ខេត្តមណ្ឌលគិរី ៖ នាសប្តាហ៍ចុងក្រោយនៃឆ្នាំ២០២៣ អាកាសធាតុត្រជាក់កំពុងគ្របដណ្តប់ពេញទំហឹងនៅខេត្តមណ្ឌលគិរីនៅពេលយប់ ដោយសីតុណ្ហភាពបានធ្លាក់ចុះនៅត្រឹម១៥ ទៅ១៦អង្សាសេ ចំណែកពេលថ្ងៃឡើងមិនផុត២២ទៅ២៣អង្សាសេឡើយ ។ ខណៈបរិយាកាសត្រជាក់រួមផ្សំជាមួយខ្យល់បក់បោក និងវាលស្មៅពណ៌មាសលាតសន្ធឹងលើកំពូលភ្នំ…
ខេត្តមណ្ឌលគិរី ៖ នាសប្តាហ៍ចុងក្រោយនៃឆ្នាំ២០២៣ អាកាសធាតុត្រជាក់កំពុងគ្របដណ្តប់ពេញទំហឹងនៅខេត្តមណ្ឌលគិរីនៅពេលយប់ ដោយសីតុណ្ហភាពបានធ្លាក់ចុះនៅត្រឹម១៥ ទៅ១៦អង្សាសេ ចំណែកពេលថ្ងៃឡើងមិនផុត២២ទៅ២៣អង្សាសេឡើយ ។ ខណៈបរិយាកាសត្រជាក់រួមផ្សំជាមួយខ្យល់បក់បោក និងវាលស្មៅពណ៌មាសលាតសន្ធឹងលើកំពូលភ្នំ គឺជាផ្នែកមួយទាក់ទាញខ្លាំង សម្រាប់អ្នកទេសចរទៅកម្សាន្តនាឱកាសបុណ្យឆ្លងឆ្នាំសាកលខាងមុខនេះ ។
ជាក់ស្តែង នៅថ្ងៃទី២៥ ធ្នូ ២០២៣ នេះ គេសង្កេតឃើញថា សម្រាប់ក្រុងសែនមនោរម្យនៅតែមានខ្យល់បក់បោកខ្លាំង ចំណែកបរិយាកាសត្រជាក់គឺនៅត្រឹម១៥អង្សាពេលយប់ ហើយពេលថ្ងៃត្រង់សីតុណ្ហភាពក៏ឡើងមិនលើសពី២៣ទៅ២៤អង្សារនោះដែរ ។
ហើយអ្វីដែលជាភាពទាក់ទាញមួយទៀត អំឡុងពេលចុងឆ្នាំ ក្រោយរដូវវស្សាបញ្ចប់ទៅ យើងអាចសង្កេតឃើញវាលស្មៅប្រែទៅជាពណ៌មាស គ្របដណ្ដប់តាមកំពូលភ្នំ ដែលមើលទៅពិតជាប្លែកភ្នែក ថែមទាំងរួមផ្សំជាមួយខ្យល់បក់បោក លាយឡំដោយអាកាសធាតុចុះទាបទៀតនោះ ធ្វើឲ្យអ្នកទេសចរមិនអាចបំភ្លេចនូវបរិកាសបែបនេះបានទេ ។
ប្រជាពលរដ្ឋរស់នៅខេត្តមណ្ឌលគិរីលើកឡើងដែរថា ជាទូទៅរាល់រដូវរងារគ្មានអ្វីក្រៅពីត្រៀមខោអាវក្រាស់ៗសម្រាប់ស្លៀកពាក់ ការពារភាពត្រជាក់ និងថែសុខភាព ហើយចំពោះគាត់ផ្ទាល់រដូវរងារម្ដងៗនឹងប្រឈមបញ្ហាសុខភាព ដូចជាផ្ដាសាយជាដើម ។
គួររំលឹកដែរថា រដូវរងារនៅខេត្តមណ្ឌលគិរី អាចមានរយៈពេល ៣ទៅ៤ខែ ដោយឆ្នាំខ្លះអាកាសធាតុបានចុះត្រជាក់តាំងពីអំឡុងខែតុលា និងអូសបន្លាយដល់ខែមករា ប៉ុន្តែសម្រាប់ឆ្នាំនេះអាកាសធាតុបានធ្លាក់ត្រជាក់នៅពាក់កណ្ដាលវិច្ឆិកា ដែលហាក់បីដូចជាយឺតបន្តិចសម្រាប់រដូវរងារឆ្នាំនេះ ។
ចែករំលែកព័តមាននេះ