ខេត្តបាត់ដំបង+ប៉ៃលិន ៖ អាជីវករផ្សារណាត់ក្នុងក្រុងបាត់ដំបង ប្រហែល២០០នាក់ កាលពីព្រឹកថ្ងៃទី២៤ ឧសភា បានទៅខាងមុខសាលាខេត្តបាត់ដំបងជាថ្មីទៀត ដើម្បីទាមទារឱ្យអាជ្ញាធរខេត្តបញ្ឈប់ការដំឡើងថ្លៃតូបក្នុងផ្សាររបស់រដ្ឋមួយនេះ ក្រោយពីការតវ៉ាកាលពីដើមខែនេះមិនបានសម្រេច
ខេត្តបាត់ដំបង+ប៉ៃលិន ៖ អាជីវករផ្សារណាត់ក្នុងក្រុងបាត់ដំបង ប្រហែល២០០នាក់ កាលពីព្រឹកថ្ងៃទី២៤ ឧសភា បានទៅខាងមុខសាលាខេត្តបាត់ដំបងជាថ្មីទៀត ដើម្បីទាមទារឱ្យអាជ្ញាធរខេត្តបញ្ឈប់ការដំឡើងថ្លៃតូបក្នុងផ្សាររបស់រដ្ឋមួយនេះ ក្រោយពីការតវ៉ាកាលពីដើមខែនេះមិនបានសម្រេច។
ក្រុមអាជីវករនិយាយថា អាជ្ញាធរខេត្តបានបញ្ជាឱ្យគណៈកម្មការគ្រប់គ្រងផ្សារ ទាមទារឱ្យក្រុមអាជីវករបង់ថ្លៃតូបបន្ថែម៥០ភាគរយម្តងរួចហើយ ចាប់ពីឆ្នាំ២០០៧ ដល់ឆ្នាំ២០១០ លុះនៅឆ្នាំ២០១១ នេះ ស្រាប់តែអាជ្ញាធរទាមទារដំឡើងថ្លៃតូបចំនួន១០ភាគរយទៀត ជាហេតុធ្វើឱ្យមានការតវ៉ាបន្តបន្ទាប់ទៀតរហូតមកទល់ពេលនេះ។
ការព្យាយាមតវ៉ាបញ្ចុះតម្លៃតូបក្នុងផ្សារណាត់នេះ កើតឡើងម្តងហើយ កាលពីថ្ងៃទី៤ ឧសភា ហើយអាជ្ញាធរខេត្តបានចេញលិខិតជូនដំណឹង១ច្បាប់ឆ្លើយតបទៅនឹងការតវ៉ារបស់អាជីវករ ។ ខ្លឹមសារលិខិតនោះអាជ្ញាធរហាក់បីដូចជាបង្ហាញច្បាស់លាស់អំពីជំហរថា នឹងមិនអាចបញ្ចុះតម្លៃតាមការទាមទាររបស់អាជីវករឡើយ ។ ទោះបីជាបែបណាក្តីក្រុមអាជីវករនៅតែបន្តស្នើឱ្យអាជ្ញាធរបន្ធូរបន្ថយតម្លៃតូបដដែល។ នៅព្រឹកថ្ងៃទី២៤ ឧសភា ពួកគាត់បិទតូបលើកគ្នាទៅតវ៉ាជាថ្មីទៀត ដើម្បីស្នើឱ្យអាជ្ញាធរកុំដំឡើងថ្លៃតូប ។
ការប្រមូលផ្តុំគ្នារបស់ក្រុមអាជីវករត្រូវឡោមព័ទ្ធដោយកម្លាំងសមត្ថកិច្ចដោយគេស្តីបន្ទោសថា ធ្វើឱ្យប៉ះពាល់ដល់សណ្តាប់ធ្នាប់តាមផ្លូវសាធារណៈ ។ គេឃើញលោកសឿម ប៊ុនរិទ្ធ នាយករងរដ្ឋបាលសាលាខេត្ត និងលោកអ៊ិន ប៊ុនម៉ាត់ ប្រធានអធិការកិច្ចខេត្តបានទៅពន្យល់ និងព្យាយាមបណ្តេញក្រុមអាជីវករឱ្យចាកចេញពីទីនោះទៅកាន់កន្លែងផ្សេង ប៉ុន្តែត្រូវបរាជ័យដោយសារអាជីវករមិនស្តាប់ ហើយ ក្រុមតំណាងសាលាខេត្តក៏វិលត្រឡប់ទៅវិញ ។
