ប្រទេស​ថៃ ៖ ក្រុមហ៊ុន Honda បាន​ចាប់ផ្តើម​ការ​ផលិត​រថយន្ត​អគ្គិសនី​ប្រភេទ SUV ម៉ូ​ដែល «e:N1» របស់​ខ្លួន​ជា​ផ្លូវការ​នៅ​ក្នុង​ប្រទេស​ថៃ ដោយ​ក្លាយជា​ក្រុមហ៊ុន​ផលិត​រថយន្ត​របស់​ជប៉ុន​ដំបូង​គេ ដែល​ផលិត​រថយន្ត​អគ្គិសនី​នៅ​ក្នុង​ប្រទេស​ថៃ​។

រឿង​មិន​ធ្លាប់​មាន​ពី​មុន ឥឡូវនេះ «e:N1» ដំបូង​បំផុត​បាន​កើតឡើង​ក្នុង​ខ្សែ​សង្វា​ក់​ផលិតកម្ម​នៅ​រោងចក្រ Honda ស្ថិត​ក្នុង​សួន​ឧស្សាហកម្ម Rojana ខេត្ត​ប្រា​ជី​ន​បុរី (Prachinburi) ដូចដែល​ត្រូវ​បាន​បញ្ជាក់​ដោយ​ក្រុមហ៊ុន Honda Automobile (Thailand) Co Ltd. ហើយ​នេះ​ចាត់​ទុក​ថា Honda គឺជា​ក្រុមហ៊ុន​ផលិត​រថយន្ត​ជប៉ុន​ដំបូង​គេ ដែល​ផលិត​រថយន្ត​អគ្គិសនី​ពេញលេញ​នៅ​ក្នុង​ប្រទេស​ថៃ​។ នេះ​យោង​តាម​ប្រភព​ពី​សារព័ត៌មាន​ថៃ The Nation ចេញផ្សាយ​នៅ​ថ្ងៃ​ទី ១៨ ខែ ធ្នូ ឆ្នាំ ២០២៣​។

ក្រុមហ៊ុន Honda បាន​បញ្ជាក់​ថា ព័ត៌មាន​លម្អិត​នៃ​ការ​បើក​ដំណើរការ​ទីផ្សារ​សម្រាប់ Honda នឹង​ត្រូវ​ប្រកាស​នៅ​ក្នុង​ត្រីមាស​ទី​១ នៃ​ឆ្នាំ​ក្រោយ​។ ក្រុមហ៊ុន​ក៏​បាន​អះអាង​ថា ការ​ផលិត​រថយន្ត​អគ្គិសនី​ប្រភេទ SUV នៅ​ក្នុង​ប្រទេស​ថៃ បញ្ជាក់​ពី​ទំនុកចិត្ត​របស់​ខ្លួន​នៅ​ក្នុង​ឧស្សាហកម្ម​រថយន្ត​របស់​ប្រទេស​តំបន់​អាស៊ី​អា​គ្នេ​យ៏​មួយ​នេះ​។ ក្រុមហ៊ុន​ជឿ​ថា «e:N1» នឹង​ផ្តល់​ឱ្យ​អ្នកទិញ​រថយន្ត​ថៃ​នូវ​ជម្រើស​បន្ថែម ហើយ​ក៏​រួម​ជាមួយនឹង​ប្រភេទ​រថយន្ត​មាន​ម៉ាស៊ីន​ចំហេះ និង​ប្រព័ន្ធ Hybrid ពេញលេញ​ផ្សេង​ទៀត​ផង​ដែរ​។

ក្រុមហ៊ុន​បាន​បញ្ជាក់​ក្នុង​សេចក្តីថ្លែងការណ៍​មួយ​ថា «​ក្រុមហ៊ុន Honda កំពុង​រៀបចំ​ឆ្ពោះទៅ​រក​គោលដៅ​ឆ្នាំ ២០៣០ ក្នុង​ការ​ផលិត​រថយន្ត​អគ្គិសនី​យ៉ាង​ហោច​ណាស់​២​លាន​គ្រឿង នៅ​ទូ​ទាំង​ពិភពលោក​»៕