រាជធានីភ្នំពេញ ៖ សេចក្តីថ្លែងការណ៍មិនពិត និងធ្វើឱ្យមានការភាន់ច្រឡំបានធ្វើឡើងជាថ្មីម្តងទៀត ដោយមេដឹកនាំថៃមួយរូបពាក់ព័ន្ធ នឹងសម្បត្តិបេតិកភណ្ឌពិភពលោករបស់កម្ពុជា គឺប្រាសាទព្រះវិហារ ។ លោកស៊ុវីត ឃុនគិទិ ដែលជារដ្ឋមន្រ្តី ហើយជាប្រធានគណៈប្រតិភូថៃទៅចូលរួមកិច្ចប្រជុំគណៈកម្មាធិការបេតិកភណ្ឌពិភពលោក
រាជធានីភ្នំពេញ ៖ សេចក្តីថ្លែងការណ៍មិនពិត និងធ្វើឱ្យមានការភាន់ច្រឡំបានធ្វើឡើងជាថ្មីម្តងទៀត ដោយមេដឹកនាំថៃមួយរូបពាក់ព័ន្ធ នឹងសម្បត្តិបេតិកភណ្ឌពិភពលោករបស់កម្ពុជា គឺប្រាសាទព្រះវិហារ ។ លោកស៊ុវីត ឃុនគិទិ ដែលជារដ្ឋមន្រ្តី ហើយជាប្រធានគណៈប្រតិភូថៃទៅចូលរួមកិច្ចប្រជុំគណៈកម្មាធិការបេតិកភណ្ឌពិភពលោកបានអះអាងថា «យើង (ថៃ) ទើបនឹងបានទទួលនូវផែនការរៀបចំក្នុងពេលថ្មីៗនេះ ហើយត្រូវធ្វើការសិក្សាឱ្យបានល្អិតល្អន់ និងដោយប្រុងប្រយ័ត្ន ហើយផែនការរៀបចំនេះ មានកន្លែងខ្លះឈ្លានពានចូលមកក្នុងទឹកដីថៃ ដែលយើង (ថៃ) មិនទទួលយកបានឡើយ ហើយត្រូវបកស្រាយបំភ្លឺទៅយូណេស្កូ» (ដកស្រង់សំដី ចេញពីបណ្តាញឃោសនាថៃរ៉ាត់ ចេញផ្សាយថ្ងៃទី ១៩ឧសភា ២០១១) ។ នេះជាសេចក្តីថ្លែងការណ៍ នៅថ្ងៃទី២២ ឧសភា កន្លងមកនេះរបស់គណៈកម្មាធិការជាតិ បេតិកភណ្ឌពិភពលោក ហើយត្រូវបានបកប្រែក្រៅផ្លូវការនៅថ្ងៃទី២៤ ឧសភា ។
គណៈកម្មាធិការជាតិបេតិកភណ្ឌពិភព លោកមានការភ្ញាក់ផ្អើលនឹងការថ្លែងមិនពិតទាល់តែសោះនេះដែលបានលើកឡើងមុនពេលកិច្ចប្រជុំរវាងកម្ពុជា-ថៃលើផែនការរៀបចំនេះនៅឯស្នាក់ការកណ្តាលអង្គការយូណេស្កូ ទីក្រុងប៉ារីស ហើយសូមធ្វើការកែតម្រូវ និងអធិប្បាយដូចខាងក្រោម៖
-ផែនការៀបចំតំបន់ប្រាសាទព្រះវិហាររបស់កម្ពុជា ត្រូវបានដាក់ជូនយ៉ាងត្រឹមត្រូវបំផុតទៅជូនមជ្ឈមណ្ឌលបេតិកភណ្ឌពិភព
