កសិករកម្ពុជា គឺត្រូវតែបន្តប្រុងប្រយ័ត្នរឿងរក្សាស្រូវទុកខ្លះ ដើម្បីបម្រើការហូបចុកប្រចាំឆ្នាំ កុំដោយសារតែតម្លៃអង្ករត្រូវប៉ាន់ស្រូវឡើងថ្លៃ ឈ្មួញមកល្បួងចុះទិញដល់កន្លែង គិតតែលក់ចេញដោយភ្លេចទុកខ្លះជាស្បៀងសម្រាប់ខ្លួនឯង ។ នៅពេលនេះ តាមសារព័ត៌មានធំៗនៅក្នុងតំបន់ និងអន្តរជាតិ គឺសុទ្ធតែបានចេញនូវសេចក្តីរាយការណ៍ជាបន្តបន្ទាប់ថា តម្លៃអង្ករនឹងនៅតែឡើងខ្ពស់ហើយក៏ជាកត្តាបន្តធ្វើឲ្យអតិផរណានៅអាស៊ីកើនឡើងបន្តទៀតដែរនៅក្នុងឆ្នាំ២០២៤ ។
តាមតួរលេខដែលបានផ្សព្វផ្សាយកន្លងមកបានឲ្យដឹងថា នៅក្នុងរយៈពេល១១ខែនៃឆ្នាំ២០២៣កន្លងទៅថ្មីៗនេះ កម្ពុជាបាននាំចេញអង្ករបានជិត៦០ម៉ឺនតោន គិតជាទឹកប្រាក់មាន តម្លៃដល់ទៅ៤២០លានដុល្លារ ។ ដោយឡែកការនាំចេញស្រូវ គឺមានបរិមាណដល់ទៅប្រមាណជា៤លានតោន គិតជាទឹកប្រាក់ជាង១.១៥៦លានដុល្លារ ។
គេបានដឹងទៀតថា ការនាំចេញអង្កររបស់កម្ពុជា គឺធ្វើឡើងដោយក្រុមហ៊ុននាំចេញអង្ករចំនួន៦០ ក្រុមហ៊ុនទៅកាន់គោលដៅចំនួន៦០ ដែលក្នុងនោះប្រទេសចិន និងកោះហុងកុងបានចំនួន ១៩៨.៧៦១ តោន ដែលគិតជាទឹកប្រាក់បានចំនួន ១២៨ លានដុល្លារ ។ ទៅកាន់ប្រទេសនៅទ្វីបអឺរ៉ុបចំនួន ២៦ប្រទេសបានចំនួន ២៤០.៧៥១ តោន ដែលគិតជាទឹកប្រាក់បានចំនួន១៧២ លានដុល្លារ ។ រីឯការនាំចេញទៅកាន់ប្រទេសសមាជិកអាស៊ាន ចំនួន៦ប្រទេស បានបរិមាណចំនួន ៧៦.៥១៤ តោន គិតជាទឹកប្រាក់ចំនួន ៥០,៣៦ លានដុល្លារ និងទៅកាន់គោលដៅផ្សេងទៀតចំនួន២៦ប្រទេស ។
មកដល់ពេលនេះការនាំចេញអង្ករអាចមិនសូវជាអីនោះទេ ដោយសារតែឆ្លងកាត់ក្រុមហ៊ុនត្រឹមត្រូវតាមច្បាប់ ដែលក្រសួងពាណិជ្ជកម្មក៏ដូចជា ក្រសួងស្ថាប័នអាចដឹង និងគ្រប់គ្រងអំពីសន្និធិ (ការសន្សំទុក) ច្បាស់លាស់ ប៉ុន្តែស្រូវអាចពិបាកនៅក្នុងការគ្រប់គ្រងដោយសារតែនៅពេលនេះនៅតាមវាលស្រែ គឺឈ្មួញកណ្តាលបានចុះមកកើបស្រូវដល់វាលស្រែតែម្តង ។ ដូច្នេះហើយ កសិករខ្លះ គាត់អាចនឹងត្រេកត្រអាលហើយសប្បាយនឹងស្រូវឡើងថ្លៃគេមកដឹកដល់កន្លែងភ្លេចដឹកយកទៅទុកនៅផ្ទះរក្សាទុកទទួលទានខ្លួនឯង និងគ្រួសារ ។ នេះ គឺជាសេចក្តីពិតពាក់ព័ន្ធនឹងវិស័យស្រូវអង្ករកម្ពុជា ខណៈដែលសារព័ត៌មានបរទេសធំៗវិញបានឲ្យដឹងថា នៅពេលនេះតម្លៃអង្ករក្តី និងស្បៀងអាហារផ្សេងទៀតក្តី គឺបានកើនឡើងដល់កម្រិតខ្ពស់បំផុតក្នុងរយៈពេល១៥ ឆ្នាំ ដោយសារបញ្ហាអាកាសធាតុផង និងបញ្ហាពិភពលោកផង។
ពាក់ព័ន្ធនឹងបញ្ហានេះ សារព័ត៌មាន Nikkei ជាដើមបានឲ្យដឹងថា អតិផរណាបន្តហក់ឡើងខ្ពស់ក្នុងបណ្តាប្រទេសអាស៊ីជាច្រើនដោយសារតែតម្លៃអង្ករ និងអាហារផ្សេងទៀតឡើងថ្លៃ ។ នៅហ្វីលីពីនជាដើម តម្លៃម្ហូបអាហារកើនឡើង៥០% រីឯនៅឥណ្ឌា គឺកើនឡើងដល់ទៅ ៧០% ។
ប្រភពដដែលបានបន្តថា តម្លៃស្រូវដែលជាកត្តាសំខាន់ក្នុងតំបន់បានឡើងថ្លៃដោយសារការប្រមូលផលមិនល្អបង្កឡើងដោយបាតុភូតធម្មជាតិ ហើយតម្លៃស្បៀងអាហារទំនងជាមិនធ្លាក់ចុះក្នុងពេលឆាប់ៗនេះទេ ដោយសារអ្នកនាំចេញអង្ករជាច្រើនបានបង្កើនការស្ទាក់ស្ទើរ ក្នុងការលក់វាទៅក្រៅប្រទេស ដោយផ្តល់អាទិភាពដល់តម្រូវការក្នុងស្រុក។
តម្លៃស្រូវសាលី និងពោតបានកើនឡើងពាសពេញពិភពលោក ចាប់តាំងពីឆ្នាំ២០២២ បន្ទាប់ពីការលុកលុយរបស់រុស្ស៊ីលើអ៊ុយក្រែន ។ នៅពេលនោះអតិផរណាស្បៀងបានចាប់ផ្តើម វាយប្រហារ សហរដ្ឋអាមេរិក និងអឺរ៉ុបយ៉ាងធ្ងន់ធ្ងរក៏ដោយ ឥទ្ធិពលនៃសង្គ្រាមហើយឥទ្ធិពលរបស់វានៅតែមាននៅពេលបច្ចុប្បន្ន។
លោក ហ្វ្រីឌឺរិច ណឺមែន ( Frederic Neumann) ប្រធានក្រុមសេដ្ឋកិច្ចវិទូ ប្រចាំ តំបន់អាស៊ីរបស់ធនាគារ HSBC បានលើកឡើងថា តម្លៃអាហារនៅអាស៊ីឆ្នាំ ២០០៨ គឺកើនខ្ពស់ខ្លាំង ហើយ ឥឡូវនេះសញ្ញាដ៏អាក្រក់កំពុងបង្ហាញ។
ប្រភពដដែលបានបន្តថា នៅពេលនេះអតិផរណានៃតម្លៃស្បៀងកំពុងប៉ះពាល់យ៉ាងធ្ងន់ធ្ងរដល់ការរស់នៅរបស់ពលរដ្ឋនៅអាស៊ីខាងត្បូង និងអាស៊ីអាគ្នេយ៍ ។
ចែករំលែកព័តមាននេះ