ខេត្តកែប ៖ ថ្វីដ្បិតកែបជាខេត្តតូចមួយក្នុងចំណោមខេត្តទូទាំងព្រះរាជាណាចក្រកម្ពុជា ប៉ុន្តែ បើគេពិនិត្យមើលឱ្យច្បាស់មែនទែនទៅខេត្តដ៏តូចនេះ មានសក្តានុពលអាចផ្តល់នូវជីវភាពរស់នៅដល់ប្រជាពលរដ្ឋទូទាំងខេត្តបានយ៉ាងសមរម្យ
ខេត្តកែប ៖ ថ្វីដ្បិតកែបជាខេត្តតូចមួយក្នុងចំណោមខេត្តទូទាំងព្រះរាជាណាចក្រកម្ពុជា ប៉ុន្តែ បើគេពិនិត្យមើលឱ្យច្បាស់មែនទែនទៅខេត្តដ៏តូចនេះ មានសក្តានុពលអាចផ្តល់នូវជីវភាពរស់នៅដល់ប្រជាពលរដ្ឋទូទាំងខេត្តបានយ៉ាងសមរម្យ ។
លោកហាស់ សារ៉េត អភិបាលខេត្តបានមានប្រសាសន៍ក្នុងអង្គប្រជុំជាមួយថ្នាក់ដឹកនាំគ្រប់ស្ថាប័ននៅក្នុងខេត្តនាពេលកន្លងមកថ្មីៗនេះ ថា ខេត្តកែបតូចមែន តែបើផ្លាស់ចៅហ្វាយខេត្ត ដប់អាណត្តិទៀតក៏មិនចេះអស់ការងារធ្វើដែរ ឱ្យតែថ្នាក់ដឹកនាំទាំងនោះថាហើយធ្វើកុំថាចោល ពីព្រោះជាខេត្តដែលមានរមណីយដ្ឋានទេសចរណ៍ ។ ដូច្នេះមន្ត្រីថ្នាក់ដឹកនាំគ្រប់ស្ថាប័នទាំងអស់ក្នុងខេត្ត សុទ្ធតែមានតួនាទីទទួលខុសត្រូវការងាររៀងៗខ្លួន ដោយភាពម្ចាស់ការ ។ លោកហាស់ សារ៉េត បន្តថា ពាក់ព័ន្ធលើវិស័យទេសចរណ៍នេះ យើងត្រូវជំរុញកិច្ចការសំខាន់ៗជាច្រើនដើម្បីកែប្រែសោភ័ណភាពនៅក្នុងខេត្តទោះបីកន្លងមក ខេត្តកសាងបាននូវសមិទ្ធផលមួយចំនួនហើយក្តី ក៏ពុំទាន់បំពេញសេចក្តីត្រូវការរបស់ភ្ញៀវបានទាំងស្រុងនៅឡើយដែរ ។
ជាចក្ខុវិស័យសម្រាប់អនាគត គឺនឹងមានការរៀបចំតំបន់រមណីយដ្ឋានកោះទន្សាយឱ្យបានល្អទ្វេឡើងថែមទៀត រីឯទូកដឹកភ្ញៀវត្រូវរៀបចំឱ្យបានស្អាត ត្រូវធានាសុវត្ថិភាពជូនភ្ញៀវឱ្យបានល្អ ។ ទន្ទឹមនឹងនោះ ផ្លូវគមនាគមន៍យើងស្តារឡើងវិញបន្ថែមទៀត នូវផ្លូវមួយខ្សែដែលចេញពីមុខសាលាក្រុងរហូតមកដល់មន្ទីរគណបក្ស ត្រូវពង្រីកឱ្យធំ រៀបចំប្រព័ន្ធលូឱ្យបានល្អកុំឱ្យស្ទះទឹក ហើយផ្លូវខ្លះធ្វើសួនច្បារ ចំកណ្តាលផ្លូវ ខ្លះដាំកូនឈើសងខាងផ្លូវដែលមានខណ្ឌរដ្ឋបាលព្រៃឈើកំពតជាអ្នកជួយឧបត្ថម្ភ ។
លោកហាស់ សារ៉េត បន្តទៀតថា ប៉ុន្តែទោះបីជាមានការកសាង និងខិតខំស្តារហេដ្ឋារចនាសម្ព័ន្ធ នៅក្នុងខេត្តបានមួយចំនួនហើយក្តី ក៏អាជ្ញាធរខេត្តនៅជួបការលំបាក និងរាំងស្ទះលើការកែលំអសោភ័ណភាពក្រុងដែរ ដោយសារមានដីឡូត៍មួយចំនួនទុកចោល ម្ចាស់ពុំព្រមមកកសាងអ្វីទាំងអស់ ទុកព្រៃឱ្យនៅដុះស៊ុបទ្រុបដែលប្រការនេះធ្វើឱ្យការរៀបចំសោភ័ណភាពក្នុងក្រុងទាំងមូលមានការរាំងស្ទះជាអន្លើៗ ។ លោកអភិបាលខេត្តក៏បានអំពាវនាវផងដែរ ដល់អស់លោក លោកជំទាវឬបងប្អូនប្រជាពលរដ្ឋដែលមានដីឡូត៍នៅក្នុងក្រុងកែប សូមមេត្តារួសរាន់មកអភិវឌ្ឍដីកុំទុកចោលទំនេរ ជាហេតុនាំឱ្យរាំងស្ទះដល់ការអភិវឌ្ឍនៅក្នុងក្រុងទេសចរណ៍មួយនេះ ៕
ចែករំលែកព័តមាននេះ