ខេត្តកំពង់ឆ្នាំង៖ ជុំវិញការភ្ញាក់ផ្អើល រឿងបដិមា ៥ព្រះអង្គ ដែលប្រជាពលរដ្ឋ បានអះអាងថា ផុសចេញពីក្នុងទន្លេ ត្រូវបានប្រធានមន្ទីរវប្បធម៌ និងវិចិត្រសិល្បៈ ខេត្តកំពង់ឆ្នាំង បានបញ្ជាក់ថា មិនមែនជាវត្ថុបុរាណទេ គឺសុទ្ធតែជារូបចម្លង និងឆ្លាក់ថ្មីទាំងអស់។
ការបញ្ជាក់បែបនេះ ក្នុងពេលដែលលោកប្រធានមន្ទីរ បានដឹកនាំមន្ត្រីជំនាញ និងសមត្ថកិច្ចចម្រុះ ទៅពិនិត្យបដិមា ទាំង ៥អង្គនោះ ដល់លំនៅដ្ឋានប្រជាពលរដ្ឋ ជាម្ចាស់បដិមាទាំង ៥អង្គ ក្នុងភូមិគៀនឃ្លាំង ឃុំអំពិលទឹក ស្រុកកំពង់ត្រឡាច នាព្រឹកថ្ងៃទី២៨ ខែធ្នូ ឆ្នាំ២០២៣។
ប្រធានមន្ទីរវប្បធម៌ និងវិចិត្រសិល្បៈ ខេត្តកំពង់ឆ្នាំង លោក សុខ ធួក បានលំអិតពីបដិមាទាំង ៥ អង្គ ថា ទី១ ព្រះពិស្នុការ ធ្វើអំពីស្ពាន់ មានទម្ងន់ជាង ៤,៤០គីឡូក្រាម មានកំពស់ ០,៥៣ម៉ែត្រ។បដិមានេះ ប្រហោងក្នុង ចាក់ស៊ីម៉ង់ត៍ បំពេញ រួចផ្សារស្ពាន់ផ្ជិតវិញ (ជារូបចាក់ ពុំចម្លងថ្មី)។ រូបទី២ ព្រះអង្គ ប្រក់នាគ មានទម្ងន់ ១,៤០គីឡូក្រាម មានកំពស់ ០,១៩ម៉ែត្រ ធ្វើជាស្ពាន់ ពុំមែនជារចនាបទខ្មែរទេ អាចជារបស់ប្រទេសម៉ាឡេស៊ី ឬ ឥណ្ឌូនេស៊ី។ ចំណែកបដិមា ៣ទៀត មានព្រះពុទ្ឋរូប មានទំងន់ ២,៨គីឡូក្រាម និងកំពស់ ០,២០ម៉ែត្រ, ព្រះភគណេស មានទម្ងន់ ៥,២០គីឡូក្រាម កំពស់ ០,២០ម៉ែត្រ និងរូបព្រះឥស្សី មានទម្ងន់ ១,៤០គីឡូក្រាម កំពស់ ០,៣០ម៉ែត្រ សុទ្ធតែជាបដិមាឆ្លាក់ថ្មី ចេញពីថ្មកែវ (ខេត្តពោធិ៍សាត់)។
លោកបានបញ្ជាក់ថា បដិមាទាំងអស់នេះ អាចត្រូវបាននរណាម្នាក់ ដែលថែរក្សា ហើយមិនទទួលបានលទ្ធផលល្អ ឬមិនបានសេចក្តីសុខ ក៏យកមកផ្លុងចោលក្នុងទន្លេទៅ។
លោកអះអាងបែបនេះ ព្រោះរបស់ខ្លះ ថ្វីបើមិនមែនបុរាណ តែអ្នកខ្លះ ទុកដាក់ក្នុងផ្ទះ មិនមានក្តីសុខ ឬរស់នៅមិនបាន ក៏យកទៅផ្លុងចោលបែបនេះ។
សម្រាប់មន្ទីរជំនាញ ក្រោយពីពិនិត្យ ឃើញថា ពុំមានជាវត្ថុបុរាណ ដែលមិនប៉ះពាល់ដល់សម្បត្តិវប្បធម៌ គឺមិនទទួលយកទៅថែរក្សាទេ អាចម្ចាស់អ្នករើសបាន យកទៅដាក់វត្ត ឬរក្សាទុកដោយខ្លួនឯង តែសុំកុំប៉ះពាល់ដល់សន្តិសុខសណ្តាប់ធ្នាប់សាធារណៈ និងប៉ះពាល់ដល់វប្បធម៌ជាតិ។
លោក ស៊ន សំអាត អភិបាលរងស្រុក និងលោក មួន មិថុនា អធិការនគរបាលស្រុកកំពង់ត្រឡាច ក៏បានបញ្ជាក់ដែរថា មន្ទីរជំនាញ ក៏ដូចជា អាជ្ញាធរ ក៏មិនទាន់សម្រេចដកហូតបដិមាពីម្ចាស់ បដិមា ទាំង ៥អង្គ ពិតមែន គឺទុកឱ្យរក្សាទុក គោរពទៅតាមជំនឿជាបណ្តោះអាសន្ន តែត្រូវធ្វើកិច្ចសន្យា មិនបំផុសឱ្យមានអបីយជំនឿ បង្កភាពអនាធបតេយ្យ ត្រូវសន្យា ថែរក្សាសណ្ដាប់ធ្នាប់របៀបរៀបរយ ហើយបើមិនគោរពទៅតាមគោលការណ៍ទេ បដិមាទាំងនោះ នឹងត្រូវដកហូត យកទៅរក្សាទុក។
ដោយឡែក លោក ប៊ុត សុភិន អាយុ ៤០ឆ្នាំ ជាម្ចាស់បដិមាទាំង ៥អង្គ បានអះអាងថា កាលពី រសៀលថ្ងៃទី២៦ ខែធ្នូ ឆ្នាំ២០២៣ ពេលគាត់ទៅដាក់មង ក្នុងទន្លេ ចម្ងាយប្រាណ ១០០ម៉ែត្រ ពីផ្ទះរបស់គាត់ ក៏ស្រាប់តែជាន់ និងរបស់រឹង នៅក្នុងទឹកទន្លេជម្រៅត្រឹមចង្កេះ ហើយគាត់ ក៏កាយចេញមក ឃើញបដិមាមួយអង្គ មានដៃ ៨ រួចក៏យកមកផ្ទះប្រាប់បងប្អូន ហើយបងប្អូន ផ្តល់យោបល់ថា សង្ស័យថា នៅមានទៀត គាត់ក៏ទៅកាយនៅទីនោះម្ដងទៀត ក៏បានប្រទះឃើញបដិមា ៤អង្គ ថែមទៀត។
សូមបញ្ជាក់ថា លោក ប៊ុត សុភិន សុំមិនផ្តល់ជូនបដិមាទាំង ៥អង្គនោះ ទៅមន្ត្រីជំនាញ ឬរក្សាទុក នៅទីណាទេ។ តែលោកសូមប្ដេជ្ញាថែរក្សាបដិមានេះ ឱ្យបានគង់វង្ស និងសូមសន្យា មិនធ្វើឱ្យមានភាពអនាធិបតេយ្យ បង្កផលប៉ះពាល់ដល់សង្គមនោះឡើយ។
គួររំលឹកថា ៖ ភ្ញាក់ផ្អើល! បុរសម្នាក់ទៅដាក់លប ស្រាប់តែឃើញព្រះបដិមា៥អង្គផុសចេញពីដីច្រាំងទន្លេ ៕
ចែករំលែកព័តមាននេះ