ខេត្តពោធិ៍សាត់ ៖ រថយន្តមួយគ្រឿងបានបើកបុកប្តីប្រពន្ធពីរនាក់ដែលកំពុងជិះម៉ូតូស្របទិសគ្នា បណ្តាលឱ្យស្ត្រីជាប្រពន្ធរងរបួសធ្ងន់ហើយបានស្លា.ប់ពេលបញ្ជូនទៅមន្ទីរពេទ្យ ឯបុរសជាប្តីគ្រាន់តែរងរបួសស្រាលប៉ុណ្ណោះ ។ គ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ត្រង់ចំណុចភូមិវាលវង់ ឃុំស្នាអន្សា ស្រុកក្រគរ
ខេត្តពោធិ៍សាត់ ៖ រថយន្តមួយគ្រឿងបានបើកបុកប្តីប្រពន្ធពីរនាក់ដែលកំពុងជិះម៉ូតូស្របទិសគ្នា បណ្តាលឱ្យស្ត្រីជាប្រពន្ធរងរបួសធ្ងន់ហើយបានស្លាប់ពេលបញ្ជូនទៅមន្ទីរពេទ្យ ឯបុរសជាប្តីគ្រាន់តែរងរបួសស្រាលប៉ុណ្ណោះ ។ គ្រោះថ្នាក់ចរាចរណ៍នេះបានកើតឡើងលើកំណាត់ផ្លូវជាតិលេខ៥ ត្រង់ចំណុចភូមិវាលវង់ ឃុំស្នាអន្សា ស្រុកក្រគរ កាលពីថ្ងៃទី២៣ ឧសភា ២០១១ វេលាម៉ោង៣និង៥០នាទីរសៀល ។ ស្ត្រីជាប្រពន្ធដែលស្លាប់ឈ្មោះប៊ុន ណាត អាយុ៤៩ឆ្នាំ និងប្តីឈ្មោះស៊ីវ វណ្ណឌី អាយុ៤៨ឆ្នាំ ទាំងពីរនាក់រស់នៅឃុំអន្លង់វិល ស្រុកកណ្តៀង ។
នៅកន្លែងកើតហេតុ អ្នកឃើញហេតុការណ៍និយាយថា នៅវេលានោះគេឃើញប្តីប្រពន្ធរងគ្រោះជិះម៉ូតូម៉ាក C125 ពណ៌ខ្មៅ ពាក់ស្លាកលេខ ពោធិ៍សាត់ 1B-2243 ក្នុងទិសដៅពីកើតទៅលិច ដោយប្តីជាអ្នកបើក ។ លុះដល់ចំណុចកើតហេតុម៉ូតូបានវ៉ារថយន្តមួយគ្រឿងនៅខាងមុខ ខណៈពេលកំពុងវ៉ានោះក៏មានរថយន្តមួយគ្រឿងទៀតម៉ាកសាំយ៉ុង ពណ៌សំបកឪឡឹក ពាក់ស្លាកលេខភ្នំពេញ 2D-9073 កំពុងបោះពួយយ៉ាងលឿនស្របទិសគ្នាដែរ ។ ពេលនោះដោយកៀកគ្នាពេកមិនអាចជាន់ហ្វ្រាំងទាន់ក៏បុកម៉ូតូពីក្រោយយ៉ាងពេញទំហឹងបណ្តាលឱ្យខ្ទាតប្តីប្រពន្ធទាំងពីរនាក់ធ្លាក់លើថ្នល់ហើយត្រូវកង់រថយន្តកិនបន្ថែមទៀត ធ្វើឱ្យស្ត្រីជាប្រពន្ធរបួសយ៉ាងធ្ងន់ធ្ងរ ពេលបញ្ជូនទៅដល់មន្ទីរពេទ្យក៏ដាច់ខ្យល់ស្លាប់ទៅ ឯបុរសជាប្តីរបួសស្រាលនិងម៉ូតូខូចខ្ទេចខ្ទីអស់ ។ ចំណែកអ្នកបើកបររថយន្តមិនស្គាល់ឈ្មោះបានគេចខ្លួនបាត់បន្សល់ទុកតែរថយន្តនៅទីនោះ ។
ប្រភពព័ត៌មានពីសាច់ញាតិជនរងគ្រោះបានឱ្យដឹងថា នៅថ្ងៃនោះប្តីប្រពន្ធទាំងពីរនាក់បានទៅចូលរួមក្នុងពិធីភ្ជាប់ពាក្យកូនក្មួយនៅឃុំស្នាអន្សា ស្រុកក្រគរ តាំងពីព្រឹកម៉្លេះ លុះពេលរសៀលត្រឡប់មកវិញក៏ជួបគ្រោះថ្នាក់បែបនេះទៅ ។ បុរសជាប្តីបានយកសាកសពប្រពន្ធទៅធ្វើបុណ្យតាមប្រពៃណីនៅលំនៅឋានក្នុងឃុំអន្លង់វិល ស្រុកកណ្តៀង ។ ចំណែកម៉ូតូនិងរថយន្តបង្កគ្រោះថ្នាក់ត្រូវសមត្ថកិច្ចយកទៅរក្សាទុកនៅអធិការដ្ឋាននគរបាលស្រុកក្រគរដើម្បីដោះស្រាយតាមច្បាប់ ៕
ចែករំលែកព័តមាននេះ