ខេត្តបាត់ដំបង ៖ លំនៅឋានរបស់អតីតមេតុងទីនម្នាក់ ដែលតុលាការសម្រេចឃ្លុំបេទុកចោលជាច្រើនឆ្នាំកន្លងទៅនេះ ត្រូវជនឡប់សតិចូលទៅដុតឆេះអស់គ្មានសល់ផ្នែកជាន់ខាងក្រោម កាលពីវេលាម៉ោងជិត៤ទៀបភ្លឺថ្ងៃទី២៦ ធ្នូ ដែលស្ថិតក្នុងភូមិស្នឹងកើត ឃុំស្នឹង ស្រុកបាណន់…
ខេត្តបាត់ដំបង ៖ លំនៅឋានរបស់អតីតមេតុងទីនម្នាក់ ដែលតុលាការសម្រេចឃ្លុំបេទុកចោលជាច្រើនឆ្នាំកន្លងទៅនេះ ត្រូវជនឡប់សតិចូលទៅដុតឆេះអស់គ្មានសល់ផ្នែកជាន់ខាងក្រោម កាលពីវេលាម៉ោងជិត៤ទៀបភ្លឺថ្ងៃទី២៦ ធ្នូ ដែលស្ថិតក្នុងភូមិស្នឹងកើត ឃុំស្នឹង ស្រុកបាណន់ ខណៈម្ចាស់ផ្ទះនេះបានរត់ចោលស្រុកបាត់ស្រមោល ដោយសារតែបំណុលតុងទីន។
របាយការណ៍សមត្ថកិច្ចបានឲ្យដឹងថា ម្ចាស់ផ្ទះដែលត្រូវភ្លើងឆេះឈ្មោះ រស់ បូរិន ប្រុសអាយុ៥០ឆ្នាំ ជាអតិតមេតុងទីនប្រចាំឃុំស្នឹង ។ ម្ចាស់ផ្ទះបានបិទទ្វារទុកចោលច្រើនឆ្នាំកន្លងមកហើយ ដោយសារតែមានរឿងក្ដីក្ដាំនៅក្នងតុលាការ ជាមួយកូនបំណុលតុងទីនរាប់រយនាក់ ដោះស្រាយមិនចេញ។
របាយការណ៍បានឲ្យដឹងថា លំនៅឋាននោះសាងសង់ពីថ្ម ប្រក់ស័ង្កសី មានទំហំ៧ម៉x១៥ម៉ ហើយត្រូវជនឡប់សតិចូលទៅដុតបំផ្លាញចោលខូចខាតអស់ផ្នែកខាងក្រោម ខណៈគ្មានមនុស្សស្នាក់នៅ។ បើតាមសមត្ថកិច្ចបានឲ្យដឹងថា ផ្ទះមេតុងទីនខាងលើនេះ ត្រូវតុលាការសម្រេចឃ្លុំបេបិទទ្វារទុកចោល ដោយពុំមានមនុស្សស្នាក់នៅទេ ព្រោះជាប់ជំពាក់រឿងក្ដីក្ដាំក្នុងតុលាការមិនទាន់ដោះស្រាយចេញជាមួយនឹងកូនបំណុលតុងទីនរាប់រាយនាក់ នៅក្នុងឃុំស្នឹង ។
សមត្ថកិច្ចបានប្រាប់ថា នៅយប់កើតហេតុ ជនដែលមានសតិមិនប្រក្រតីឈ្មោះ ស៊ួង ស៊ីវ៉ាន់ថា ហៅចេញ អាយុ៣៧ឆ្នាំ បានចូលទៅដេកនៅផ្ទះបាយខាងក្រោយ រួចដុតទៀននៅលើហឹង ទើបបង្កឲ្យឆេះរាលដាលដល់ក្នុងផ្ទះផ្អើលអ្នកភូមិនាវេលាទៀបភ្លឺ។
តាមរបាយការណ៍សមត្ថកិច្ចបានឲ្យដឹងថា រថយន្តពន្លត់អគ្គីភ័យរបស់សមត្ថកិច្ចបានចេញអន្តរាគមន៍ភ្លាមៗ ហើយបានបាញ់ទឹកពន្លត់ និង ទប់ស្កាត់បានទាន់ពេលវេលា តែសម្ភារ និង ទ្រព្យសម្បត្តិនៅជាន់ខាងក្រោម ត្រូវភ្លើងឆេះអស់ទាំងស្រុង។
បើតាមការប៉ាន់ប្រមាណពីសាច់ញាតិ គិតជាទឹកប្រាក់អស់ប្រហែល៧០០០ដុល្លារ ។ ប៉ុន្តែមិនបង្កគ្រោះថ្នាក់ដល់មនុស្សទេ។ ដោយឡែក ជនដៃដល់ដែលជាជនឡប់សតិក៏ត្រូវ សមត្ថកិច្ចមូលដ្ឋានឃាត់ខ្លួន ដើម្បីនាំយកទៅសាកសួរដែរ តែចំណាត់ការបន្តយ៉ាងណា គេមិនទាន់ដឹងនៅឡើយ
ទេ៕
ចែករំលែកព័តមាននេះ