ខេត្តកំពង់ធំ ៖ រថយន្តដឹកអ្នកដំណើរ១គ្រឿងរបស់ក្រុមហ៊ុនផារ៉ាម៉ោន អង្គរ Express ពណ៌ខៀវ-លឿង ពាក់ស្លាកលេខភ្នំពេញ 3B-2763 ដែលមានអ្នកដំណើរជិះចំនួន២០នាក់ បើកបរចេញពីរាជធានីភ្នំពេញឆ្ពោះទៅខេត្តសៀមរាប ត្រូវផ្ទុះឆេះ ដោយមិនដឹងមូលហេតុ តែមិនបណ្តាលឱ្យអ្នកដំណើររងគ្រោះនោះទេ
ខេត្តកំពង់ធំ ៖ រថយន្តដឹកអ្នកដំណើរ១គ្រឿងរបស់ក្រុមហ៊ុនផារ៉ាម៉ោន អង្គរ Express ពណ៌ខៀវ-លឿង ពាក់ស្លាកលេខភ្នំពេញ 3B-2763 ដែលមានអ្នកដំណើរជិះចំនួន២០នាក់ បើកបរចេញពីរាជធានីភ្នំពេញឆ្ពោះទៅខេត្តសៀមរាប ត្រូវផ្ទុះឆេះ ដោយមិនដឹងមូលហេតុ តែមិនបណ្តាលឱ្យអ្នកដំណើររងគ្រោះនោះទេ ។ ហេតុការណ៍នេះកើតឡើងនៅវេលាម៉ោង១១និង៣០នាទីយប់ថ្ងៃទី២៣ តាមផ្លូវជាតិលេខ៦ ត្រង់ចំណុចមុខទីបញ្ជាការកងរាជអាវុធហត្ថខេត្តកំពង់ធំ ស្ថិតក្នុងភូមិក្តី សង្កាត់ព្រៃតាហ៊ូ ក្រុងស្ទឹងសែន ។
តាមសមត្ថកិច្ចក្រុងស្ទឹងសែនបានឱ្យដឹងថា នៅមុនពេលកើតហេតុ គេឃើញរថយន្តខាងលើឈប់ហើយអ្នកដំណើរក៏ផ្អើលនាំគ្នាយកសំភាររបស់ខ្លួនចេញពីរថយន្តយ៉ាងប្រញាប់ប្រញាល់ ភ្លាមនោះស្រាប់តែគេឃើញរថយន្តនេះឆេះយ៉ាងសន្ធោសន្ធៅហើយផ្ទុះកង់មុខទាំងសងខាង ។
មួយសន្ទុះក្រោយមកទើបគេឃើញរថយន្តបន្លត់អគ្គិភ័យរបស់ស្នងការដ្ឋាននគរបាលខេត្ត ចេញមកជួយអន្តរាគមន៍បាញ់ទឹកពន្លត់រហូតដល់ម៉ោង១យប់ឈានចូលថ្ងៃទី២៤ ឧសភា ទើបពន្លត់ភ្លើងស្ងប់ទៅវិញជាស្ថាពរ នៅសល់តែខ្មោចឡាន ។ អ្នកដំណើរម្នាក់បាននិយាយថា ពេលធ្វើដំណើរមកដល់ចំណុចកើតហេតុ ស្រាប់តែអ្នកបើកបរបញ្ឈប់រថយន្តនេះហើយប្រកាសអាសន្ន ភ្លាមនោះស្រាប់តែពួកគេឃើញភ្លើងឆេះក្នុងរថយន្តត្រង់ចំណុចអ្នកអង្គុយបើកបរតែម្តង តែពុំបណ្តាលឱ្យអ្នកដំណើររងគ្រោះនោះទេ ក្រោយពេលកើតហេតុ អ្នកបើកបរបានគេចខ្លួនបាត់ ។
តាមការសន្និដ្ឋានរបស់សមត្ថកិច្ចជំនាញថា ភ្លើងឆេះរថយន្តនេះអាចបណ្តាលមកពីបែកទុយោហ្វ្រាំង ឬបែកទុយោម៉ាស៊ីនត្រជាក់ទើបធ្វើឱ្យឆ្លងចរន្តអគ្គិសនីឆាបឆេះក្នុងរថយន្តនេះតែម្តង ។ បន្ទាប់ពីពន្លត់ភ្លើងឆេះរថយន្តនេះបានស្ងប់ហើយ ទើបគេឃើញរថយន្ត១គ្រឿងផ្សេងទៀតមកដឹកអ្នកដំណើរបន្តទៅកាន់ខេត្តសៀមរាប ៕
ចែករំលែកព័តមាននេះ