សត្វអណ្ដើកស្រែដែលគេហៅថា «អណ្ដើកបិទមុខ» ឬអណ្ដើកក្បាលធំ ចំនួន១០៧ក្បាល បានយកទៅលែងចូលក្នុងបឹងទន្លេសាប តំបន់អភិរក្សព្រែកតាចាន់នៃសហគមន៍នេសាទស្រីចឹក ស្ថិតក្នុងភូមិតាម៉ៅ ឃុំកញ្ជរ ស្រុកកណ្ដៀង
ខេត្តពោធិ៍សាត់ ៖ សត្វអណ្ដើកស្រែដែលគេហៅថា «អណ្ដើកបិទមុខ» ឬអណ្ដើកក្បាលធំ ចំនួន១០៧ក្បាល បានយកទៅលែងចូលក្នុងបឹងទន្លេសាប តំបន់អភិរក្សព្រែកតាចាន់នៃសហគមន៍នេសាទស្រីចឹក ស្ថិតក្នុងភូមិតាម៉ៅ ឃុំកញ្ជរ ស្រុកកណ្ដៀង ខេត្តពោធិ៍សាត់ ដើម្បីចូលរួមថែរក្សាការពារធនធានជលផលឲ្យនៅគង់វង្ស និងបន្តរីកសាយឲ្យកាន់តែច្រើនថែមទៀត។
ការលែងសត្វអណ្ដើកនេះ បានធ្វើឡើងកាលពីថ្ងៃទី១៨ ខែធ្នូ ឆ្នាំ២០២៣ ដោយមានការចូលរួមពីនាយផ្នែករដ្ឋបាលជលផលក្រគរ នាយសង្កាត់រដ្ឋបាលជលផលកណ្ដៀង មេឃុំកញ្ជរ ប៉ុស្ដិ៍នគរបាលរដ្ឋបាល និងគណៈកម្មការសហគមន៍នេសាទស្រីចឹកផងដែរ។
លោក ឌុក សុខា ប្រធានសហគមន៍នេសាទស្រីចឹក បានប្រាប់ឲ្យដឹងថា អណ្ដើកទាំងអស់នេះ បានមកពីលោក ខូយ រីដា អភិបាលនៃគណៈអភិបាលខេត្តពោធិ៍សាត់ ប្រគល់ជូនឲ្យយកមកលែងចូលក្នុងបឹងទន្លេសាប តំបន់អភិរក្សព្រែកតាចាន់នៃសហគមន៍នេសាទស្រីចឹកនេះ ដែលប្រជាពលរដ្ឋយកមកឲ្យលោក និងមួយចំនួនទៀតលោកប្រមូលទិញពីកន្លែងផ្សេង។
ប្រធានសហគមន៍នេសាទស្រីចឹក បានប្រាប់បន្តថា ការលែងសត្វអណ្ដើកនៅទីនេះ គឺជាលើកទី១ហើយ ហើយលោកមានមោទនភាពណាស់ ដែលអភិបាលខេត្តផ្ដល់អាទិភាព និងមានទំនុកចិត្តមកលើសហគមន៍ បានប្រគល់សត្វអណ្ដើកចំនួន១០៧ក្បាលមកលែង ដើម្បីឲ្យសំបូរទៅថ្ងៃក្រោយ។
លោកឲ្យដឹងថា សហគមន៍នេសាទស្រីចឹក មានទំហំទទឹងប្រវែង៤៥ម៉ែត្រ បណ្ដោយ១៦០០ម៉ែត្រ ស្មើនឹងប្រមាណ០៧ហិកតា។ ក្នុងទឹកមានដាក់លូសិប្បនិមិត្ត គល់ឈើធំៗ និងបង្គោលជ្រុំ ហើយជុំវិញមានព្រៃរនាមដុះស្នាប់តាមមាត់ព្រែក ដែលជាជម្រកត្រីរស់នៅយ៉ាងសុខសាន្ត។
លោកប្រធានសហគមន៍ បានថ្លែងអំណរគុណយ៉ាងជ្រាលជ្រៅ ចំពោះលោក ខូយ រីដា អភិបាលនៃគណៈអភិបាលខេត្តពោធិ៍សាត់ ដែលលោកតែងតែគិតគូរផលប្រយោជន៍ជាតិ និងទុក្ខលំបាកប្រជាជនជាធំ។ លោកនឹងខិតខំការពារសត្វអណ្ដើកទាំងនេះឲ្យនៅគង់វង្ស ហើយបានអំពាវនាវដល់បងប្អូនប្រជាពលរដ្ឋ ជួយថែរក្សាការពារធនធានជលផលឲ្យនៅគង់វង្សទាំងអស់គ្នា ៕
ចែករំលែកព័តមាននេះ