រាជធានីភ្នំពេញ ៖ ប្រជាពលរដ្ឋ-ជនជាតិភាគតិចមកពីខេត្តក្រចេះ ស្ទឹងត្រែង កំពង់ធំ និងព្រះវិហារ បានមកប្រមូលផ្តុំគ្នាកាលពីវេលាម៉ោង៨ព្រឹកថ្ងៃទី២៥ ឧសភា ២០១១ ស្រែកហ៊ោកញ្ជ្រៀវ ច្រៀងរាំ ដែលជាពិធីមួយស្នើសុំទៅរដ្ឋាភិបាលឱ្យបញ្ឈប់ការផ្តល់ព្រៃសម្បទាននៅព្រៃឡង់ដល់បណ្តាក្រុមហ៊ុនវិនិយោគទៀតទៅ
រាជធានីភ្នំពេញ ៖ ប្រជាពលរដ្ឋ-ជនជាតិភាគតិចប្រមាណ២០០នាក់មកពីខេត្តក្រចេះ ស្ទឹងត្រែង កំពង់ធំ និងព្រះវិហារ បានមកប្រមូលផ្តុំគ្នានៅលើទីលានប្រជាធិបតេយ្យកាលពីវេលាម៉ោង៨ព្រឹកថ្ងៃទី២៥ ឧសភា ២០១១ ស្រែកហ៊ោកញ្ជ្រៀវ ច្រៀងរាំ ដែលជាពិធីមួយស្នើសុំទៅរដ្ឋាភិបាលឱ្យបញ្ឈប់ការផ្តល់ព្រៃសម្បទាននៅតំបន់ព្រៃឡង់ដល់បណ្តាក្រុមហ៊ុនវិនិយោគផ្សេងៗទៀតទៅ ព្រោះវាហិនហោចគំរបបៃតង ប៉ះពាល់បរិស្ថាន និងជីវភាពរស់នៅរបស់ប្រជាពលរដ្ឋដែលពឹងផ្អែកលើផល-អនុផលព្រៃឈើទាំងនោះ ។
តំណាងជនជាតិភាគតិចមួយរូបនិយាយសុំមិនបញ្ចេញឈ្មោះបានឱ្យដឹងថា បងប្អូនប្រជាសហគមន៍រស់នៅជុំវិញតំបន់ព្រៃឡង់ មានខេត្តព្រះវិហារ ក្រចេះ កំពង់ធំ និងប្រជាពលរដ្ឋកម្ពុជារស់នៅតាមបណ្តាខេត្តនានាក្នុងប្រទេសកម្ពុជារួមជាមួយជនជាតិដើមភាគតិច ដែលទទួលផលប្រយោជន៍ផ្ទាល់ និងប្រយោលពីព្រៃឡង់ កំពុងមានការព្រួយបារម្ភយ៉ាងខ្លាំងចំពោះសកម្មភាពអភិវឌ្ឍជាទ្រង់ទ្រាយធំក្នុងតំបន់ព្រៃឡង់ ដូចជា សម្បទានដីសេដ្ឋកិច្ច សម្បទានរ៉ែ សម្បទានព្រៃគប់ និងការកាប់បំផ្លាញព្រៃឈើអនាធិបតេយ្យក្នុងតំបន់ព្រៃឡង់។ ប្រជាសហគមន៍យល់ឃើញថា បើសកម្មភាពទាំងនេះនៅតែបន្តនោះ វានឹងធ្វើឱ្យធនធានធម្មជាតិដែលមានតម្លៃមហាសាលក្នុងព្រៃឡង់ដូចជា សត្វពាហនៈ ព្រៃឈើធម្មជាតិ ផលអនុផលព្រៃឈើ ដែលប្រជាពលរដ្ឋអាស្រ័យផល ជីវចម្រុះគ្រប់ប្រភេទត្រូវបាត់បង់ ហើយនឹងធ្វើឱ្យប៉ះពាល់ដល់មុខរបរប្រជាពលរដ្ឋ វប្បធម៌ ប្រពៃណីជនជាតិដើមភាគតិច ជំរកសត្វព្រៃ ប្រភពជីវជាតិ និងប្រភពទឹកដែលហូរចាក់តំបន់ទំនាបសម្រាប់វិស័យកសិកម្ម ជាពិសេសធ្វើឱ្យមានការប្រែប្រួលអាកាសធាតុ និងបង្កឱ្យមានគ្រោះធម្មជាតិ ។
ជាក់ស្តែងដើមច្បោះរបស់សហគមន៍ក្នុងព្រៃឡង់ត្រូវបានកាប់បំផ្លាញពីសំណាក់ក្រុមហ៊ុន និងអ្នកមានអំណាចមានចំនួន២៤៣.៦៤៤ដើម យ៉ាងរង្គះរង្គាល ហើយបានធ្វើឱ្យប្រជាពលរដ្ឋជួបការលំបាកយ៉ាងខ្លាំង ។ ប្រជាពលរដ្ឋដឹងថា ការអភិវឌ្ឍន៍គឺជាតម្រូវការចាំបាច់របស់រាជរដ្ឋាភិបាល ក៏ប៉ុន្តែមានជម្រើសច្រើនទៀតក្នុងការស្វែងរកធនធានមកធ្វើការអភិវឌ្ឍប្រទេសជាតិក្រៅពីការផ្តល់សម្បទានសេដ្ឋកិច្ចក្នុងតំបន់ព្រៃឡង់ដូចជា ការថែរក្សាព្រៃឈើធម្មជាតិ ដើម្បីឥណទានកាបោន និងការលើកកម្ពស់ការច្នៃ ប្រឌិតផលអនុផលព្រៃឈើជាដើម។ល។ ដោយហេតុផលខាងលើនេះ ហើយទើបបងប្អូនជនជាតិដើមភាគតិចនាំគ្នាមកកាន់ទីលានប្រជាធិបតេយ្យ ក្នុងរាជធានីភ្នំពេញ និងសម្តែងរបាំកាន់បដាពាក្យស្លោកដើម្បីសុំយ៉ាងទទូចដល់រាជរដ្ឋាភិបាលចាត់វិធានការជាបន្ទាន់ប្រកបដោយប្រសិទ្ធភាពខ្ពស់ក្នុងការការពារព្រៃឡង់ គឺបញ្ឈប់ការផ្តល់សម្បទាននានាក្នុងតំបន់ព្រៃឡង់ជាដើម ៕
ចែករំលែកព័តមាននេះ