ខេត្តកណ្តាល ៖ លោកអ៊ី សុភី នាយសង្កាត់រដ្ឋបាលព្រៃឈើស្រុកកៀនស្វាយ បានឱ្យដឹងថា កាលពីថ្ងៃទី១៩ ឧសភា កន្លងទៅថ្មីៗនេះ ឈើគ្រញូងជាកំណាត់ខ្លីៗមានប្រវែងក្រោម១ម៉ែត្រ និងជាង១ម៉ែត្រមុខកាត់ទំហំ១តឹក និងក្រោម១តឹក ជាលក្ខណៈឈើច្នៃធ្វើគ្រឿងសង្ហារិមសម្រាប់តម្រូវការទីផ្សារនៅប្រទេសវៀតណាម ចំនួន៧០ដុំ
ខេត្តកណ្តាល ៖ លោកអ៊ី សុភី នាយសង្កាត់រដ្ឋបាលព្រៃឈើស្រុកកៀនស្វាយ បានឱ្យដឹងថា កាលពីថ្ងៃទី១៩ ឧសភា កន្លងទៅថ្មីៗនេះ ឈើគ្រញូងជាកំណាត់ខ្លីៗមានប្រវែងក្រោម១ម៉ែត្រ និងជាង១ម៉ែត្រមុខកាត់ទំហំ១តឹក និងក្រោម១តឹក ជាលក្ខណៈឈើច្នៃធ្វើគ្រឿងសង្ហារិមសម្រាប់តម្រូវការទីផ្សារនៅប្រទេសវៀតណាម ចំនួន៧០ដុំ ត្រូវបានសមត្ថកិច្ចចាប់រឹបអូស ខណៈមានជនមិនស្គាល់មុខមួយក្រុមបានលបលួចដឹកតាមរថយន្តតាក់ស៊ីមិនស្គាល់ម៉ាក មកទម្លាក់ចោលក្នុងគុម្ពត្រែងនៅមាត់ច្រាំងទន្លេមេគង្គ ។
លោកនាយសង្កាត់រដ្ឋបាលព្រៃឈើបន្តទៀតថា នេះជាករណីទី៥ហើយ ដែលមានការលួចទម្លាក់ឈើនៅមាត់ច្រាំងទន្លេនៅក្នុងភូមិកណ្តាល ឃុំបន្ទាយដែក ស្រុកកៀនស្វាយ តែក្នុងពេលពួកគេកំពុងទម្លាក់ឈើប្រណីតរួចនាំគ្នាសែងទៅមាត់ច្រាំងទន្លេលាក់ក្នុងគុម្ពត្រែងនោះ ក៏ត្រូវភ្នាក់ងារយើងប្រទះឃើញរាយការណ៍មករូបលោក ។ ពេលនោះលោកក៏បានចាត់មន្ត្រីរដ្ឋបាលព្រៃឈើក្រោមឱវាទឱ្យប្រញាប់ធ្វើដំណើរទៅចំណុចនោះជាបន្ទាន់។ ប៉ុន្តែដោយសារផ្លូវឆ្ងាយ និងស្ទះចរាចរណ៍ផងធ្វើឱ្យការធ្វើដំណើររបស់លោក និងមន្ត្រីក្រោមឱវាទទៅដល់ទីនោះរាងយឺតពេលបន្តិច ជាឱកាសល្អឱ្យអ្នកទម្លាក់ឈើគ្រញូងទាំងនោះគេចខ្លួនបាត់អស់។
លោកបន្តថា តាមលក្ខណៈបច្ចេកទេសនៃការលាក់ទុកនេះ បើមិនមែនជាសមត្ថកិច្ចក៏មិនចាប់អារម្មណ៍ដែរ ព្រោះជនប្រព្រឹត្តបទល្មើសព្រៃឈើនេះ មានល្បិចកលខ្ពស់ណាស់បានជាពួកគេយកចំណុចច្រាំងទន្លេដែលមានដើមត្រែងខ្ពស់ៗធ្វើជាកន្លែងលាក់ឈើគ្រញូងដ៏មានតម្លៃរបស់គេ។ ក្រោយពីរកឃើញឈើទាំងនោះហើយលោកបានឱ្យកម្លាំងដឹកជញ្ជូនយកមករក្សាទុកនៅទីស្នាក់ការបណ្តោះអាសន្ន និងរាយការណ៍ជូនថ្នាក់លើជាបន្ទាន់ ។ លោកបាននិយាយថា ក្រុមឈ្មួញរកស៊ីឈើខុសច្បាប់នេះ ក្រោយពីដឹងថា ឈើរបស់គេត្រូវសមត្ថកិច្ចរបស់លោកចាប់រឹបអូសយក ពួកគេបានបើករថយន្តម៉ាកវីហ្គោក្រឡឹងឆ្វែលចុះឆ្វែលឡើង ហើយលបលួចសួររកលំនៅឋានរបស់លោកទៀតផង។ ករណីនេះទំនងជាពួកគេមានបំណងអាក្រក់មកលើរូបលោកក៏មិនដឹង ទើបលោកបានរាយការណ៍ជាបន្ទាន់ទៅថ្នាក់លើ និងយកកម្លាំងសមត្ថកិច្ចពិសេសៗជាច្រើននាក់មកស្ទាក់ចាប់ និងការពារសុវត្ថិភាពផ្ទាល់ខ្លួន ។ ពេលដឹងថាមានសមត្ថកិច្ចស្ទាក់ចាប់ ពួកគេក៏បានបើករថយន្តនោះគេចខ្លួនបាត់ទៅ ។
លោកនាយសង្កាត់ព្រៃឈើឱ្យដឹងទៀតថា អំឡុងដើមខែវិច្ឆិកា ឆ្នាំ២០១០ មកដល់ខែឧសភា ឆ្នាំ២០១១ នេះ លោកបានស្ទាក់ចាប់បទល្មើសព្រៃឈើបាន៥ករណី ហើយករណីខ្លះមានទាំងរថយន្តទៀតផង។ ចំពោះគំនរឈើគ្រញូងដែលចាប់បានទាំង៥ករណីនេះលោកបានរាយការណ៍ទៅស្ថាប័នតុលាការដើម្បីធ្វើការសម្រេច ៕
ចែករំលែកព័តមាននេះ