លោកក្នុងខែមករា ឆ្នាំ២០១០ ហើយក៏បានផ្សព្វផ្សាយទៅគ្រប់សមាជិកទាំងអស់នៃគណៈកម្មាធិការបេតិកភណ្ឌពិភពលោក ដែលក្នុងនោះមានទាំងថៃផងដែរ ដែលពេលនោះជាអនុប្រធាននៃគណៈកម្មាធិការបេតិកភណ្ឌពិភពលោក កាលពីជាង១ឆ្នាំមុនរួចទៅហើយ នាកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៤ ដែលធ្វើឡើងនៅទីក្រុងប្រាស៊ីលីយ៉ា នាខែកក្កដា ដល់ខែ កញ្ញា ឆ្នាំ២០១០ ។
-ផែនការរៀបចំតំបន់ប្រាសាទព្រះវិហាររបស់កម្ពុជា ជាលទ្ធផលនៃការសិក្សាយ៉ាងម៉ត់ចត់ និងប្រកបដោយវិជ្ជាជីវៈរបស់មជ្ឈមណ្ឌលបេតិកភណ្ឌពិភពលោក និង ICOMOS ហើយ ស្ថាប័នទាំង២នេះបានវាយតម្លៃថា ផែនការ រៀបចំនេះបានផ្តល់នូវទស្សនៈដ៏ល្អមួយសម្រាប់ការអភិរក្សសម្បត្តិបេតិកភណ្ឌពិភពលោកទាំង
មូល ហើយក៏ជាគ្រឹះដ៏រឹងមាំមួយដែលអាជ្ញាធរជាតិព្រះវិហារអាចប្រើប្រាស់សម្រាប់អភិវឌ្ឍគោលនយោបាយ និងដំណើរប្រតិបត្តិរបស់ខ្លួន។ ប្លង់ក្រាហ្វិកនៃផែនការរៀបចំប្រាសាទព្រះវិហារនេះបង្ហាញយ៉ាងច្បាស់ថា តំបន់ទាំងអស់ដែលមានក្នុងផែនការនេះស្ថិតនៅយ៉ាងជ្រៅក្នុងទឹកដីកម្ពុជាតែម្តង ។
-សេចក្តីសម្រេច 34 COM 7B.66 របស់ គណៈកម្មាធិការបេតិកភណ្ឌពិភពលោកនាកិច្ច ប្រជុំលើកទី៣៤ នៅទីក្រុងប្រាស៊ីលីយ៉ា ឆ្នាំ ២០១០ បានសម្រេចទទួលយកដើម្បីពិនិត្យនូវ ឯកសារនានារបស់កម្ពុជា ដែលក្នុងនោះមានទាំងផែនការរៀបចំប្រាសាទព្រះវិហារផងដែរ នាកិច្ចប្រជុំលើកទី៣៥ ក្នុងឆ្នាំ២០១១នេះ ។គួររំលឹកដែរ ថា លោកស៊ុវីតខ្លួនឯងផ្ទាល់បានចុះហត្ថលេខា ជាមួយប្រធានគណៈប្រតិភូកម្ពុជា និងប្រធានអង្គ ប្រជុំគណៈកម្មាធិការបេតិកភណ្ឌពិភពលោក ហើយក៏បានទទួលស្គាល់ផងដែរនូវសេចក្តី ព្រាងសេចក្តីសម្រេច 34 COM 7B.66 នេះ។
វាជាការភូតកុហកតែម្តង ដែលលោកស៊ុវីត ជាអតីតអនុប្រធានគណៈកម្មាធិការបេតិកភណ្ឌពិភពលោកថ្លែងថា ថៃទើបតែបានទទួលផែនការរៀបចំនាពេលថ្មីៗនេះ ។ តាមពិតកាលពីឆ្នាំមុន បើគាត់បានយកចិត្តទុកដាក់អានផែនការរៀបចំនេះបានខ្លះ ក៏លោកស៊ុវីត មិនអាចមកធ្វើសេចក្តីថ្លែងការណ៍ដ៏ខុសឆ្គងបែបនេះបាន
