រដ្ឋាភិបាលបានកំណត់ចក្ខុវិស័យកម្ពុជាក្លាយជាប្រទេសអ្នកមាន មានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសអ្នកមាន គឺប្រទេសអភិវឌ្ឍន៍នៅឆ្នាំ២០៥០ ។ ចក្ខុវិស័យនេះ បានធ្វើឱ្យពលរដ្ឋកម្ពុជាញញឹម និងលួចត្រេកអរនៅក្នុងចិត្ត ។…
រដ្ឋាភិបាលបានកំណត់ចក្ខុវិស័យកម្ពុជាក្លាយជាប្រទេសអ្នកមាន មានចំណូលមធ្យមកម្រិតខ្ពស់ នៅឆ្នាំ២០៣០ និងក្លាយជាប្រទេសអ្នកមាន គឺប្រទេសអភិវឌ្ឍន៍នៅឆ្នាំ២០៥០ ។
ចក្ខុវិស័យនេះ បានធ្វើឱ្យពលរដ្ឋកម្ពុជាញញឹម និងលួចត្រេកអរនៅក្នុងចិត្ត ។ មានមនុស្សមិនតិចទេ ដែលបានគិតគូរពីអាយុរបស់ខ្លួននៅពេលនេះទៅឆ្នាំ២០៣០ និងឆ្នាំ២០៥០ ។ មានអ្នកខ្លះថា ឆ្នាំ២០៣០ ខ្ញុំទើបអាយុ៦០ឆ្នាំ គឺអាចនៅឃើញប្រទេសរីកចម្រើនបាន ។ អ្នកខ្លះទៀតថា ឆ្នាំ២០៥០ ឆ្នាំអាយុ៩០ឆ្នាំហើយចាស់ហើយ តែមិនអីទេទុកឱ្យកូនៗ និងចៅៗគេសប្បាយចុះ ។
បើជាតិរីកចម្រើនកូនចៅសុខសប្បាយ ស្លា.ប់ទៅក៏បិទភ្នែកជិតដែរ ។ នេះជាពាក្យសាមញ្ញៗ របស់អ្នកស្រុកបានលើកឡើង ។ ពលរដ្ឋមិនតិចទេ ដែលបានលួចស្រមៃឃើញដល់ការរីកចម្រើនរបស់ប្រទេសជាតិ ។ ត្បិតអី វាល្មមដល់ពេលកម្ពុជារីកចម្រើន និងសុខសាន្តនោះហើយ ។ ពលរដ្ឋខ្លះដែលមានអាយុលើសពី៧០ឆ្នាំ មិនភ្លេចទេថា កាលពីសម័យកម្ពុជារីកចម្រើននៅក្នុងរបបសង្គមរាស្ត្រនិយមនោះ ប្រទេសសិង្ហបុរីដែលបច្ចុប្បន្ននេះជាខ្លានៅអាស៊ីអាគ្នេយ៍នោះ គឺនៅឆ្ងាយពីកម្ពុជាកាលសម័យនោះណាស់។ ប៉ុន្តែសិង្ហបុរីនាពេលបច្ចុប្បន្ន គឺជាឋានសួគ៌លោកី ដែលមនុស្សជាច្រើនប្រាថ្នាទៅរស់នៅទៅសិក្សា ។
ឆ្នាំ២០៣០ និងឆ្នាំ២០៥០ មិនយូរនោះទេ ហើយក៏គ្មានអ្វីដែលយើងមិនអាចធ្វើបាននោះដែរ។ នេះជាទស្សនលើកទឹកចិត្ត ដើម្បីឱ្យមនុស្សមានក្តីសង្ឃឹម និងឆ្ពោះទៅការសម្រេចគោលដៅអ្វីមួយ ។ និយាយពីការមានបានគ្រប់គ្នាចង់មានចង់បានទាំងអស់គ្នា ។ ការមានបានសម្រាប់បុគ្គលម្នាក់ សម្រាប់គ្រួសារមួយ គឺជាការមានបានរបស់មនុស្សមួយក្រុមតូចប៉ុណ្ណោះ ប្រសិនជាប្រទេស ជាតិរីកចម្រើន ជាមុខមាត់ និងកិត្តិយសរបស់សង្គមទាំងមូល ។ កម្ពុជារីកចម្រើនពលរដ្ឋនឹងពោលពេញដោយស្នាមញញឹម ហើយកម្ពុជាជាទីមោទកភាព សម្រាប់ខ្មែរទាំងមូល ។ ខ្មែរដែលធ្លាប់តែរុងរឿង ខ្មែរធ្លាប់ជាមហានគរហើយពលរដ្ឋកម្ពុជាមានមោទនកភាពដែលកើតមកជាខ្មែរ ។
