អង្គការអូតង់កាលពីព្រឹកថ្ងៃទី២៤ ឧសភា បានបើកការវាយប្រហារតាមអាកាសទៀត ដោយវាយប្រហារច្រើនលើកលើទីក្រុងទ្រីប៉ូលី រដ្ឋធានីលីប៊ី ហើយគេឃើញផ្សែងហុយចេញពីកន្លែងក្បែរទីតាំងលាក់ខ្លួនរបស់លោកកាដាហ្វី ។ ការវាយប្រហារនេះជាការវាយប្រហារធ្ងន់ធ្ងរមួយរបស់អូតង់ ប្រឆាំងរដ្ឋធានីទ្រីប៉ូលី ចាប់តាំងពីអង្គការអូតង់ចាប់ផ្តើមប្រតិបត្តិការរបស់ខ្លួន ប្រឆាំងលោកកាដាហ្វី កាលពី២ខែកន្លងមក គឺចាប់ផ្តើមនៅវេលាម៉ោង១យប់ឈានចូលថ្ងៃទី២៤ ឧសភា រយៈពេល២០នាទី ។
លោក Moussa Ibrahim អ្នកនាំពាក្យរដ្ឋាភិបាលលីប៊ីនិយាយថា ការវាយប្រហារនេះសំដៅទីតាំងឆ្មាំសន្តិសុខសម្រាប់យោធាស្ម័គ្រចិត្តដែលគាំទ្រលោកកាដាហ្វី ។ លោក Ibrahim និយាយឱ្យដឹងទៀតថា ការវាយប្រហារនេះបណ្តាលឱ្យស្លាប់មនុស្ស៣នាក់ និង១៥០នាក់ទៀតរងរបួស។
អង្គការអូតង់និយាយក្នុងសេចក្តីថ្លែងការណ៍មួយថា ការវាយប្រហារនេះគឺសំដៅឃ្លាំងស្តុករថយន្តរបស់របបលោកកាដាហ្វី ព្រោះរថយន្តទាំងនោះជាឧបករណ៍ដឹកសម្ភារផ្តល់ឱ្យកងកម្លាំងរដ្ឋាភិបាលដើម្បីវាយប្រហារប្រឆាំងជនស៊ីវិល ។
កាលពីថ្ងៃទី២៣ ឧសភា កន្លងមក កងកម្លាំងស្ម័គ្រស្លាប់ចំពោះលោកកាដាហ្វី បានបើកការវាយប្រហារនៅតំបន់ឆ្លងកាត់ព្រំដែនដែលកាន់កាប់ដោយពួកឧទ្ទាមបណ្តាលឱ្យស្លាប់មនុស្ស៩នាក់ ៕
ចែករំលែកព័តមាននេះ