នៅវេលាម៉ោង១២ថ្ងៃត្រង់ថ្ងៃដដែល លោកសៀង ស៊ុតថង អភិបាលរងខេត្តបានទៅជួបដោះស្រាយជាមួយក្រុមអាជីវករដោយផ្ទាល់ ខណៈលោកប្រាជ្ញ ចន្ទ អភិបាលខេត្តដែលក្រុមអាជីវករចង់ជួបបំផុត មិនបង្ហាញមុខ។
លោកសៀង ស៊ុតថង បានពន្យល់ប្រាប់ក្រុមអាជីវករថា ការបង់ថ្លៃតូបប្រចាំឆ្នាំក្នុងផ្សារណាត់នេះ គឺ មានតម្លៃទាបបំផុត បើប្រៀបធៀបទៅនឹងផ្សារផ្សេងៗក្នុងខេត្ត ដូច្នេះការដំឡើងបន្ថែម១០ភាគរយនេះមិនច្រើនទេ គួរតែក្រុមអាជីវករជួយរដ្ឋវិញ។ លោកបញ្ជាក់ថា ការដំឡើងថ្លៃតូបនេះគឺ៣ឆ្នាំត្រូវដំឡើងម្តង ។ ទោះបីជាបែបណាក្តី ភាគីអាជីវករបានស្នើបង់បន្ថែមត្រឹម៥ភាគរយ ប៉ុន្តែខាងអាជ្ញាធរហាក់បីដូចជាមិនអាចទទួលយកបានឡើយ ។
ដោយឡែកនៅឯខេត្តប៉ៃលិនឯណោះវិញ នាព្រឹកថ្ងៃទី២៤ ឧសភា នោះដែរ មានសេចក្តីរាយការណ៍ថា អាជ្ញាធរខេត្តបានប្រើធម៌ក្តៅបណ្តេញក្រុមអាជីវករលក់ដូរតាមចិញ្ចើមថ្នល់ត្រង់ចំណុចផ្លូវបែកជាបួនក្នុងស្រុកសាលាក្រៅ ឱ្យរុះរើចាកចេញទៅលក់នៅក្នុងផ្សារថ្មីដែលជាផ្សាររបស់ក្រុមហ៊ុនឯកជនមួយ។
ប្រភពព័ត៌មានឱ្យដឹងថា អាជ្ញាធរបានប្រើប្រាស់គ្រឿងចក្រ រួមជាមួយក្រុមកម្មករប្រហែល៦០នាក់ ដើម្បីរុះរើតូបផ្សារចាស់នេះ ដោយមានសមត្ថកិច្ចចំរុះប្រហែលជាង១០០នាក់ ជួយការពារក្រោមការដឹកនាំ និងបញ្ជាផ្ទាល់ពីលោកអៀង វុធ អភិបាលរងខេត្តប៉ៃលិន។
អាជ្ញាធរនិយាយថា ការប្រើធម៌ក្តៅរុះរើតូបនេះ គឺបន្ទាប់ពីអាជ្ញាធរបានជូនដំណឹងឱ្យអាជីវកររុះរើទៅលក់នៅផ្សារថ្មីជាច្រើនខែកន្លងមកហើយ តែពួកគេមិនព្រមស្តាប់។
ឆ្លើយតបទៅនឹងការលើកឡើងនោះក្រុមអាជីវករខ្លះនិយាយថា អាជ្ញាធរបង្ខំឱ្យពួកគេទៅលក់ដូរក្នុងផ្សារឯកជនដែលតូបមានតម្លៃថ្លៃ ហើយគ្មានសំណងសមស្របទៅលើផលប៉ះពាល់ដីលំនៅឋានរបស់ប្រជាពលរដ្ឋ ពេលពង្រីកធ្វើផ្លូវ និងរង្វង់មូលនៅចំណុចផ្លូវបំបែកនោះទេ។ បើតាមប្រភពព័ត៌មានឱ្យដឹងថា វិធានការរបស់អាជ្ញាធរបានជោគជ័យទាំងស្រុង ហើយខណៈប្រជាពលរដ្ឋជាង២០គ្រួសាររងផលប៉ះពាល់៕
ចែករំលែកព័តមាននេះ