ប្រទេសរីកចម្រើន សំដៅដល់កំណើនសេដ្ឋកិច្ចល្អ ចំណូលពលរដ្ឋខ្ពស់ ហេដ្ឋារចនាសម្ព័ន្ធ មានគ្រប់គ្រាន់ហើយទំនើបទៀតផងមិនថា ជាផ្លូវទឹក ផ្លូវអាកាស និងផ្លូវគោកនោះទេ ។ និយាយពីអគារមានអគារខ្ពស់ៗ មានតំបន់លំហែកាយ មានកន្លែងការពារបរិស្ថាន ។ ចំពោះសេវាសាធារណក៏ពិសេស ។ សាលាសិក្សារបស់ក្មេងៗទំនើបមានគុណភាព ។ មន្ទីរពេទ្យល្អ សេវាល្អ មានគុណភាពខ្ពស់ ពលរដ្ឋមិនខ្វល់ខ្វាយពេលឈឺ មិនលំបាកចេញទៅព្យាបាលជំងឺនៅក្រៅប្រទេស ។ ពលរដ្ឋមិនខ្វល់ពីសេដ្ឋកិច្ចគ្រួសារ ។ គ្រប់គ្នាមានការងារធ្វើ មានការចំណូលសមរម្យ ។ ឱ្យតែមានការងារធ្វើ ម្នាក់ៗមានលំនៅដ្ឋាន មានរថយន្តធ្វើដំណើរ ។ មានន័យថា នៅពេលប្រទេសក្លាយជាអ្នកមានគុណភាពរស់នៅរបស់ពលរដ្ឋ គឺល្អ ។
គេពិបាកនឹងរៀបរាប់ ប៉ុន្តែគេអាចស្រមៃបានថា ឆ្នាំ២០៣០ ឬឆ្នាំ២០៥០ កម្ពុជាអាចនឹងដូច ប្រទេសថៃ និងប្រទេសសិង្ហបុរីនាពេលបច្ចុប្បន្ន ។ ប្រទេសថៃ និងប្រទេសសិង្ហបុរី ដែល ពលរដ្ឋខ្មែរ បានចេញទៅធ្វើទេសចរណ៍ម្តងៗលួចសរសើរ ពីគុណភាពជីវិតរបស់ប្រជាជន គេថាល្អ ដែលយ៉ាងហោចណាស់គេអាចដឹងថា នៅទីនោះ គុណភាពសិក្សាល្អ សេវាសុខាភិបាលប្រពៃ ។
រដ្ឋាភិបាលមានចក្ខុវិស័យ និងយុទ្ធសាស្ត្រនៅក្នុងការដឹកនាំប្រទេស ដើម្បីក្លាយជាទៅប្រទេសអភិវឌ្ឍន៍ចាកចេញពីប្រទេសក្រីក្រ ។ ដើម្បីសម្រេចចក្ខុវិស័យវែងឆ្ងាយនេះ រដ្ឋាភិបាលត្រូវតែបង្កើនប្រសិទ្ធភាពការងារ ហើយហ៊ានវះកាត់លុបបំបាត់រាល់បញ្ហាដែលអាចពាំងផ្លូវដូចជា មានអភិបាលកិច្ចល្អ មានយុត្តិធមសង្គម លុបបំបាត់អំពើពុករលួយ និងហ៊ានដាក់ទោសដល់មន្ត្រីខូចធ្វើអោយសេដ្ឋកិច្ចមានការរីកចម្រើនជានិច្ច ហើយប្រព័ន្ធសុខាភិបាល និងសង្គមប្រកបដោយគុណភាព ។ ប៉ុន្តែដើម្បីសម្រេចគោលដៅនេះក៏មិនអាចគ្មានការចូលរួមរបស់ពលរដ្ឋដែរ ។ ពលរដ្ឋគួរមានទម្លាប់ ដើម្បីក្លាយជាពលរដ្ឋស៊ីវីល័យ ។ ពលរដ្ឋស៊ីវិល័យនៅក្នុងប្រទេសជឿនលឿន គឺមានចំណេះដឹងខ្ពស់ មានជំនាញច្បាស់លាស់ ។ នៅពេលមានចំណេះដឹង និងសីលធម៌ខ្ពស់ ការស់នៅប្រកបដោយសេចក្តីថ្លៃថ្នូរ ។
ការអភិវឌ្ឍប្រទេសជាតិទំនងមិនខុសពីការអភិវឌ្ឍសង្គមគ្រូសារនោះឡើយ ។ ឪពុកម្តាយ និងចាស់ទុំតែងតែអប់រំណែនាំថា បើកូនចង់មានត្រូវរៀនឱ្យមានចំណេះខ្ពង់ខ្ពស់ ។ គ្មានការមានបានណាដែលបានមកដោយគ្មានចំណេះនោះឡើយ ។ ដូច្នេះគន្លឹះសំខាន់មួយរបស់ពលរដ្ឋឆ្ពោះទៅការរីកចម្រើនរបស់សង្គមជាតិ គឺការសិក្សារៀនសូត្រ និងនាំគ្នាគិតគូរចូលរួមចំណែក ធ្វើកិច្ចការនានា ដើម្បីផលប្រយោជន៍រួមរបស់សង្គមជាតិ ៕
ចែករំលែកព័តមាននេះ