វៀតណាម ៖ ស្ត្រីជនជាតិវៀតណាមពីរនាក់ ត្រូវបានចាប់ខ្លួននៅទីក្រុងហូជីមិញ កាលពីពីរ
សប្តាហ៍មុន ពាក់ព័ន្ធពីបទជាឈ្មួញកណ្តាលនាំនារីៗស្រស់ស្អាត ជាពិសេស តារាម៉ូដែលទៅបម្រើសេវាផ្លូវភេទក្នុងតម្លៃរហូតដល់៥០លានដុង ស្មើនឹង២ពាន់ដុល្លារអាមេរិក សម្រាប់ការបម្រើសេវាមួយលើក ។
ប្រភពពីសារព័ត៌មានវៀតណាម VnExpress ចេញផ្សាយកាលពីថ្ងៃទី៣១ ខែធ្នូ ឆ្នាំ២០២៣ បានឱ្យដឹងថា ប៉ូលិសបានអះអាងស្ត្រីជាប់ចោទឈ្មោះ Ho Thi Hanh អាយុ២២ឆ្នាំ និងស្ត្រីម្នាក់ទៀតឈ្មោះ Dau Thi Lien ត្រូវបានចោទប្រកាន់ថា បានយកប្រាក់៣០% នៃប្រាក់ដែលអតិថិជនបង់ទៅឱ្យស្ត្រីរកស៊ីផ្លូវភេទ ស្ថិតក្រោមការគ្រប់គ្រងរបស់ពួកគេ ។
ប៉ូលិសបានរកឃើញការផ្សាយពាណិជ្ជកម្មសេវាកម្មពិសេសពួកគេតាមអ៊ីនធើរណេត ហើយបានឆ្មក់ចូលសណ្ឋាគារមួយកន្លែងនៅផ្លូវ To Hien Thanh តំបន់ទី១០ ដោយចាប់បានស្ត្រីពីរនាក់កំពុងបម្រើសេវាដល់អតិថិជនក្នុងតម្លៃ៥០លានដុង។ ស្ត្រីម្នាក់អាយុ២៧ឆ្នាំ ត្រូវបានរាយការណ៍ថា គឺជាបរវកញ្ញាឈ្នះការប្រកួតសម្រស់របស់វៀតណាម ខណៈម្នាក់ទៀតអាយុ២៣ឆ្នាំ គឺជាតារាម៉ូដែលរូបថត។
នៅឯសណ្ឋាគារមួយកន្លែងទៀត នៅផ្លូវ Tran Hung Dao ខណ្ឌទី៥ ប៉ូលិសបានចាប់នារីជានិស្សិតមហាវិទ្យាល័យម្នាក់ និងស្ត្រីជាតារាម៉ូដែលម្នាក់ទៀត ដែលកំពុងបម្រើសេវាដល់អតិថិជនក្នុងតម្លៃ ១៤លានដុង។ អ្នកទាំងពីរបាននិយាយថា ពួកគេមកតាមការហៅរបស់ឈ្មួញកណ្តាលគឺ Hanh និង Lien ។
ការស៊ើបអង្កេតបានរកឃើញថា Hanh បានបង្ហោះរូបភាពរបស់ខ្លួនជានារីដ៏ជោគជ័យម្នាក់លើបណ្តាញសង្គម ដោយបង្ហោះរូបនាងធ្វើដំណើរទៅកន្លែងល្បីៗ និងការដើរទិញទំនិញមានតម្លៃថ្លៃៗ។ បន្ទាប់មក នាងបានល្បួងស្ត្រីៗជាច្រើនចូលរួមជាមួយនាង ដើម្បីរកលុយបានងាយស្រួល និងលឿនដូចនាង។ ប៉ូលិសបន្តថា នារីវ័យក្មេងចំនួន៣០នាក់ ស្ថិតក្រោមការគ្រប់គ្រងរបស់ Hanh និង Lien ដោយក្នុងនោះរួមទាំងនារីៗស្រស់ស្អាត និងតារាផងដែរ។
មិនតែប៉ុណ្ណោះ Hanh និង Lien ក៏បានផ្តល់សេវាផ្លូវភេទដោយខ្លួនឯងផងដែរ។ ប៉ូលិសទីក្រុងហូជីមិញបញ្ជាក់ថា ខ្លួនកំពុងបង្កើនការវាយឆ្មក់ប្រឆាំងនឹងសកម្មភាពឧក្រិដ្ឋកម្មផ្លូវភេទ ហើយបង្ក្រាបបានសង្វៀនពេស្យាចារជាបន្តបន្ទាប់ផងដែរ៕
ចែករំលែកព័តមាននេះ