រាជធានីភ្នំពេញ ៖ ផ្សារធំថ្មីដែលមានវ័យចំណាស់ស្ថិតក្នុងសភាពចាស់ទ្រុឌទ្រោម ពេលនេះមានការជួសជុលកែលំអឡើងវិញរួចរាល់នោះ នៅព្រឹកថ្ងៃទី២៥ ឧសភា ២០១១ នេះ សាលារាជធានីភ្នំពេញនឹងធ្វើពិធីសម្ពោធបើកឱ្យដំណើរការជាផ្លូវការចាប់ពីពេលនេះតទៅ ។ ផ្សារធំថ្មីត្រូវបានជួសជុលកែលំអឡើងវិញក្រោមជំនួយឧបត្ថម្ភពីទីភ្នាក់ងារបារាំង
រាជធានីភ្នំពេញ ៖ ផ្សារធំថ្មីដែលមានវ័យចំណាស់ស្ថិតក្នុងសភាពចាស់ទ្រុឌទ្រោម ពេលនេះមានការជួសជុលកែលំអឡើងវិញរួចរាល់នោះ នៅព្រឹកថ្ងៃទី២៥ ឧសភា ២០១១ នេះ សាលារាជធានីភ្នំពេញនឹងធ្វើពិធីសម្ពោធបើកឱ្យដំណើរការជាផ្លូវការចាប់ពីពេលនេះតទៅ ។ ផ្សារធំថ្មីត្រូវបានជួសជុលកែលំអឡើងវិញក្រោមជំនួយឧបត្ថម្ភពីទីភ្នាក់ងារបារាំង សម្រាប់ការអភិវឌ្ឍន៍ (AFD) របស់ប្រទេសបារាំង ដោយការងារជួសជុលកែលំអរនោះរក្សាលក្ខណៈដើម ដើម្បីលើកកម្ពស់សោភ័ណភាព បរិយាកាស និងបរិស្ថានល្អ ។
ពិធីសម្ពោធបើកឱ្យដំណើរការផ្សារធំថ្មីឡើងវិញ នៅព្រឹកថ្ងៃទី២៥ ឧសភា នេះ តាមគម្រោងធ្វើនៅវេលាម៉ោង៨ព្រឹក ស្ថិតក្រោមអធិបតីភាពលោកកែប ជុតិមា អភិបាលរាជធានីភ្នំពេញ តំណាងស្ថានទូតបារាំងប្រចាំនៅកម្ពុជា ប្រធានទីភ្នាក់ងារបារាំង (AFD) និងមានការចូលរួមពីមន្ត្រីក្រោមឱវាទសាលារាជធានីភ្នំពេញ គណៈកម្មការផ្សារ និងអាជីវករផ្សារធំថ្មីយ៉ាងច្រើនកុះករ ។ លោកហួត ហៃ នាយករងរដ្ឋបាលសាលារាជធានីភ្នំពេញ បានឱ្យដឹងថា ផ្សារធំថ្មីដែលត្រូវបានជួសជុលកែលំអឡើងវិញ បន្ទាប់ពីផ្សារនេះស្ថិតក្នុងវ័យចំណាស់ និងមានសភាពទ្រុឌទ្រោម គឺចាប់ដំណើរការកាលពីថ្ងៃទី២២ មករា ២០០៩ ត្រូវបានបញ្ចប់ និងសម្ពោធបើកឱ្យដំណើរការចាប់ពីពេលនេះតទៅ។
លោកហួត ហៃ បានបញ្ជាក់ថា ការងារជួសជុលកែលំអមាន៥ដំណាក់កាល លើកទី១-ការគិតគូររៀបចំផ្សារបណ្តោះអាសន្នរយៈពេល២ខែ ពីថ្ងៃទី៥ តុលា ដល់១៥ ធ្នូ ២០០៨ ។ ទី២-រយៈពេល៧ខែ ចាប់ពីថ្ងៃទី១៥ ធ្នូ ២០០៨ ដល់១៥ កក្កដា ២០០៩ រៀបចំជួសជុលកែលំអជ្រុង ឬស្លាប IAD ដែលគណៈកម្មការបានកំណត់។ ទី៣-រយៈពេល៧ខែ ចាប់ពីថ្ងៃទី១៥ កក្កដា ២០០៩ ដល់១៥ កុម្ភៈ ២០១០ ស្លាប FHE ។ ទី៤-រយៈពេល៦ខែ ចាប់ពីថ្ងៃទី១៥ កុម្ភៈ ដល់១៥ សីហា ២០១០ ស្លាប BCG និងដំណាក់កាលទី៥-រយៈពេល២ខែ ពីថ្ងៃទី១៥ សីហា ដល់១៥ តុលា ២០១០ ការរៀបចំតំបន់ជុំវិញផ្សារធំថ្មីដូចជាផ្លូវ ប្រព័ន្ធលូ ដាំដើមឈើ បង្គោលភ្លើង រៀបចំចិញ្ចើម និងគំនូសចរាចរណ៍៕
ចែករំលែកព័តមាននេះ