ខេត្តបាត់ដំបង ៖ ក្នុងដំណើរទស្សនកិច្ចរបស់លោក ប្រេមជីត សាដាស៊ីវ៉ាន់ (Premjith Sadasivan) ឯកអគ្គរដ្ឋទូតសិង្ហបុរីប្រចាំ ប្រទេសកម្ពុជា បានធ្វើដំណើរទៅកាន់ខេត្ដបាត់ដំបង និងខេត្ដបន្ទាយមានជ័យ ដើម្បីស្វែងយល់ពីលក្ខណៈភូមិសាស្ដ្រ និងសកម្មភាពសេដ្ឋកិច្ចតំបន់នេះ ថាតើវាមានសក្ដានុពលប៉ុនណាក្នុងការផលិតនិងនាំស្បៀង
ខេត្តបាត់ដំបង ៖ ក្នុងដំណើរទស្សនកិច្ចរបស់លោក ប្រេមជីត សាដាស៊ីវ៉ាន់ (Premjith Sadasivan) ឯកអគ្គរដ្ឋទូតសិង្ហបុរីប្រចាំ ប្រទេសកម្ពុជា បានធ្វើដំណើរទៅកាន់ខេត្ដបាត់ដំបង និងខេត្ដបន្ទាយមានជ័យ ដើម្បីស្វែងយល់ពីលក្ខណៈភូមិសាស្ដ្រ និងសកម្មភាពសេដ្ឋកិច្ចតំបន់នេះ ថាតើវាមានសក្ដានុពលប៉ុនណាក្នុងការផលិតនិងនាំស្បៀងចេញពីតំបន់នេះនោះ ។
នាល្ងាចថ្ងៃទី២៤ ឧសភា លោកឯកអគ្គរដ្ឋទូតសិង្ហបុរីបានជួបអ្នកសារព័ត៌មានកម្ពុជា ប្រមាណ១០នាក់ ក្នុងពិធីបាយសាមគ្គីនៅភោជនីយដ្ឋាន River Side មាត់ស្ទឹងសង្កែ ខេត្តបាត់ដំបង ។ ពេលនោះលោកបានបញ្ជាក់ប្រាប់អ្នកសារព័ត៌មានថា លោកបានពិនិត្យស្វែងយល់ទៅលើក្រុមហ៊ុននាំអង្ករចេញចំនួន២ក្រុមហ៊ុនធំៗនៅខេត្ដបាត់ដំបងនេះ ថាតើការនាំអង្ករចេញទៅក្រៅប្រទេសនោះជួបការលំបាកនិងភាពងាយស្រួលបែបណា។ ជាគោលការណ៍តាមប្រសាសន៍របស់សម្ដេចតេជោហ៊ុន សែន ជានាយករដ្ឋមន្ដ្រីបានបញ្ជាក់ថា នឹងជំរុញការនាំអង្ករចេញឱ្យបាន១លានតោនក្នុងឆ្នាំ២០១៥ខាងមុខនេះ។
លោកបន្ដទៀតថា ប្រទេសសិង្ហបុរីជាប្រទេសដែលមានទំនាក់ទំនងគ្នាជាមួយកម្ពុជា បន្ទាប់ពីមានកិច្ចព្រមព្រៀងនៅទីក្រុងប៉ារីសនាឆ្នាំ១៩៩១ ហើយបានដាក់ទូតនៅឆ្នាំ១៩៩៣ដើម្បីធ្វើទំនាក់ទំនងគ្នាទៅវិញទៅមក។ លើវិស័យសេដ្ឋកិច្ច សិង្ហបុរីនាំចេញទំនិញមកកម្ពុជាភាគច្រើនជារបស់ប្រើប្រាស់គ្រឿងអេឡិចត្រូនិក ហើយជាប្រទេសមួយក្នុងចំណោមប្រទេសទាំង១០ នៅអាស៊ីអាគ្នេយ៍ ដែលមានការប្រកួតប្រជែងគ្នាលើវិស័យសេដ្ឋកិច្ច។ ដោយឡែកប្រទេសកម្ពុជាទើបតែមានការចាប់អារម្មណ៍ពីអន្ដរជាតិក្នុងឆ្នាំ២០១០ក្នុងការនាំស្បៀងចេញទៅក្រៅប្រទេស ។
លោកឯកអគ្គរដ្ឋទូតបញ្ជាក់ថា លោកបានជួបក្រុមហ៊ុននាំស្បៀងចេញទៅក្រៅប្រទេសគឺក្រុមហ៊ុនបៃតងកម្ពុជានិងក្រុមហ៊ុនឡូរ៉ង់ ហើយបានស្វែងយល់អំពីការផលិតឱ្យមានគុណភាពនិងការបណ្ដាក់ទុនគឺនៅមានការលំបាកនៅឡើយក្នុងការស្វែងរកដៃគូពីបរទេស ។ ចំពោះអ្នកវិនិយោគទុនសិង្ហបុរី គឺប្រយ័ត្នណាស់ចំពោះការដាក់ទុន ព្រោះពេលជួបការលំបាកនិងមានបញ្ហាតើខាងណាជាអ្នកទទួលខុសត្រូវ ។ គ្រប់អ្នកជំនួញទាំងអស់មិនចង់មានបញ្ហាក្នុងការរកស៊ីទេ ដូច្នេះសំខាន់គឺពួកគេចង់ឱ្យមានប្រព័ន្ឋច្បាប់គាំទ្រគេពីក្រោយ និងការផ្ដល់ទំនុកចិត្ដពីរដ្ឋាភិបាល ។ នេះគ្រាន់តែជាចំណុចចាប់ផ្ដើមពីកម្រិតទាបក្នុងការនាំស្បៀងចេញពីកម្ពុជា ព្រោះយើងត្រូវការឱ្យគេស្គាល់កម្ពុជាជាមុនសិន ទើបមានការឈានទៅទាក់ទាញពីមួយឆ្នាំទៅមួយឆ្នាំរហូតពេញសាកលលោក ។
ក្នុងជំនួបរវាងលោកប្រេមជីត សាដាស៊ីវ៉ាន់ និងលោកឧកញ៉ាភួ ពុយ ប្រធានសភាពាណិជ្ជកម្មខេត្ដបាត់ដំបង និងជាប្រធានក្រុមហ៊ុនបៃតងកម្ពុជា កាលពីរសៀលថ្ងៃដដែលនោះ លោកឧកញ៉ាភួ ពុយ បានបញ្ជាក់ប្រាប់កោះសន្ដិភាពថា សន្ទុះនៃការនាំចេញរបស់ក្រុមហ៊ុនបៃតងកម្ពុជាមានការកើនឡើងតាំងពីឆ្នាំ២០០៨ដល់ឆ្នាំ២០១០។ គម្រោងនាំអង្ករចេញឱ្យបាន១លានតោនក្នុងឆ្នាំ២០១៥ខាងមុខនេះ ប្រហែលជាអាចបានមុនគំរោងទៅទៀត ព្រោះម៉ាស៊ីនកិនស្រូវកែច្នៃធំៗតាមស្ដង់ដាអន្ដរជាតិសម្រាប់នាំចេញនោះកំពុងមានការកើនឡើង ៕
ចែករំលែកព័តមាននេះ