ខេត្តបាត់ដំបង ៖ តូបលក់អីវ៉ាន់ចាប់ហួយមួយកន្លែងត្រូវភ្លើងឆេះអស់គ្មានសល់ កាលពីវេលាម៉ោង៧យប់ថ្ងៃទី១៧ ធ្នូ ស្ថិតនៅចំណុចភូមិពោធិ ឃុំព្រៃខ្ពស់ ស្រុកបវេល ដែលអះអាងថា បណ្ដាលមកពីការធ្វែសប្រហែសរបស់ម្ចាស់តូប ដែលបូមសាំងដាក់ដបហៀរចូលរន្ធហ្វ្រីឌុយទូទឹកកក ទើប
ទុស្សេក្លាយជាអគ្គិភ័យតែម្ដង ។
សមត្ថកិច្ចបានរាយការណ៍ថា តូបលក់អីវ៉ាន់ដែលត្រូវភ្លើងឆេះមានទំហំ ៤ម៉x១៥ម៉ ធ្វើពីឈើប្រក់ស័ង្កសី ដែលមានម្ចាស់ឈ្មោះ ហេន រិទ្ធ ភេទប្រុស អាយុ៥៥ឆ្នាំ រស់នៅចំណុចកើតហេតុ ។ បើតាមជនរងគ្រោះបានរាយការណ៍ប្រាប់សមត្ថកិច្ចថា អគ្គិភ័យដែលឆេះតូបគាត់ គឺបណ្ដាលមកពីការទុស្សេខ្សែភ្លើង រន្ធឌុយទូទឹកកក ទើបក្លាយជាអគ្គិភ័យឆាបឆេះអីវ៉ាន់ក្នុងតូប និងតូបអស់គ្មានសល់ ។
ប៉ុន្តែអធិការស្រុកបវេល លោក សុខ សារិន បានថ្លែងថា បើតាមការសួរនាំម្ចាស់តូបបានចាក់សាំងចូលដបបែបធ្វែសប្រហែស ធ្វើឲ្យហៀរទៅប៉ះនឹងរន្ធហ្វ្រីឌុយទូទឹកកក ទើបបណ្ដាលឲ្យទុស្សេក្លាយជាអគ្គិភ័យតែម្ដង ។
លោកអធិការបានបញ្ជាក់ថា រថយន្តអគ្គិភ័យរបស់សមត្ថកិច្ចបានចេញជួយអន្តរាគមន៍ ដើម្បីបាញ់ទឹកពន្លត់ តែអគ្គិភ័យបានឆេះអស់ស្ទើរទាំងស្រុងទៅហើយ ។ អគ្គិភ័យបានឆេះអស់នូវតូបលក់ដូរនិងអីវ៉ាន់ ដែលខូចខាតគិតជាទឹកប្រាក់ប្រមាណ១០លានរៀល តែមិនមានគ្រោះថ្នាក់ដល់មនុស្សទេ ៕
ចែករំលែកព័តមាននេះ