តាមទីភ្នាក់ងារព័ត៌មានរ៉យទ័រថា មេដឹកនាំកំពូលកូរ៉េខាងជើង លោកគីម ជុងអ៊ីល កាលពីព្រឹកថ្ងៃទី២៥ ឧសភា បានទៅដល់ទីក្រុងប៉េកាំង រដ្ឋធានីចិន តាមរថភ្លើងពាសដែកយ៉ាងទំនើបមួយខ្សែដោយនៅទីនោះលោកគីម ជុងអ៊ីល នឹងបើកកិច្ចប្រជុំកំពូលជាមួយមេដឹកនាំចិន ។ លោកគីម ជុងអ៊ីល សង្ឃឹមថា ក្នុងកិច្ចប្រជុំកំពូលនេះ លោកនឹងទទួលបានការគាំទ្រពីប្រទេសចិន ដែលជាប្រទេសសេដ្ឋកិច្ចធំបំផុតនៅអាស៊ីសម្រាប់រដ្ឋឯកោរបស់លោក ។
លោកគីម ជុងអ៊ីល បានអញ្ជើញទៅកាន់ប្រទេសចិនស្ងាត់ៗកាលពីសប្តាហ៍មុន តាមរថភ្លើងពិសេសមួយខ្សែ ហើយទាំងប្រទេសកូរ៉េ ខាងជើង ទាំងប្រទេសចិន មិនបានអះអាងបញ្ជាក់ពីដំណើរទស្សនកិច្ចរបស់លោកទេ ។ នេះជាដំណើរទស្សនកិច្ចកិច្ចលើកទី៣ របស់លោកគីម ជុងអ៊ីល នៅប្រទេសចិន ក្នុងរយៈពេលតែជាងមួយឆ្នាំប៉ុណ្ណោះ ។
ទីភ្នាក់ងារព័ត៌មានយ៉ុនហាប់របស់កូរ៉េខាងត្បូងរាយការណ៍ថា លោកគីម បានទៅកាន់ក្រុងប៉េកាំង ដើម្បីបើកកិច្ចប្រជុំកំពូលជាមួយប្រធានាធិបតីចិន លោកហ៊ូ ជីនតាវ ។
សាស្ត្រាចារ្យមួយរូបសិក្សាអំពីកូរ៉េ នៅសាកលវិទ្យាល័យ Fudam ក្រុងសៀងហៃ និយាយថា លោកគីម ជុងអុីល មកកាន់ប្រទេសចិនលើកនេះប្រហែលជាចង់ទទួលបានការគាំទ្រផ្នែកការទូតពីចិន ហើយទីភ្នាក់ងារព័ត៌មានយ៉ុនហាប់បានដកស្រង់សម្តីជំនួយការប្រធានាធិបតីកូរ៉េខាងត្បូង លោកលី ម្យុងបាក់ ដែលនិយាយថា នាយករដ្ឋមន្ត្រីចិន លោកវេន ជាបាវ ថ្លែងប្រាប់លោកប្រធានាធិបតីលី ម្យុងបាក់ នៅក្នុងទីក្រុងតូក្យូថា លោកគីម បានមកកាន់ប្រទេសចិន ដើម្បីសិក្សាអំពីដំណើរការវិវឌ្ឍន៍ផ្នែកសេដ្ឋកិច្ច ៕
ចែករំលែកព័តមាននេះ