ខេត្តបាត់ដំបង ៖ អគ្គិភ័យដែលគេអះអាងថា ផ្ដើមចេញពីការទុស្សេខ្សែចរន្តអគ្គិសនី បណ្ដាលឲ្យឆេះលំនៅឋានកសិករក្រីក្រមួយខ្នងអស់គ្មានសល់ កាលពីវេលាម៉ោង៩ និង៤០នាទីព្រឹកថ្ងៃទី ២៩ ធ្នូ នៅចំណុចភូមិក្រពាំងក្បាលស្វា ឃុំឃ្លាំងមាស ស្រុកបវេល តែមិនបង្កគ្រោះថ្នាក់ដល់មនុស្ស
ទេ ។
សេចក្ដីរាយការណ៍បានឲ្យដឹងថា លំនៅឋាននោះទំហំ៤ម៉x៥ម៉ ធ្វើប្រក់ស័ង្កសី ជញ្ជាំងក្ដារ ដែលមានម្ចាស់ឈ្មោះ ចាន់ រិទ្ធ ភេទប្រុស អាយុ៣៨ឆ្នាំ ។ គ្រួសារជនរងគ្រោះមិនបានស្នាក់នៅផ្ទះទេ តែគាត់បានដឹងនៅក្រោយពេលភ្លើងឆេះផ្ទះអស់ទៅហើយ ។
ម្ចាស់ផ្ទះបានប្រាប់សមត្ថកិច្ចថា គាត់បានបិទទ្វារទុកចោល ហើយចេញទៅធ្វើការជាមួយប្រពន្ធកូន លុះភ្លើងឆេះផ្ទះមានគេទូរស័ព្ទទើបដឹង ពេលមកដល់ភ្លើងឆេះផ្ទះអស់ទៅហើយ។ ពុំមានទ្រព្យសម្បត្តិដែលនៅសេសសល់ទេ គឺខូចខាតទាំងស្រុងតែម្ដង។
បើតាមសមត្ថកិច្ចរបាយការណ៍សមត្ថកិច្ចបានឲ្យដឹងថា ជនរងគ្រោះ គឺជាគ្រួសារក្រីក្រ ដែលមានតែសម្បកផ្ទះប៉ុណ្ណោះ។ លំនៅឋានគាត់បានរងការខូចខាតទាំងស្រុងតែម្ដង ដោយពុំអាចរំដោះទ្រព្យសម្បត្តិអ្វីបានបន្តិចឡើយ ។
ម្ចាស់ផ្ទះបានរាយការណ៍ប្រាប់សមត្ថកិច្ចថា តុល្យការនៃការខូចខាតរួមមាន៖ ពោតចំនួន៥០០គីឡូក្រាម លុយចំនួន២ម៉ឺនរៀល អង្ករចំនួន៥០គីឡូក្រាម ចានឆ្នាំង សម្លៀកបំពាក់ និង សម្បកផ្ទះសរុបជាប្រាក់អស់ខាតបង់ប្រមាណ៤លានរៀល ។ ពេលនេះ អាជ្ញាធរនិងមន្ត្រីជំនាញ កំពុងចុះធ្វើកំណត់ហេតុ ដើម្បីជួយសង្គ្រោះបឋមហើយ៕
ចែករំលែកព័តមាននេះ