មានហេតុការណ៍ភ្ញាក់មួយបានកើតឡើងកាលពីរសៀលថ្ងៃទី២៦ ខែធ្នូ ឆ្នាំ ២០២៣ ដោយសារតែប្រជាពលរដ្ឋបានអះអាងថា «មានបុរសម្នាក់ខណៈដាក់លប ស្រាប់តែប្រទះឃើញព្រះបដិមាចំនួន៥ព្រះអង្គផុសចេញពីក្នុងដីច្រាំងទន្លេជាបន្តបន្ទាប់ ហើយក៏
ខេត្តកំពង់ឆ្នាំង ៖ មានហេតុការណ៍ភ្ញាក់មួយបានកើតឡើងកាលពីរសៀលថ្ងៃទី២៦ ខែធ្នូ ឆ្នាំ ២០២៣ ដោយសារតែប្រជាពលរដ្ឋបានអះអាងថា «មានបុរសម្នាក់ខណៈដាក់លប ស្រាប់តែប្រទះឃើញព្រះបដិមាចំនួន៥ព្រះអង្គផុសចេញពីក្នុងដីច្រាំងទន្លេជាបន្តបន្ទាប់ ហើយក៏បានរើសមកដាក់នៅផ្ទះ»។ បន្ទាប់មក ប្រជាពលរដ្ឋក៏នាំគ្នាទៅចោមរោមមើល និងនាំគ្នាស្រោចទឹកលើរូបបដិមាទាំង៥ព្រះអង្គនោះ ហើយក៏ត្រងយកទឹកនោះមកលុបលាងមុខមាត់ តាមជំនឿសុំសេចក្តីសុខចំរើន។ ហេតុការណ៍នេះ បានកើតឡើងនៅភូមិកៀនឃ្លាំង ស្ថិតក្នុងឃុំអំពិលទឹក ស្រុកកំពង់ត្រឡាច។
បើតាមលោក នន ស៊ីណាត អធិការនគរបាលស្រុកកំពង់ស្រឡាច បានប្រាប់ឲ្យដឹងថា «ក្រោយពីទទួលបានព័ត៌មានថា មានប្រជាពលរដ្ឋរើសបានបដិមាចំនួន៥ព្រះអង្គមក លោកក៏បានឲ្យមន្ត្រីរបស់លោកទៅពិនិត្យមើលភ្លាម ហើយក៏ឃើញថា ប្រជាពលរដ្ឋកំពុងតែចោមរោមមើលបដិមានោះមែន។ ប៉ុន្តែនៅមិនទាន់ដឹងច្បាស់ទេថា តើរើសពីក្នុងទន្លេ ឬយ៉ាងណា គឺនៅមិនទាន់ដឹងច្បាស់ឡើយ?។ ចំណែកមន្ត្រីរបស់លោក ក៏មិនទាន់បានចូលទៅដល់ដែរ ព្រោះថា មានមនុស្សច្រើនពេក និងកំពុងដុតធូបទៀន ដើម្បីសុំសេចក្តីសុខតាមជំនឿ»។
លោកអធិការនគរបាល ស្រុកកំពង់ត្រឡាច បានបញ្ជាក់ថា «អ្នករើសបានបដិមាទាំង៥អង្គនោះមានឈ្មោះ ប៊ុត សុភិន អាយុ៤០ឆ្នាំ មានទីលំនៅក្នុងភូមិព្រែកតាទែន ឃុំពញាឮ ស្រុកពញាឮ ខេត្តកណ្តាល ហើយមករស់នោះខាងប្រពន្ធឈ្មោះ អ៊ុយ ស៊ីថន អាយ៣៦ឆ្នាំ ស្ថិតនៅក្នុងភូមិគៀនឃ្លាំង ឃុំអពិលទឹក ស្រុកកំពង់ត្រឡាច ខេត្តកំពង់ឆ្នាំង និងមានកូនចំនួន៦នាក់ផងដែរ»។
ចំណែក លោក សុខ ធួក ប្រធានមន្ទីរវប្បធម៌ និងវិចិត្រសិល្បៈខេត្តកំពង់ឆ្នាំង បានបញ្ជាក់ប្រាប់ឱ្យដឹងដែរថា «លោកបានបញ្ជូនមន្ត្រីវប្បធម៌ និងវិចិត្រសិល្បៈស្រុកកំពង់ត្រឡាច ទៅពិនិត្យមើលដល់ផ្ទះនោះហើយ។ ម្ចាស់បដិមាទាំង៥ព្រះអង្គ បានអះអាងថា ពេលគាត់ទៅដាក់លប ក៏បានប្រទះឃើញបដិមាទាំង៥ព្រះអង្គលេចចេញពីក្នុងដីច្រាំងទន្លេ ហើយក៏យកមកដាក់នៅផ្ទះ ក្នុងគោលបំណងសុំសេចក្តីសុខចំរើន»។
លោក សុខធួក បានបញ្ជាក់ទៀតថា «បើពិនិត្យមើលតាមរូបភាពដែលមន្ត្រីស្រុករបស់លោកផ្ញើមក គឺបដិមាទាំង៥ព្រះអង្គនោះ រួមមាន ៖ ព្រះនរាយ១អង្គ, ព្រះភគណេសនេះ១អង្គ, ព្រះពុទ្ធរូប១អង្គ, ព្រះឥសូរឈរកាន់ជើងច្រត់១អង្គ និងមួយអង្គទៀតមិនទាន់ស្គាល់។ យ៉ាងនេះក្តី រូបលោក និងមន្ត្រីជំនាញទៅពិនិត្យដោយផ្ទាល់ នៅថ្ងៃទី២៨ ខែធ្នូ ស្អែកនេះ»។
លោក សុខ ធួក ក៏បានបញ្ជាក់ទៀតថា «មើលរូបរាងតាមរូបភាពរូបមក ឥសីឈរកាន់ឈើច្រត់ពីបុរាណមិនមានទេ សង្ស័យធ្វើថ្មី។ ចំណែករូបដែលមិនស្គាល់ គឺមិនមែនជារូបបដិមាករបុរាណអីនោះទេ ។ រីឯព្រះនរាយ និងព្រះភគណេស ក៏មិនទាន់ដឹងច្បាស់ថា តើជារូបបុរាណ ឬក៏រូបចាក់ថ្មីដែរ?។
ព័ត៌មានបន្ថែម និងលំអិតនឹងមានផ្សាយជូននៅពេលក្រោយបន្តទៀត៕
ចែករំលែកព័តមាននេះ