បាននាំគ្នាប្រតិកម្មទៅលើខ្លឹមសារបំភ្លឺរបស់លោកអៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី ដែលបានច្រានចោលនៅសាច់ប្រាក់ជាង៧លានរៀលបានមកពីពលរដ្ឋរៃអង្គាសគ្នាយកទៅធ្វើផ្លូវបេតុងប្រវែង៧០ម៉ែត្រនោះហើយ ។
កាលពីថ្ងៃទី២៨ ខែធ្នូ ឆ្នាំ២០២៣ លោកអៀម អឿន ប្រធានមន្ទីរអភិវឌ្ឍន៍ជនបទខេត្តរតនគិរី បានចេញសេចក្ដីស្រាយបំភ្លឺថា តាមពិតលុយដែលធ្វើផ្លូវបេតុងប្រវែង៧០ម៉ែត្រនៅស្រុកអូរជុំនោះ គឺជាលុយរបស់គណ:កម្មាធិកាអភិវឌ្ឍន៍ភូមិទេ គេឲ្យយកទៅសាងសង់ផ្លូវ ដើម្បីសម្រួលកាធ្វើចរាចរណ៍ជាបណ្ដោះអាសន្ន ។
អ្នកស្រី វីន សុត មេភូមិចាអ៊ុងកៅ និងជាប្រធានគណ:កម្មាធិការអភិវឌ្ឍន៍ភូមិបានបញ្ជាក់ថា ការច្រានចោលរបស់លោកអៀម អឿន ពុំត្រឹមត្រូវឡើយ ព្រោះថា គណ:កម្មាធិការអភិវឌ្ឍន៍ភូមិមានតែឈ្មោះពុំមានលុយសម្រាប់ចូលរួមធ្វើផ្លូវបេតុងនោះទេ ។
អ្នកស្រីបានបញ្ជាក់បន្ថែមថា លុយដែលធ្វើផ្លូវបេតុងប្រវែង៧០ម៉ែត្រនោះផ្ដើមចេញពីតំណាងប្រជាពលរដ្ឋសុទ្ធសាធ ពួកគេមិនមែនជាសមាជិករបស់គណ:កម្មាធិការរអភិវឌ្ឍន៍ភូមិឡើយ គឺមេភូមិមេឃុំអត់បានចូលរួមទេ ដោយសារផ្លូវនោះបានខូចជាយូរឆ្នាំហើយពុំមានអ្នកជួសជុល ដើម្បីសម្រួលដល់ការធ្វើដំណើររបស់អ្នកភូមិនោះទេ ទើបពលរដ្ឋស្រាក់លុយគ្នាធ្វើទៅ ។
លោកភួយ វណ្ណា តំណាងពលរដ្ឋបានបញ្ជាក់ដែរថា ពួកគាត់អស់សង្ឃឹមខ្លាំងណាស់ មិនគួរលោកអៀម អឿន ច្រានចោលទឹកលុយជាង៧លានរៀលដែលជាញើសឈាមរបស់ពួកគាត់ខំរក ហើយបានមកពីការរៃអង្គាសបេះពីមាត់ពីក មិនហ៊ានស៊ីចាយទេ ដើម្បីយកទៅធ្វើផ្លូវឲ្យបានល្អសមរម្យ តែបែរជាលោកប្រធានមន្ទីររូបនោះបដិសេធចោលយ៉ាងដូច្នេះ តើប្រាក់រៃជាង៧លានរៀលជ្រុះទៅណា?
តំណាងពលរដ្ឋបានបន្ដថា ដើម្បីរកឲ្យឃើញការពិត សូមលោកអៀម អឿន បង្ហាញឯកសាររបស់គណ:កម្មាធិការអភិវឌ្ឍន៍ភូមិដែលបានចំណាយលុយធ្វើផ្លូវបេតុងប្រវែង៧០ម៉ែត្រនោះផង គឺយកឯកសារមកដាក់នៅលើតុបង្ហាញមហាជនឲ្យបានឃើញទាំងអស់គ្នាទើបជឿ ។
បើមិនមានឯកសារទេ គឺលោកអៀម អឿន កំពុងតែព្យាយាមបកស្រាយកុហក់ថ្នាក់ដឹកនាំ និងមាក់ងាយ ដល់ជីវភាពប្រជាពលរដ្ឋដែលមានចិត្ដចូលរួមចំណែកជាមួយរាជរដ្ឋាភិបាលធ្វើផ្លូវនៅមូលដ្ឋានរបស់ពួកគាត់ ដើម្បីសម្រួលការធ្វើដំណើរដឹកកសិផលរបស់បងប្អូននៅទីនោះហើយ ។
រឿងនេះ លោកអៀម អឿន ត្រូវតែធ្វើការសុំទោសប្រជាពលរដ្ឋជាសាធារណ: បើពុំដូច្នេះទេ តំណាងពលរដ្ឋ៣១០គ្រួសារ និងបន្ដរកយុតិ្តធម៌តាមរយ:មេធាវីជួយធ្វើពាក្យបណ្ដឹងដាក់ទៅអាជ្ញាធរពាក់ព័ន្ធ ដើម្បីដោះស្រាយតាមផ្លូវច្បាប់ហើយ ។
ពលរដ្ឋជាង៣០០គ្រួសារ ដែលចំណាយលុយធ្វើផ្លូវបេតុងនោះ បានសំណូមពរទៅរដ្ឋមន្ត្រីក្រសួងអភិវឌ្ឍន៍ជនបទ មេត្តាចាត់មន្ត្រីឲ្យចុះទៅដល់ទីតាំងធ្វើកាត្រួតពិនិត្យរកឲ្យឃើញកាពិតផង តើពលរដ្ឋនិយាយកុហក់ ឬក៏ប្រធានមន្ទីរអភិវឌ្ឍន៍ជនបទរូបនោះ ជាអ្នកបកស្រាយកុហក់ថ្នាក់លើ និងមហាជនទេនោះ ។
មានព័ត៌មានបន្ថែម កោះសន្តិភាពនឹងផ្សាយជូនបន្ត ។
ចែករំលែកព័តមាននេះ