ខេត្តបាត់ដំបង ៖ ជនសង្ស័យចំនួន០២នាក់ត្រូវបានសមត្ថកិច្ចឃាត់ខ្លួន កាលពីវេលាម៉ោង០៩និង១០នាទីព្រឹកថ្ងៃទី២៦ ធ្នូ ក្រោយពីជនទាំងពីរនាក់បានធ្វើសកម្មភាពគាស់តូបអាជីវករលក់ដូរមួយកន្លែង នៅក្នុងផ្សារឈើទាល ស្ថិតក្នុងភូមិឈើទាល ឃុំឈលទាល ស្រុកបាណន់…
ខេត្តបាត់ដំបង ៖ ជនសង្ស័យចំនួន០២នាក់ត្រូវបានសមត្ថកិច្ចឃាត់ខ្លួន កាលពីវេលាម៉ោង០៩និង១០នាទីព្រឹកថ្ងៃទី២៦ ធ្នូ ក្រោយពីជនទាំងពីរនាក់បានធ្វើសកម្មភាពគាស់តូបអាជីវករលក់ដូរមួយកន្លែង នៅក្នុងផ្សារឈើទាល ស្ថិតក្នុងភូមិឈើទាល ឃុំឈលទាល ស្រុកបាណន់ និងដកហូតបានវិញនូវគ្រឿងអលង្ការទាំងអស់ រួមជាមួយខោអាវជាច្រើនកំភ្លេផង ។
របាយការណ៍ប៉ុស្ដិ៍រដ្ឋបាលឃុំឈើទាលបានឲ្យដឹងថា ជនសង្ស័យទាំងពីរនាក់ដែលត្រូវឃាត់ខ្លួនម្នាក់ឈ្មោះយ៉ាន់ ច័ន្ទថន ភេទប្រុស អាយុ១៥ឆ្នាំ រីឯម្នាក់ទៀតឈ្មោះ សុត ពិសី ភេទប្រុស អាយុ២០ឆ្នាំ រស់នៅជាមួយគ្នា នៅភូមិឈើទាល ឃុំឈើទាល ។
ដោយឡែក ជនរងគ្រោះឈ្មោះ លឹម ចាន់ថន ភេទប្រុស អាយុ៣៦ឆ្នាំ ជាអាជីវករលលក់ដូរ រស់នៅកន្លែងកើតហេតុ ។ បើតាមជនរងគ្រោះបានប្រាប់សមត្ថកិច្ចថា គាត់មិនដឹងបានថា តើក្រុមចោរគាស់តូបគាត់លួចគ្រឿងអល័ង្ការនៅម៉ោងប៉ុន្មានទេ ព្រោះគាត់មិនដែលស្នាក់នៅក្នុងតូបលក់ដូរនោះទេ តែគាត់បានដឹងនៅម៉ោងជាង៦ព្រឹកថ្ងៃទី២៦ ធ្នូ នៅពេលគាត់ទៅបើកតូបលក់ដូរ ។
សមត្ថកិច្ចបានស្រង់សម្ដីម្ចាស់តូបថា ក្រុមចោរបានគាស់បង្អូច រួចចូលទៅខាងក្នុងលួចយកគ្រឿងអល័ង្ការ និងខោអាវថ្មីដែលគាត់ដាក់លក់ ។ ពេលនោះ គាត់បានរាយការណ៍ប្ដឹងទៅមន្ត្រីប៉ុស្ដិ៍រដ្ឋបាលឈើទាលភ្លាមៗតែម្ដង ។
នាយបុស្ដិ៍រដ្ឋបាលឃុំឈើទាល លោក ស៊ីម ពិទូ បានប្រាប់ថា ជនរងគ្រោះត្រូវចោរលួចចិញ្ចៀនផ្លាទីនអស់ចំនួន៥៥វង់ និងខោខូវប៊យចំនួន១៧ខោ និងអាវចំនួន០៨អាវ តែក្រោយចាប់ខ្លួនជនដៃដល់ កម្លាំងរបស់លោកបានធ្វើការស្រាវជ្រាវដកហូតបានវត្ថុតាងនេះ យកមកវិញទាំងអស់ ខណៈដែលជនដៃដល់ទើបយកទៅលក់ឲ្យគេ ។
លោកមេប៉ុស្ដិ៍រូបនេះបាននិយាយថា ពុំមាននរណាបានដឹងពីសកម្មភាព ឬម៉ោងដែលក្រុមជនដៃដល់ធ្វើសកម្មភាពគាស់តូបអាជីវករខាងលើនេះទេ សូម្បីតែម្ចាស់តូបក៏មិនបានដឹងដែរ ។ ប៉ុន្តែបើតាមចម្លើយសារភាពរបស់ក្រុមចោរបានប្រាប់ថា ពួកខ្លួនបានធ្វើសកម្មភាពគាស់តូបនៅម៉ោងប្រហែល១១យប់ថ្ងៃទី ២៥ ធ្នូ ។
លោក ស៊ីម ពិទូ បានបញ្ជាក់ថា ក្រោយលួចបានចិញ្ចៀន និងខោអាវ ជននេះ បានយកទៅលក់ ហើយជនម្នាក់ឈ្មោះច័ន្ទថន សំងំលាក់ខ្លួននៅក្នុងផ្ទះ ។ រីឯឈ្មោះ ពិសី បានរត់គេចទៅសំងំលាក់ខ្លួននៅទឹកដីឃុំរស្មីសង្ហា ស្រុករតនមណ្ឌល តែត្រូវកម្លាំងរបស់លោក ធ្វើការស្រាវជ្រាវតាមឃាត់ខ្លួនបានជាបន្តបន្ទាប់ ថែលតាំងដកហូតបានវត្ថុតាងបានវិញគ្រប់ចំនួនប្រគល់ជូនជនសរងគ្រោះ ។ ពេលនេះ មន្ត្រីជំនាញកំពុងសួរនាំជនសង្ស័យ ដើម្បីចាត់ការតាមនីតិវិធីហើយ ។
ចែករំលែកព័តមាននេះ