រាជធានីភ្នំពេញ ៖ សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានគូសបញ្ជាក់ថា វិស័យធនាគារនៅក្នុងប្រទេសកម្ពុជា គឺពិតជាមានសំខាន់ណាស់ ហើយប្រសិទ្ធភាព នៃដំណើរការប្រព័ន្ធធនាគារ គឺធានាសុខភាពរបស់សេដ្ឋកិច្ចជាតិ ។
ថ្លៃក្នុងនាឱកាសអញ្ជើញជាអធិបតីសម្ពោធជាផ្លូវការ អគារស្នាក់ការកណ្តាល វីងថៅវើ (Wing Tower) នាព្រឹកថ្ងៃទី២០ ខែធ្នូ ឆ្នាំ២០២៣ សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំដល់វិស័យធនាគារទាំងអស់នៅកម្ពុជា ពិនិត្យការផ្ដល់សេវាកម្មរបស់ខ្លួនកាន់តែច្រើនថែមទៀត ។
សម្ដេចធិបតី បានគូសបញ្ជាក់ថា «វិស័យធនាគារ គឺសំខាន់ណាស់ ដូចខ្ញុំ លើកឡើងក្នុងកិច្ចប្រជុំ គឺជាឈាម ពាក្យសាមញ្ញ គឺអត់លុយ ធ្វើអ្វីក៏អត់កើតដែរ។ ប៉ុន្ដែមានថវិកា មានលុយហើយ អត់មានការគ្រប់គ្រងច្បាស់លាស់ យន្ដការក្នុងការផ្ទេរផ្ទុក ការចល័ត គឺវាពិបាកដែរ។ អ៊ីចឹងធនាគារ ដើរតួនាទីសំខាន់ណាស់ ក្នុងការបង្វិលការប្រមូលធន និងការបង្វិលវាទៅក្នុងការគាំទ្រដល់ដំណើរសេដ្ឋកិច្ច។ អញ្ចឹងប្រសិទ្ធភាព ដំណើរការ នៃប្រព័ន្ធធនាគារយើង គឺធានាសុខភាពរបស់សេដ្ឋកិច្ចរបស់យើង» ។
ជាមួយគ្នានោះដែរ សម្ដេចធិបតីនាយករដ្ឋមន្ដ្រី ក៏បានប្រៀបធៀបថា ធនាគារ គឺដូចបេះដូង (ប្រមូលឈាមមក គឺបញ្ចេញឈាមទៅវិញ ដើម្បីចញ្ចឹមសេរីរាង) បើបេះដូង មិនល្អ គឺសុខភាព ក៏មិនល្អដែរ ។
ក្នុងឱកាសនោះដែរ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ការសម្រេចនៅក្នុងការវិនិយោគសាងសង់អគារដ៏ខ្ពស់ទំនើបទាន់សម័យរបស់ធនាគារវីង បានឆ្លុះបញ្ចាំងពីសារសំខាន់ នៃកត្តាសុខសន្តិភាព ដែលជាមូលដ្ឋានគ្រឹះសម្រាប់ការអភិវឌ្ឍ និងនាំមកនូវវិបុលភាពសម្រាប់សង្គមជាតិយើង ព្រមទាំងបានបង្ហាញអំពីទំនុកទុកចិត្ត និងការជឿជាក់របស់វិនិយោគិនឯកជន និងក្រុមប្រឹក្សាភិបាលធនាគារមកលើបរិយាកាសធុរកិច្ចរបស់កម្ពុជា និយាយជារួម គឺភាពធន់ និងភាពរឹងមាំ នៅក្នុងវិស័យធនាគារ និងហិរញ្ញវត្ថុ ។
សម្តេចធិបតី ហ៊ុន ម៉ាណែត បានអបអរសាទរចំពោះភាពជោគជ័យរបស់ធនាគារវីង ដែលបានដើរតួជំរុញប្រតិបត្តិការជួយយ៉ាងច្រើនទៅដល់អាជីវករ ពាណិជ្ជករ និយោជិត និងប្រជាជនទូទាំងប្រទេស ឱ្យមានភាពងាយស្រួលទាក់ទិននឹងសុវត្ថិភាព ទំនុកចិត្ត និងចំណាយសោហ៊ុយតិចក្នុងការផ្ទេរប្រាក់ បើប្រៀបធៀបទៅនឹងការផ្ទេរប្រាក់តាមវិធីក្រៅផ្លូវការផ្សេងទៀត។
សូមជម្រាបថា ការលើកឡើងរបស់សម្តេចធិបតីនាយករដ្ឋមន្ត្រី ខណៈនៅកម្ពុជា មានធនាការជាច្រើន បានកំពុងបើប្រកបធ្វើអាជីវកម្ម ៕
ចែករំលែកព័តមាននេះ