ខេត្តកំពង់ស្ពឺ ៖ បុរសម្នាក់បានស្លា.ប់បាត់បង់ជីវិត និងម្នាក់ទៀតរងរបួសធ្ងន់ដឹកយកទៅសង្គ្រោះនៅមន្ទីរពេទ្យនៅក្នុងឧប្បត្តិហេតុរថយន្តបុកម៉ូតូ កាលពីវេលាម៉ោង១២និង៤០នាទីថ្ងៃត្រង់ ថ្ងៃទី២៣ ឧសភា នៅតាមផ្លូវលំលេខ៤៤ មុខបញ្ជាការដ្ឋានកងរាជអាវុធហត្ថស្រុកឱរ៉ាល់ ស្ថិតក្នុងភូមិគោក ឃុំសង្កែសាទប ស្រុកឱរ៉ាល់
ខេត្តកំពង់ស្ពឺ ៖ បុរសម្នាក់បានស្លាប់បាត់បង់ជីវិត និងម្នាក់ទៀតរងរបួសធ្ងន់ដឹកយកទៅសង្គ្រោះនៅមន្ទីរពេទ្យនៅក្នុងឧប្បត្តិហេតុរថយន្តបុកម៉ូតូ កាលពីវេលាម៉ោង១២និង៤០នាទីថ្ងៃត្រង់ ថ្ងៃទី២៣ ឧសភា នៅតាមផ្លូវលំលេខ៤៤ មុខបញ្ជាការដ្ឋានកងរាជអាវុធហត្ថស្រុកឱរ៉ាល់ ស្ថិតក្នុងភូមិគោក ឃុំសង្កែសាទប ស្រុកឱរ៉ាល់ ។
លោកអនុសេនីយ៍ឯក សោម ពុទ្ធតារា មេបញ្ជាការកងរាជអាវុធហត្ថស្រុកឱរ៉ាល់ បានឱ្យដឹងថា រថយន្តកូរ៉េ ធុន១តោនកន្លះ បើកមកពីទិសខាងកើតសំដៅចូលមកទីរួមស្រុកឱរ៉ាល់ បានបុកម៉ូតូមួយគ្រឿងម៉ាកយ៉ាម៉ាហា ជិះគ្នាពីរនាក់ ជាអ្នកដើរទិញគោដែលធ្វើដំណើរស្របទិសគ្នា បណ្តាលឱ្យស្លាប់ម្នាក់ភ្លាមៗ និងរងរបួសធ្ងន់ម្នាក់។ ក្រោយពីកើតហេតុភ្លាមកម្លាំងរបស់លោកបានផ្តល់ដំណឹងទៅប៉ូលិសចរាចរស្រុកមកវាស់វែងធ្វើកំណត់ហេតុ និងសហការគ្នាឃាត់រថយន្តបានភ្លាមៗដែរ ។ រថយន្តកូរ៉េមួយគ្រឿងនោះពណ៌ស ពាក់ស្លាកលេខភ្នំពេញ 2N-7916 បើកបរដោយឈ្មោះសូ គីមដារ៉ា ភេទប្រុស អាយុ៣១ឆ្នាំ មានទីលំនៅផ្ទះលេខ5E1 ផ្លូវលេខ១២៣ សង្កាត់បឹងត្របែក ខណ្ឌ ចំការមន បើកបរឱ្យក្រុមហ៊ុនយ៉េឡូហ្វៀល មានទីតាំងនៅភូមិជាំ ឃុំតាសាល ស្រុកឱរ៉ាល់ ។
ចំណែកអ្នកបើកបរម៉ូតូដែលស្លាប់ឈ្មោះប្រាក់ ជុំ អាយុ៦៣ឆ្នាំ នៅភូមិត្រពាំងឆ្មា ឃុំតាសាល និងអ្នករងរបួសធ្ងន់ឈ្មោះសៀម វ៉ាន់ អាយុ៣៦ឆ្នាំ មានទីលំនៅក្នុងភូមិ-ឃុំជាមួយគ្នា។ តាមប្រភពព័ត៌មានថា ក្រោយពីមានគ្រោះថ្នាក់កើតឡើង រថយន្តពុំបានឈប់ទេ គឺបើករត់សំដៅទៅក្រុមហ៊ុនរបស់ខ្លួន តែត្រូវកម្លាំងកងរាជអាវុធហត្ថ និងប៉ូលិសសហការគ្នាដេញទាន់នាំទាំងអ្នកបើកបរ និងរថយន្តយកមកកាន់អធិការដ្ឋាននគរបាលស្រុករង់ចាំការដោះស្រាយ ។
សពអ្នករងគ្រោះត្រូវបានប្រគល់ឱ្យបងប្អូនយកទៅធ្វើបុណ្យតាមប្រពៃណី ចំណែកអ្នករបួសធ្ងន់ត្រូវបានដឹកយកទៅសង្គ្រោះនៅមន្ទីរពេទ្យស្រុក។ សមត្ថកិច្ចស្រុកនិយាយថា រថយន្តបើកបរតាមផ្លូវនេះ លឿនៗណាស់ពេលមានឧបសគ្គអ្វីកើតឡើងមិនអាចទប់ហ្វ្រាំងជាប់ទេ ហើយរថយន្តខ្លះដឹងអុសពី១៥តោនទៅ២០តោន ធ្វើឱ្យអ្នកជិះម៉ូតូមានការភ័យខ្លាច ពិសេសរថយន្តរបស់ក្រុមហ៊ុនតែម្តង បើកលឿនៗណាស់់៕
ចែករំលែកព័តមាននេះ