ដីបឹងធម្មជាតិរបស់រដ្ឋត្រូវតែអភិវឌ្ឍន៍ដើម្បីប្រយោជន៍រួម មិនអនុញ្ញាតឱ្យអ្នកណាម្នាក់យកមកធ្វើកម្មសិទ្ធិឡើយ
- ពោធិ៍សាត់
ខេត្តពោធិ៍សាត់ ៖ ដីបឹងធម្មជាតិស្វាយសដ៏ធំមួយកន្លែង បែងចែកភូមិចំនួន២ គឺភូមិចំការអូរ និង
ខេត្តពោធិ៍សាត់ ៖ ដីបឹងធម្មជាតិស្វាយសដ៏ធំមួយកន្លែង បែងចែកភូមិចំនួន២ គឺភូមិចំការអូរ និងភូមិស្រែល្វា ស្ថិតក្នុងឃុំត្រពាំងជង ស្រុកបាកាន ខេត្តពោធិ៍សាត់ គឺតម្រូវឲ្យអាជ្ញាធរនិងស្ថាប័នពាក់ព័ន្ធត្រូវតែសហការកែលម្អធ្វើការអភិវឌ្ឍ ដើម្បីបម្រើផលប្រយោជន៍រួម មិនឱ្យបុគ្គលណាម្នាក់មករំលោភយកធ្វើជាកម្មសិទ្ធិនោះទេ។ នេះជាការសម្រេច របស់លោកខូយ រីដា អភិបាលខេត្តពោធិ៍សាត់ ខណៈពេលចុះពិនិត្យជាក់ស្ដែងនិងសម្របសម្រួលនៅហ្នឹងទីតាំងខាងលើ កាលពីថ្ងៃទី២៥ ខែធ្នូ ឆ្នាំ២០២៣ បន្ទាប់ពីលេចចេញព័ត៌មានថា មិនមានភាពប្រក្រតីទៅលើការបូមខ្សាច់។
ឆ្លងតាមការពិនិត្យជាក់ស្ដែងឃើញថា ផ្ទៃបឹងទាំងមូលដែលមានប្រវែងប្រមាណជាង១.០០០ម៉ែត្រនោះ មានកន្លែងខ្លះបានកែច្នៃកាយចាក់ដីក្លាយជាទីទួលខ្ពស់បម្រុងយកជាកម្មសិទ្ធិ ធ្វើឱ្យជម្រៅទឹកបឹងកាន់តែគោករាក់ជាបន្តបន្ទាប់ពីមួយឆ្នាំទៅមួយឆ្នាំ មិនបានបម្រើផលប្រយោជន៍អ្វីដល់សង្គមនោះឡើយ ជាពិសេសបងប្អូនប្រជាពលរដ្ឋនៅក្នុងតំបន់នោះតែម្ដងមិនអាចបណ្ដែតបណ្ដោយឱ្យបន្តកើតមានឡើងតទៅទៀតនោះទេ គឺត្រូវតែកែតម្រូវឡើងវិញ។
ដោយឡែកចំពោះក្រុមហ៊ុនបូមខ្សាច់វិញ ត្រូវធ្វើយ៉ាងណាឲ្យការយកខ្សាច់នោះទៅតាមលក្ខណៈបច្ចេកទេស យោងទៅលើស្ថានភាពជាក់ស្ដែងស្របតាមច្បាប់ដែលបានកំណត់ ជៀសវាងការបង្កផលប៉ះពាល់ដល់ប្រយោជន៍បងប្អូនប្រជាពលរដ្ឋ គឺក្រៅពីការយកខ្សាច់ត្រូវគិតពីផលប្រយោជន៍រួមទាំងនៅក្នុងពេលបច្ចុប្បន្ននិងទៅអនាគតត។
ក្នុងន័យនេះ លោកខូយ រីដា អភិបាលខេត្តពោធិ៍សាត់ បានដាក់ផែនការយ៉ាងម៉ឹងម៉ាត់ដល់ប្រតិបត្តិករបូមខ្សាច់ អាជ្ញាធរមូលដ្ឋានភូមិឃុំស្រុក អង្គភាពស្ថាប័ន មន្ទីរពាក់ព័ន្ធទាំងអស់ រួមនឹងបងប្អូនប្រជាពលរដ្ឋ ត្រូវសហការគ្នាកែតម្រូវ ដោយស្មារតីទទួលខុសត្រូវខ្ពស់ ធ្វើយ៉ាងណាឲ្យផ្ទៃបឹងទាំងមូលមានសោភ័ណភាពល្អស្រស់បំព្រង ប្រកបដោយអនាម័យបរិស្ថាន ជម្រៅទឹកឲ្យបានជ្រៅសម្រាប់ស្តុបទឹក ដើម្បីបងប្អូនប្រើប្រាស់ក្នុងជីវភាពប្រចាំថ្ងៃ និងស្រោចស្រពដំណាំផ្សេងៗ លើសពីនេះទៀត នឹងបង្កើតឱ្យមានផ្លូវល្អសមរម្យ ដែលធ្វើឲ្យបឹងធម្មជាតិមួយនេះអាចប្រែក្លាយជាកន្លែងទេសចរណ៍មួយក្នុងតំបន់ទាក់ទាញភ្ញៀវមកកំសាន្តលេង ស្រូបយកខ្យល់អាកាសបរិសុទ្ធ ជាមួយនឹងទិដ្ឋភាពសម្បូរបែបនៅទីនេះ ដែលបងប្អូនប្រជាពលរដ្ឋអាចរកប្រាក់ចំណូលផ្គត់ផ្គង់ជីវភាពបន្ថែមពីលើមុខរបរប្រចាំថ្ងៃផងដែរ។
លោកអភិបាលខេត្ត បានផ្ដល់លេខទូរស័ព្ទចំនួន៣ខ្សែ សម្រាប់ទំនាក់ទំនង ដើម្បីដោះស្រាយ នៅរាល់បញ្ហាប្រឈម ក៏ដូចជាកង្វល់ផ្សេងៗរបស់បងប្អូនប្រជាពលរដ្ឋ ជៀសវាងការភាន់ច្រឡំតាមរយៈការផ្សព្វផ្សាយព័ត៌មានមិនបានគ្រប់ជ្រុងជ្រោយ ធ្វើឱ្យប៉ះពាល់សណ្ដាប់ធ្នាប់សាធារណៈ ជាពិសេសគោលនយោបាយដ៏ត្រឹមត្រូវរបស់រាជរដ្ឋាភិបាល។
បងប្អូនប្រជាពលរដ្ឋ នៅក្នុងភូមិចំការអូរ និងភូមិស្រែល្វា ឃុំត្រពាំងជង ស្រុកបាកាន ខេត្តពោធិ៍សាត់ និងក្រុមហ៊ុនបូមខ្សាច់ បានសាទរជាមួយនឹងដំណោះស្រាយបញ្ចប់រឿងយ៉ាងមានប្រសិទ្ធភាពប្រកបដោយផ្លែផ្កាគឺ ឈ្នះឈ្នះទាំងអស់គ្នា៕
ចែករំលែកព័តមាននេះ