ខេត្តពោធិ៍សាត់ ៖ ដីបឹងធម្មជាតិស្វាយសដ៏ធំ បែងចែកភូមិចំនួន២ គឺភូមិចំការអូរ និងភូមិស្រែល្វា ក្នុងឃុំត្រពាំងជង ស្រុកបាកាន តម្រូវឲ្យអាជ្ញាធរនិងស្ថាប័នពាក់ព័ន្ធ ត្រូវតែសហការកែលម្អធ្វើការអភិវឌ្ឍ ដើម្បីបម្រើផលប្រយោជន៍រួម មិនឱ្យបុគ្គលណាម្នាក់មករំលោភយកធ្វើជាកម្មសិទ្ធិនោះ
ទេ ។
នេះជាការសម្រេចរបស់ឯកឧត្តម ខូយ រីដា អភិបាលខេត្ត ខណៈអញ្ជើញទៅពិនិត្យជាក់ស្ដែង និងសម្របសម្រួលនៅនឹងទីតាំងខាងលើ កាលពីថ្ងៃទី២៥ ខែធ្នូ ឆ្នាំ២០២៣កន្លងទៅ បន្ទាប់ពីលេចចេញព័ត៌មានថា មិនមានភាពប្រក្រតីលើការបូមខ្សាច់ ។
ឆ្លងតាមការពិនិត្យជាក់ស្ដែងឃើញថា ផ្ទៃបឹងទាំងមូលដែលមានប្រវែងជាង១.០០០ម៉ែត្រនោះ មានកន្លែងខ្លះបានកែច្នៃកាយចាក់ដីក្លាយជាទីទួលខ្ពស់បម្រុងយកជាកម្មសិទ្ធិ ធ្វើឱ្យជម្រៅទឹកបឹងកាន់តែគោករាក់ជាបន្តបន្ទាប់ពីមួយឆ្នាំទៅមួយឆ្នាំ មិនបានបម្រើផលប្រយោជន៍អ្វីដល់សង្គមឡើយ ជាពិសេសបងប្អូនប្រជាពលរដ្ឋនៅក្នុងតំបន់នោះតែម្ដង ដែលមិនអាចបណ្ដែតបណ្ដោយឱ្យបន្តកើតមានឡើងតទៅទៀតនោះទេ គឺត្រូវតែកែតម្រូវឡើងវិញ ។
ដោយឡែក ចំពោះក្រុមហ៊ុនបូមខ្សាច់វិញ ត្រូវធ្វើយ៉ាងណាឲ្យការយកខ្សាច់នោះទៅតាមលក្ខណៈបច្ចេកទេស យោងទៅលើស្ថានភាពជាក់ស្ដែង ស្របតាមច្បាប់ដែលបានកំណត់ ចៀសវាងការបង្កផលប៉ះពាល់ដល់ប្រយោជន៍បងប្អូនប្រជាពលរដ្ឋ គឺក្រៅពីការយកខ្សាច់ ត្រូវគិតពីផលប្រយោជន៍រួម ទាំងនៅក្នុងពេលបច្ចុប្បន្ន និងទៅអនាគតត ។
ក្នុងន័យនេះ ឯកឧត្តម ខូយ រីដា អភិបាលខេត្ត បានដាក់ផែនការយ៉ាងមុឺងម៉ាត់ដល់ប្រតិបត្តិករបូមខ្សាច់ អាជ្ញាធរមូលដ្ឋានភូមិ ឃុំ ស្រុក អង្គភាពស្ថាប័ន មន្ទីរពាក់ព័ន្ធទាំងអស់ រួមនឹងបងប្អូនប្រជាពលរដ្ឋ ត្រូវសហការគ្នាកែតម្រូវដោយស្មារតីទទួលខុសត្រូវខ្ពស់ ធ្វើយ៉ាងណាឲ្យផ្ទៃបឹងទាំងមូលមានសោភ័ណភាពល្អស្រស់បំព្រង ប្រកបដោយអនាម័យ បរិស្ថាន ជម្រៅទឹកឲ្យបានជ្រៅសម្រាប់ស្តុកទឹក ដើម្បីបងប្អូនប្រើប្រាស់ក្នុងជីវភាពប្រចាំថ្ងៃ និងស្រោចស្រពដំណាំផ្សេងៗ ។
លើសពីនេះទៀត នឹងបង្កើតឱ្យមានផ្លូវល្អសមរម្យ ដែលធ្វើឲ្យបឹងធម្មជាតិមួយនេះ អាចប្រែក្លាយជាកន្លែងទេសចរណ៍មួយក្នុងតំបន់ ទាក់ទាញភ្ញៀវមកលេងកម្សាន្ត ស្រូបយកខ្យល់អាកាសបរិសុទ្ធ ជាមួយនឹងទិដ្ឋភាពសម្បូរបែបនៅទីនេះ ដែលបងប្អូនប្រជាពលរដ្ឋអាចរកប្រាក់ចំណូលផ្គត់ផ្គង់ជីវភាព បន្ថែមពីលើមុខរបរប្រចាំថ្ងៃផងដែរ ។
ឯកឧត្តមអភិបាលខេត្ត បានផ្ដល់លេខទូរស័ព្ទចំនួន៣ខ្សែ សម្រាប់ទាក់ទង ដើម្បីដោះស្រាយរាល់បញ្ហាប្រឈម ក៏ដូចជាកង្វល់ផ្សេងៗរបស់បងប្អូនប្រជាពលរដ្ឋ ចៀសវាងការភ័ន្តច្រឡំ តាមរយៈការផ្សព្វផ្សាយព័ត៌មានមិនបានគ្រប់ជ្រុងជ្រោយ ធ្វើឱ្យប៉ះពាល់ដល់សណ្ដាប់ធ្នាប់សាធារណៈ ជាពិសេសគោលនយោបាយដ៏ត្រឹមត្រូវរបស់រាជរដ្ឋាភិបាល ។
បងប្អូនប្រជាពលរដ្ឋនៅក្នុងភូមិចំការអូរ និងភូមិស្រែល្វា ឃុំត្រពាំងជង ស្រុកបាកាន និងក្រុមហ៊ុនបូមខ្សាច់ បានសាទរជាមួយចំពោះដំណោះស្រាយបញ្ចប់រឿងយ៉ាងមានប្រសិទ្ធភាព ប្រកបដោយផ្លែផ្កា គឺឈ្នះ-ឈ្នះទាំងអស់គ្នា ៕
ចែករំលែកព័តមាននេះ