ឡើយ ។ ទាំងនេះបង្ហាញថា លោកស៊ុវីត មានការធ្វេសប្រហែសណាស់ចំពោះការបំពេញតួនាទីរបស់ខ្លួនក្នុងរឿងផែនការរៀបចំនេះ។
គណៈកម្មាធិការជាតិបេតិកភណ្ឌពិភពលោក សូមធ្វើការប្រឆាំងទៅនឹងការលើកឡើងរបស់លោកស៊ុវីត ដែលចេះតែបន្តឹង និងបំពុលបរិយាកាស មុនកិច្ចប្រជុំនៅប៉ារីសតែម្តង ។ បើយោងទៅលើសេចក្តីថ្លែងការណ៍របស់លោកជំទាវអគ្គនាយិកាអង្គការយូណេស្កូ Irina Bokova សម្បត្តិបេតិកភណ្ឌពិភពលោក មិនមែនជា
ដើមចមនៃជម្លោះទេ ។ តាមពិតទៅ គេត្រូវការ សុច្ឆន្ទៈរបស់ភាគីទាំង២ ដើម្បីធ្វើឱ្យកិច្ចប្រជុំអាចរួមចំណែកឱ្យមានគំនិតស្ថាបនានានា ដើម្បីរិះ
រកវិធានការបន្ទាន់ភ្លាមៗក្នុងការស្តារឡើងវិញនូវការខូចខាតពីការឈ្លានពានរបស់យោធាថៃ ហើយដើម្បីឱ្យមានកិច្ចការពារ និងអភិរក្សសម្បត្តិបេតិកភណ្ឌពិភពលោកមួយនេះ គឺប្រាសាទព្រះវិហារ។
លោកបណ្ឌិតសុខ អាន ឧបនាយករដ្ឋមន្រ្តី រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តីនឹងស្វែងរកការបញ្ជូនប្រតិភូអ្នកបច្ចេកទេសរបស់អង្គការយូណេស្កូមកវាយតម្លៃឱ្យបានឆាប់រហ័សអំពីផលប៉ះពាល់ និងការខូចខាតប្រាសាទព្រះវិហារដោយសារគ្រាប់កាំភ្លើងផ្លោងរបស់ថៃ ដើម្បីអាចធ្វើការជួសជុលថែរក្សាសម្បត្តិបេតិកភណ្ឌពិភពលោកមួយនេះឱ្យបានល្អ ។ លោកឧបនាយករដ្ឋមន្ត្រីបានថ្លែងបែបនេះក្នុងឱកាសដឹកនាំប្រតិភូគណៈកម្មាធិការជាតិបេតិកភណ្ឌពិភពលោក ចាកចេញពីចំណតយន្តហោះអន្តរជាតិភ្នំពេញនាវេលាម៉ោង៦ល្ងាចថ្ងៃទី២៣ ខែឧសភា ឆ្នាំ២០១១ ឆ្ពោះទៅកាន់ទីស្នាក់ការកណ្តាលនៃអង្គការយូណេស្កូ នៅទីក្រុងប៉ារីស ប្រទេសបារាំង ដើម្បីជួបប្រជុំត្រីភាគី(កម្ពុជា-ថៃ -យូណេស្កូ) ។
លោកឧបនាយករដ្ឋមន្ត្រីបានមានប្រសាសន៍ថា ថ្ងៃទី២៥ ឧសភា ឆ្នាំ ២០១១ លោកនឹងជួបប្រជុំជាមួយរដ្ឋមន្រ្តីទទួលបន្ទុកបេតិកភណ្ឌថៃ ដោយមានការចូលរួមពីថ្នាក់ដឹកនាំនៃអង្គការយូណេស្កូដែលនេះជាការជជែកគ្នាមួយផ្នែកទៀត បន្ទាប់ពីដំណើរទស្សនកិច្ចរបស់លោក ម៉ាត់ស៊ូអ៊ូរ៉ា បេសកជនពិសេសរបស់លោកជំទាវ បូកូវ៉ា អគ្គនាយិកាអង្គការយូណេស្កូមកកម្ពុជាដើម្បីធ្វើការវាយតម្លៃការខូចខាតប្រាសាទព្រះ វិហារពីអ្នកបច្ចេកទេសជាន់ខ្ពស់របស់អង្គការ
យូណេស្កូឬគណៈកម្មាធិការបេតិកភណ្ឌពិភព លោក និងស្វែងរកកិច្ចសហប្រតិបត្តិការ ដើម្បីធ្វើការជួសជុលនិងអភិរក្សបេតិកភណ្ឌ
កម្ពុជាដែលជាសម្បតិ្តបេតិកភណ្ឌពិភពលោក បន្ទាប់ពីរងការបាញ់ផ្លោងដោយគ្រាប់កាំភ្លើងធំរបស់ថៃចំនួន៤១៤គ្រាប់។
លោកបណ្ឌិតសុខ អាន បានមានប្រសាសន៍ ទៀតថា កម្ពុជាចង់បានវត្តមានអ្នកជំនាញការរបស់អង្គការយូណេស្កូ ឬគណៈកម្មាធិការបេតិកភណ្ឌពិភពលោកដើម្បីមកធ្វើការវាយតម្លៃអំពីការខូចខាតប្រាសាទឱ្យបានឆាប់រហ័ស តែភាគីថៃចេះតែទប់ស្កាត់ ។ ដូច្នេះ ការជជែកគ្នាគឺត្រូវធ្វើម៉េចឱ្យអ្នកជំនាញការដែលសុទ្ធតែជាអ្នកជំនាញការជាន់ខ្ពស់បំផុតរបស់អង្គការយូណេស្កូ គេមកពិនិត្យវាយតម្លៃបាន ។ ទាក់ទិននឹងបទសម្ភាសន៍របស់លោកស៊ុវីតឃុនគិទិ រដ្ឋមន្រ្តីទទួលបន្ទុកបេតិកភណ្ឌថៃដែលផ្តល់បទសម្ភាសន៍ដល់អ្នកកាសែតថៃថា ភាគីថៃមិនទាន់ដឹងពីផែនការគ្រប់គ្រងអភិរក្សប្រាសាទព្រះវិហារ និងថាផែនការគ្រប់គ្រង និងអភិរក្សតំបន់ប្រាសាទព្រះវិហាររបស់កម្ពុជាចូលទឹកដីថៃនោះ លោកបណ្ឌិត សុខ អាន បានមានប្រសាសន៍ថា បទសម្ភាសន៍និយាយខុសឆ្គងពីរចំណុច៖
ទី១-ផែនការគ្រប់គ្រង និងអភិរក្សតំបន់ប្រាសាទព្រះវិហារ គឺកម្ពុជាបានដាក់ជូនមជ្ឈមណ្ឌលគ្រប់គ្រងបេតិកភណ្ឌពិភពលោក តាំងពីពេលមុននៅក្នុងកិច្ចប្រជុំគណៈកម្មាធិការបេតិកភណ្ឌពិភពលោកនៅក្នុងប្រទេសប្រេស៊ីល ដែលកាលនោះប្រទេសថៃនៅជាអនុប្រធានគណៈ
កម្មាធិការបេតិកភណ្ឌពិភពលោក ហេតុអ្វីបានជាថៃថាមិនដឹងទៅវិញ?
ទី២-ថៃថាផែនការគ្រប់គ្រង និងអភិរក្សតំបន់ប្រាសាទព្រះវិហាររបស់កម្ពុជាចូលទឹកដីថៃគឺជាការនិយាយភូតកុហក ព្រោះយើងធ្វើការអភិវឌ្ឍតែនៅក្នុងតំបន់ដែលជាទឹកដី
របស់កម្ពុជាប៉ុណ្ណោះ ៕
ចែករំលែកព័តមាននេះ